சிலைகள் செய்நன்றி ஆகா!

by ரௌத்திரன் Mon Jul 16, 2012 7:46 am

தேரினை இழந்த பின்பு
===திருவிழா நடத்து கின்ற
நேரிலா அறிஞர் தேசம்
===நானிலந் தன்னில் இஃதே!
ஆறிலே ஒன்று போன
===நாயிடம் உள்ள நன்றி
சீருடன் பிறந்த நம்மில்
===சிறிதள வேனும் இல்லை!

எத்தனை மேதை கள்இந்
===நாட்டிலே பிறந்து வந்தார்?
அத்தனை பேரில் யாரை
===உண்மையில் மதித்து நின்றோம்?
செத்தபின் சிலைகள் வைத்தல்
===செய்ந்நன்றி ஆகா தென்றும்!
மத்தியில் வாழும் போதே
===மகுடங்கள் சூட்ட வேண்டும்!

சந்தியில் சிலையை நாட்டி
===சிலையினைத் திறப்ப தற்கு
மந்திரி அவரோ டின்னும்
===மடையர்கள் நால்வர் கூட்டி
"எந்தையே எங்கள் கோவே!"
===என்றுமோர் கவிதை தீட்டி
வந்ததோ டென்ன செய்தோம்?
===வழக்கம்போல் மறந்து விட்டோம்!

சந்தியில் நிற்ப தந்த
===சரித்திர புருஷர் தம்மின்
மந்திர சிலைகள் மட்டும்
===என்றாநீர் நினைத்தீர்? இல்லை!
செந்தணல் பட்ட அன்னார்
===சித்தாந்தங் களும்தான்! இஃதைச்
சிந்தையில் என்று வைப்பீர்?
===சிறப்பினை என்று காண்பீர்?

[b]

கருவது கலைந்த பின்பு
=====தொட்டிலை வாங்கும் மக்காள்!
தருவது பட்ட பின்பு
=====தண்ணீரை ஊற்றும் மக்காள்!
இருவிழி போன பின்பு
=====மையினைத் தீட்டும் மக்காள்!
பெறுவது இதனால் நீவிர்
=====பெரிதாக ஏதும் இல்லை!

உழுவதை விட்டு விட்டு
======உலுத்தரே நீவி ரெல்லாம்
கொழுவினைச் சுற்றி வந்து
======கும்பிடு வதாலே என்றும்
தழுவிய வறுமை போகும்
======என்றுநி னைத்தி ருந்தால்
அழுவது அன்றி வேறு
======வழியுமக் கில்லை யென்பேன்!

நேற்றுநாம் வாழ்ந்த வாழ்வு
======நாளையும் தொடர்ந்தால் தாழ்வு!
மாற்றுவோம் நமது சாலை
======மலரட்டும் புதிய நாளை!
போற்றுவோம்; மேலும் அன்னார்
======புகன்றநற் கொள்கை யாவும்
ஏற்றுநாம் நடப்போம்; நல்ல
======ஏற்றத்தில் களித்தி ருப்போம்!

------------ரௌத்திரன்
[/b]