ஆயினும் என்ன?

by ரௌத்திரன் Thu Jul 19, 2012 3:55 pm

(என் வாழ்வில் காதல் என்ற விபத்து இரண்டாவது முறையாக

நிகழ்ந்தபோது, என்ன நடந்ததோ நானுற்ற உணர்ச்சிகளும்

பாதிப்புகளும் எவையோ அவற்றை இங்கு ஒருவன் முதன்முறை சந்திப்பதாக பதிவுசெய்துள்ளேன்.)

கனவுகளின்
கதகதப்பில்-என்
கண்களை உறங்கவைத்தவளே!

நினைவுகளால் குடைவிரித்து
நெஞ்சுக்கு
நிழல் கொடுத்தவளே!

ஆலமரம் என்று
நினைத்தேன் என்னை!
அருகம்புல்லாய்
அறுத்தாய்....

மழு என்று
நினைத்தேன் என்னை!
மழுவெடுத்து
மலர்க்கூந்தல் கோதிக்கொண்டாய்...

எவளும் நுழைந்துவிடக் கூடாதென்று
இதயத்தைப் பூட்டிச்
சாவியைத் தொலைத்தேன்!

கண்கள் என்னும்
கள்ளச் சாவி
கொண்டுவந்தாய்....

இரண்டாம் உலகம்போரில்
பிரிட்டனைப்
பயமுறுத்திய
ஜெர்மன் கப்பற்படை போல்
அதிரடியாய்-என்
அஸ்திவாரம்
அசைத்தாய்....

பாதரசம்
பூசப்படாத கண்ணாடி
என் இதயம்.

அதில்
முதலும் கடைசியுமாய்
முகம்பார்த்தவள் நீதானடி...!

நான்
கருமியின் புதையலாய்க்
காதலை மறைத்தேன்!

ஆனாலும்
சிறகின் கதகதப்பில்
குஞ்சு
கருகிவிடக் கூடாதென்று
கண்டுகொண்டேன்...

திரைக்குள் போடும் நாடகத்திற்கு
விருதுகள் கிடைக்காதென்று
விளங்கினேன்....

என் வெட்கத்தின் நீள அகலமே
என் காதலின் கல்லறைக்கான
அளவுகோலாய்
ஆகிவிடக் கூடாதென்று
அறிந்துகொண்டேன்.....

பேச்சுப் போட்டிக்காய்
முதன்முதலில்
மேடை ஏறியவன்போல்
உளறி உளறிக்
குளறிக் குளறிக்
காதல் ஒப்பித்தேன்!

நீயோ
அமைதியாய்
அதே நேரம்
அழுத்தமாய்ச் சொன்னாய்.

அந்த நொடி....

இதுவரை
இந்த பூமி சந்தித்த
ஒட்டுமொத்த பூகம்பங்களும்
ஒன்றாய் நிகழ்ந்தது
என் இருதயப் பரப்பில்.....

அதை
நீ அறிய
நியாயமில்லை!

கடலுக்குள் வெடிக்கும் எரிமலையின் சப்தம்
கரைக்குக் கேட்க வழியில்லை..

ஆம்,
அதை
நீ அறிய
நியாயமில்லை!

ஓ!
அடுத்தவன் வாசலென்று
அறியாமல்
கோலம் போட வந்தேனா?

மாலையில் சேர்ந்தபிறகு
மலரை வண்டு
மொய்க்க வந்ததா?

ஆயினும் என்ன?

உன்னை நான் மறத்தற்கில்லை!

காற்று
கைக்குச் சிக்கவில்லை என்பதற்காக
சுவாசத்தை யாரும்
நிறுத்திக்கொள்வதில்லை!

நானுன்னை மறத்தற்கில்லை!

நேற்றுவரை
நீயென் வானத்தில்
நிலவு.

இன்றுமுதல்
நீயென்
வானத்தில் ஆறாத
வடு......

--------------ரௌத்திரன்

by **கவியருவி ம. ரமேஷ்** Thu Jul 19, 2012 9:20 pm

காதலின் வடுக்கள்தான்
காதல் தோல்வி
வடுக்களில் ரத்தம் வந்துகொண்டேயிருந்தாரும்
ரசித்துக்கொண்டேதானிருப்போம்.

கவிதை அழகு... காதலின் ஆழம் முதல்காதலில்தான் அதிகம் என் அனுபவமும்கூட...

இரண்டாவது காதலில் காமம் கலந்தவிடுகிறது என்பது எதார்த்தமான உண்மை...

[You must be registered and logged in to see this image.]

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

ஆயினும் என்ன?

ஆயினும் என்ன?

Re: ஆயினும் என்ன?

Re: ஆயினும் என்ன?

Re: ஆயினும் என்ன?