எவனுக்கு 'ஓம்' என்று சொல்லலாமென

by **yarlpavanan** Wed Oct 31, 2012 8:30 am

நானும்
ஆளை ஆள் பார்க்கிறேன்
ஒருத்தனும்
என்னைக் காதலிப்பதாக இல்லை!
கண்ணாடியைப் பார்த்துப் பார்த்து
தலை வாரித் தலை வாரி
தலைமுடியும் உதிருகிறதே...
மணக்கும் தண்ணி(colon) பூசி
தலைமுடியும் நரைக்க நரைக்க...
மணக்கும் பூசல் மா
முகத்திலே அப்பி அப்பி
முகத்திலே ஊத்தைக் களி உருள...
நாளுக்கு
நாலு வேளை குளித்து
எங்க வீட்டுக் கிணறு வற்ற
எங்க அம்மா
"இவளுக்குப் பைத்தியமோ" எனத் திட்ட
நாற்சந்திகளில்
அழகாக, எடுப்பாக
கால் கடுக்க, காலணி தேய
நேர்கோட்டிலே பெருவிரல் வைத்து
நடைபோடும் அழகைப் பார்த்தாவது
ஒருத்தனும்
என்னைப் காதலிக்க முன்வரவில்லையே!
அகவை பதினெட்டானால்
சட்டுப் புட்டென்று
காதல் வருமென்பது பொய்யோ...
"காதலிப்பது எப்படி?" என்று
எவராவது பொத்தகம் எழுதினரோ என
யாழ்ப்பாணத்திலும் சென்னையிலும் தேடி
ஒரு பொத்தகக் கடையிலும் இல்லையே...
"காதலிக்கச் சொல்லித் தாரும்" என
எவராவது மதியுரைஞ(counsellor)ரிடம் கேட்க
உள்ளத்திலே ஒரு பின்வாங்கல்...
எல்லாம் தோற்றுப் போக
பைத்தியம் பிடிக்க
எவனாச்சும் ஒருவனிடம்
"நான் உன்னைக் காதலிக்கிறேன்" என
கேட்டுப் பார்க்கக் காத்திருந்து
ஒரு கறுவல் வந்து அகப்பட
நானும் கேட்ட போது
"கேட்டு வருவது காதலில்லை
ஒழுக்கமாக
ஒரு வேலையிலோ உன்வீட்டிலோ
இருந்தால் பரவாயில்லை
அழகைக் காட்டித் திரிந்தால் - அது
பறிபோயிடும் பாருங்கோ - அதன் பின்
சாவு தான் பரிசு
அடிக்கடி கோயிலுக்குப் போ
அடிக்கடி நூலகத்துக்குப் போ
தெருச் சுற்றும் பெண்களை
நல்ல ஆண்களுக்குப் பிடிக்காதே
எவனைக் கண்டாலும் ஒதுங்கிப் போ - அதை
நாலு ஆள்கள் பார்த்து அதிர - அதைக் பார்த்து
ஆண்கள் உன்னை நாடியலைய
எவனுக்கு 'ஓம்' என்று சொல்லலாமென - நீ
முளி முளியென்று முளிக்க
அதில் ஒரு சுகமிருக்கே!" என்றவன்
நீ எப்ப
அப்படி இருக்கிறாயென
நான் பார்த்து உறுதி செய்வேனோ- அப்ப
"என்னை நீ காதலி" என்று கேட்பேனென
"உப்பிடி எத்தனை ஆண்களைக் கேட்டியோ" என
என்னைத் திட்டிச் செல்லாமல்
அன்பாலே என் உள்ளத்தில்
இடம்பிடித்துச் சென்றானே!

*பைத்தியம் போல காதலிக்க அலையும் பெண்களே! உங்களுக்கு இக்கவிதையை அன்பளிப்புச் செய்கிறேன்!.