ஆந்தை

by **அ.இராமநாதன்** Sat Nov 10, 2012 4:28 pm

-
ஆந்தைகளில் 205 ஜாதிகள் உள்ளன. ஆந்தைகள் வேட்டையாடி
மற்ற உயிர்களை அழித்து, தன் உணவாக்கிக் கொள்ளும்.
இதனால் இவை விவசாயிகளின் எதிரியான எலி, அணில், முயல்
ஆகியவற்றை அழித்துத் தின்று விவசாயிகளின் தோழனாகக்
கருதப்படுகின்றன. இவற்றைத் தவிர பூச்சிகள், சிறிய பறவைகள்
மற்றும் ஓணான் போன்றவற்றையும் ஆந்தைகள் உணவாகக் கொள்ளும்.

• ஆந்தைகளைப் பற்றிய விவரங்களை மனிதன் சுமார் 15,000 –
20,000 ஆண்டுகளுக்கு முன்னரே கல்வெட்டுகளிலும் குகைச்
சித்திரங்களிலும் குறித்து வைத்துள்ளான். எகிப்து நாட்டு லிபியில்
இவை பற்றி விவரங்கள் உள்ளன.

• மற்ற பறவைகளைப் போல வாயில் பற்கள் இல்லாததால் தனது
உணவை முழுமையாக விழுங்கிவிட்டு, செரிக்காத எலும்பு, சிறகு
மற்றும் உரோமங்களை வாய் மூலம் வெளியேற்றிவிடும்.

•எல்லா ஆந்தைகளும் இரவிலேயே சுற்றித் திரிகின்றன. இதனால்
பகல் நேரப் பறவைகளான பருந்து, கழுகு ஆகியவற்றுடன் இவற்றுக்குப்
போட்டி கிடையாது. சில இன ஆந்தைகள் மட்டுமே அதிகாலையிலோ,
மாலை வேளைகளிலோ வேட்டையாடும்.

•ஆந்தையின் கண்கள் தன் குழியில் நகர இயலாதவை! ஆகையால்
தனது கழுத்தைத் திருப்பித்தான் ஆந்தையால் அங்குமிங்கும் பார்க்க
முடியும். இரண்டு கண்களும் தலையின் முன்பக்கமே அமைந்துள்ளதால்
இவைகளுக்கு மனிதனைப் போல துணை விழிப் பார்வை உள்ளது.

•ஆந்தையின் சிறகுகள் சத்தமின்றிப் பறப்பதற்கு ஏற்றபடி அமைந்துள்ளன.
இறக்கையின் முன் பகுதியில் கட்டையான வரிகளும் பின்புறத்தில்
மென்மையான வரிகளும் ஒலியைக் குறிக்கின்றன. அதனால் இரவில்
சத்தமின்றிப் பறந்து தன் இரையை எளிதில் பிடிக்க ஆந்தையால்
முடிகிறது.

•ஆந்தையின் காதுகளைப் பார்க்க இயலாது. ஏனெனில் காதுகள்
கண்களின் பின்புறம் அமைந்துள்ளன. இது போதாதென்று சிறகுகளும்
காதுகளை மூடியிருக்கும். இந்தக் காதுகள் மிகவும் மெல்லிய ஒலியையும்
கேட்க வல்லவை. இலைகளினூடே மெதுவாக நகரும் சிறிய எலிகள்
ஏற்படுத்தும் ஒலியைக் கூடக் கேட்டு அவற்றை ஆந்தை பிடித்துவிடும்.

•மற்ற பறவைகளைக் காட்டிலும் ஆந்தைகளின் கால்களிலுள்ள நான்கு
விரல்களில் இரண்டு முன்புறமும் இரண்டு பின்புறமும் வளைந்து
அமைந்திருக்கும். இதனால் தனது இரையை நன்றாகப் பிடித்துக் கொண்டு
ஆந்தையால் பறந்து செல்ல முடியும்.

•ஆந்தையின் அலகு பார்ப்பதற்கு சிறியது போலத் தோன்றினாலும்,
சற்றுப் பெரியதுதான். சிறகுகளுக்குள் ஒளிந்திருப்பதால் அவை
சிறியவை போலத் தோன்றும். மிகக் கூர்மையாகவும் வளைந்தும்
இருப்பதால் தனது இரையை நன்றாகக் கிழித்து உண்பதற்கு ஏதுவாக
இருக்கும்.

•ஆந்தையின் கூச்சல் பலவிதமானவை. மிகவும் சத்தமாகவும்
தாழ்ந்த சுருதியிலும் இதன் ஓசை இருப்பதால் வெகுதூரம் இவற்றின்
குரலொலியைக் கேட்க முடியும். தனது இனத்தைக் கண்டு கொள்ளவும்
தான் இருக்கும் பகுதியைத் தெரியப்படுத்தவும் ஆந்தை தனது குரலைப்
பயன்படுத்துகின்றது.
---------------------------------------------
-தொகுப்பு: எஸ்.கணேசன்,
நன்றி: சிறுவர் மணி

தகவல் பகிர்வுக்கு நன்றி ஐயா

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

ஆந்தை

ஆந்தை

Re: ஆந்தை