இயலாமை

by **அ.இராமநாதன்** Sat Dec 08, 2012 10:26 am

-
கண் திருஷ்டித் தாவரமென்று
கற்றாழையை வாசலில் தொங்கவிட்டு
இரண்டே நாளில் அதன் நுனி கருக
அத்தனையும் கண்ணெரிச்சலென
கருகிய நுனி கிள்ளியெறிந்து
புலம்பித் தீர்த்தாள் அம்மா
-
”கற்றாழை சுருங்கச் சுருங்க
நம்மளும் சுருங்கிடுவோம்டா”
அப்பத்தா ஆருடம சொல்லியதிலிருந்து
அநேக சமயங்களில்
சுருங்கியருக்கிறதா என
கற்றாழையைக் கண்கள் தேடுகின்றன
-
கடன் கழுத்தை நெரிக்க
கற்றாழையும் கைவிட்டதென
‘பணத்தாவரம்’ எனும் ஒருவகைச் செடியை
நட்டு வைத்துத் தண்ணீர் ஊற்றி
செடி வளர வளர
வசதியும் வளரும் என்ற அப்பாவை
என்னவென்று சொல்வது?
-
பணத்தாவரமும் கைவிட்டு
வட்டி விழுங்கிய
வாழ்க்கையின் எச்சமாய்
வாழ்வா சாவா போராட்டத்தில்
யாருக்கும் தெரியாமல்
ஒரு மழை நாளில்
குடும்பத்துடன் பரதேசம் போன
நாளிலிருந்து நான்காவது நாள்
பக்கத்து வீட்டு ரகசிய நண்பன்
அலை பேசினான்
நீங்கள் விட்டுச் சென்ற
பணத்தாவரத்தில் புதிதாய்
இலைகளிரண்டு துளிர்த்திருக்கிறதென…
-
============================
>கு.விநாயகமூர்த்தி
நன்றி: ஆனந்தவிகடன் 5-12-12

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

இயலாமை

இயலாமை

Re: இயலாமை