ஹைக்கூ ! சென்றியு ! கவிஞர் இரா .இரவி !

by **eraeravi** Sat Dec 29, 2012 4:42 pm

ஹைக்கூ ! சென்றியு ! கவிஞர் இரா .இரவி !

நன்கு உணர்த்தியது
எடிசனின் பெருமையை
மின்தடை !

தணிக்கையின்றி
ஆபாச விசம் இல்லத்தில்
தொ(ல்)லைக்காட்சி !

விலங்கிலிருந்து வந்தவனை
திரும்பவும் விலங்காக்கின
தொலைக்காட்சித் தொடர்கள் !

நேர்மறைக்கு இடமின்றி
எதிர்மறைக்குப் பேரிடம்
ஊடகங்கள் !

பரப்பி விதைக்கின்றனர்
தமிங்கிலம்
ஊடகங்கள் !

ஒரே பார்வை
பாய்ந்தது மின்சாரம்
காதல் விளக்கு !

மறந்தது கவலை
குடிசையின் துளையில்
மழைத்துளிகளின் இசை !

திருட வந்தவன்
திட்டிச் சென்றான்
ஏழை வீடு !

சொன்னார்கள் நேரம்
வானம் பார்த்து
கிராமத்தினர் !

பிடிக்காதது
இளைஞர்களுக்கு
அறிவுரை !

கர்நாடக உறவோடு
நிலத்திலும்
விரிசல் !

உயிர் வளர்க்கும் உணவு
உழைத்துத் தந்த உழவன்
உயிர் வெறுத்து தற்கொலை !

வெகு நாட்கள் இல்லை
அருங்காட்சியத்தில்
நெல் !

கையில் வெண்ணை
நெய் தேடல்
இலவசங்கள் !

காலுக்கடியில் புதையல்
அறியாமல் பிச்சை
மக்கள் !

by **கவியருவி ம. ரமேஷ்** Sat Dec 29, 2012 5:04 pm

மிகவும் பொருத்தமான சென்ரியூக்கள்... நகைக்கும்போது நகைக்கவில்லை சமுதாய மாற்றம் காண விழைகிறார்கள் கவிஞர்கள் என்று சமுதாயம் உணரட்டும்....

வாழ்த்துகள்...

ஹைக்கூத் தொகுப்புகளிலிருந்து சென்ரியூக்களைப் பிரித்தெடுக்க வேண்டியுள்ளது. வருங்காலத்தில் சென்ரியூத் தொகுப்புகளைக் கவிஞர் தனியே வெளியிடுதல் நன்று என்றும், தமிழ்க் கவிஞர்கள், ஹைக்கூவில் சென்ரியூப் பண்பினைக் கலத்தலைக் கைவிட்டு, நடப்பியல் கூறும் சென்ரியூத் தொகுப்புகளைத் தனியே வெளியிடுதல், இலக்கிய வளர்ச்சியை முறைப்படுத்தும் (நிர்மலா சுரேஷ், ஹைக்கூக் கவிதைகள் ஆய்வு நூல், ப.290.) என்றும் முன்வைத்திருப்பதைக் கருத்தில் கொண்டமைக்கு என் நன்றிகள்... தமிழ் இலக்கிய உலகம் தங்களை என்றும் போற்றும்...

வாழ்த்துகள்... வளருங்கள்... சென்ரியூவையும் வளர்த்தெடுங்கள்...

என்னுடைய தெய்வங்கள் உலா வரும் பாதை என்ற சென்ரியூ தொகுதி ஜனவரியில் வெளிவர இருக்கிறது என்பதையும் தெரிவித்துக் கொள்வதில் மகிழ்கிறேன்.