தை மகள் வருகிறாள் தரணி மணக்க!

by **அ.இராமநாதன்** Mon Jan 14, 2013 11:05 am

–
* தைமகள் வருகிறாள்
தரணி மணக்க…
வாசல் தெளித்து
வழியெங்கும் கோலமிட்டு
பூக்களால் அலங்கரித்து
புதுமகளை வரவேற்போம்!

* புதுப்பானை வாங்கி
பொன் மஞ்சள் மாலைகட்டி
ஓலை நறுக்குகளால்
உலைப் பொங்கல் பொங்கட்டும்!
எங்கும் மகிழ்ச்சி வெள்ளம்
ஏகாந்தம் கொடுக்க
பச்சரிசி மணக்க
படைப்போம் பொங்கலினை!

* பால் பொங்கும் பரவசத்தில்
பூமி மகிழட்டும்…
செங்கரும்பு காய்கறிகள்
செவ்வாழை கனிகளுடன்
தலைவாழை இலை வைத்து
தை மகளை வரவேற்போம்!

* பொங்குக பொங்கல்…
பொங்கலோ பொங்கல்…
எனும் வாழ்த்தொலி
எத்திசையும் ஒலிக்கட்டும்!

* உழவர் சிறக்கவும்
ஊர் மக்கள் மகிழவும்
தரணி மகிழ்விக்க
தை மகள் வருகிறாள்…
அத்தைமகளின் வரவு
அத்”தை’ மகளின் வரவுபோல்
ஆனந்தத்தை
அள்ளி இறைக்கட்டும்!

* கரும்பின் சுவையும்
பொங்கலின் குழைவும்
மஞ்சள் மணமும்
மனித குலம் பெறட்டும்!

* ஏலம் முந்திரி
திராட்சை வெல்லம்
இவையெல்லாம் சேர்ந்து
இனிப்பை கூட்டல் போல்
மனிதர்கள் சேர்ந்து
மனிதத்தின் புகழ்கூட்ட
தை மகள் வருகிறாள்
தரணி மணக்க…
வரும் தை மகளை வணங்கி
தாய்போல் வரவேற்போம்!

-

===============================
— வளர்கவி, கோவை.

;நன்றி: வாரமலர்