நமக்கு நாமே டாக்டர் – இரா. மணிகண்டன்

by **அ.இராமநாதன்** Thu Jan 17, 2013 5:21 pm

-
இது கம்ப்யூட்டர் யுகம். பரபரப்பான வாழ்க்கை வாழ்ந்தாக
வேண்டிய கட்டாயம். அதனால் பி.பி., இதய நோய்கள்,
நீரிழிவு நோய் உள்ளிட்ட நோய்களுக்கும் பஞ்சமில்லை.
டாக்டரிடம் போனால், எந்த நோயாக இருந்தாலும்,
அவர்கள் சொல்லும் முதல் அட்வைஸ் நடங்க.

அதாவது வாக்கிங் போங்க என்பதுதான். உடனே நாமும்
வாக்கிங் கிளம்பிவிடுகிறோம். முன்பைவிட இப்போது
வாக்கிங் போகிறவர்கள் எண்ணிக்கை கூடி விட்டது.

ஆனால் எப்படி வாக்கிங் போவது என்பதில் நிறைய
பேருக்குக் குழப்பம். அந்தக் குழப்பத்தை கேள்விகளாக
மருத்துவர்கள் பலரிடம் கேட்டபோது கிடைத்த பதில்களின்
தொகுப்பு இது:

————————————-
எதற்காக வாக்கிங்?
-
எந்த நோயும் வராமல் உங்களைப் பாதுகாத்துக்
கொள்வதற்குத்தான் வாக்கிங்.
சரியான உடல் உழைப்பு இல்லாவிட்டால் உடல் எடை
அதிகரிக்கும். உடல் எடை கூடக் கூட இதயநோய்கள்
எட்டிப் பார்க்கும். சுகர் (நீரிழிவு நோய்) கூடும். ரத்த அழுத்தம்
(பி.பி) சீரில்லாமல் ஓடும். அவற்றைக் கட்டுப்படுத்த ஒரே வழி
வாக்கிங் போவதுதான்.
-
எப்போது வாக்கிங் போவது நல்லது?
-
அதிகாலைதான் சரியான நேரம். அதுவும் 6.30 மணிக்கு முன்பு
நடப்பது நல்லது. காலையில் முடியாதவர்கள் மாலையில்
போகலாம். ஆனால் சாப்பிட்டு ஒரு மணி நேரமாகியிருக்க
வேண்டும்.
-
எவ்வளவு தூரம் நடக்க வேண்டும்?
-
தூரம் முக்கியமல்ல; எவ்வளவு நேரம் நடக்கிறோம் என்பதுதான்
முக்கியம். குறைந்தது 45 நிமிடங்கள் நடக்க வேண்டும்.
நெஞ்சை நிமிர்த்தியபடி கையை வீசியபடி நடக்க வேண்டும்.
அப்போதுதான் உடல் நன்றாக வியர்க்கும் கலோரிகள் எரியும்.
-
எவ்வளவு வேகமாக நடக்க வேண்டும்?
-
இதுதான் வாக்கிங் போவதில் மிக முக்கியமாக கவனிக்க வேண்டிய
விஷயம்.
உங்கள் காலால் ஒரு நிமிடத்திற்கு 100 முதல் 110 அடி எடுத்து
வைக்க வேண்டும். இந்த 100 அடியும் ஒரே சீராக இருக்க வேண்டும்.
அருகில் நடப்பவர் வேகமாக நடக்கிறார் என்பதற்காக மூச்சுவாங்க
நீங்க வேகத்தைக் கூட்டக்கூடாது.
-
வாக்கிங் போவதற்கு முன்பு தண்ணீர், டீ, காபி சாப்பிடலாமா?
-
டீ, காபி கூடாது. வயிறு முட்ட இல்லாமல், கொஞ்சமாக தண்ணீர்
அருந்தலாம். வாக்கிங் முடித்தவுடன் ஒரு பத்து நிமிடங்கள் உடலை
ஓய்வு எடுக்க விடுங்கள். அதன் பின்னர் இரண்டு டம்ளர் தண்ணீர்
அருந்தலாம். பிறகு அரைமணி நேரம் விட்டு டீயோ, காபியோ
சாப்பிடலாம்.
-
வாக்கிங் செல்ல எந்த இடம் நல்லது?
-
போக்குவரத்து மிகுந்த சாலைகளில் நடக்கக்கூடாது. பூங்கா,
கடற்கரை, விளையாட்டு மைதானம் ஆகியவைதான் நடக்க சிறந்த
இடங்கள்.
-
வாக்கிங்கின் போது எந்த மாதிரி உடைகள் அணிய வேண்டும்?
-
வியர்வையை உறிஞ்சக் கூடிய லூஸான பருத்தி ஆடை தான்
சிறந்தது. டைட் ஜீன்ஸ், டீ ஷர்ட் பயன் தராது.
-
எந்த வயதினர் நடக்கலாம்?
-
இதற்கு வயது வித்தியாசமே இல்லை. நோய் வந்த பின்னர்
நடப்பதைவிட, இளமையிலிருந்தே நடப்பது, நோய்வரும் முன் காக்க
உதவும்.
-
நடக்கும்போது வெறும் காலோடு நடக்கலாமா?
-
வெறும் காலில் நடப்பது தவறில்லை. ஆனால் நடக்கும் இடம் சுத்தமாக
இருக்குமா என்பது சந்தேகமே. அதனால் ஷூ அல்லது செருப்பு
அணிந்து நடப்பது நல்லது. காலணிகளின் அடிப்பாகம் மேடு பள்ளம்
இல்லாமல் சமமாக மென்மையாக இருக்க வேண்டும்.
-
காதில் வாக்மேன், இயர்போன் வைத்துக் கொண்டு பாட்டு கேட்டபடி
நடக்கலாமா?
-
பாட்டுக் கேட்டு நடப்பதால் நடையின் வேகம் குறையும். அல்லது
மாற்றம் ஏற்படும். முடிந்தவரை அதை தவிர்ப்பது நல்லது.
-
கர்ப்பிணிகள் வாக்கிங் போகலாமா?
-
போகலாம். அதற்கு மருத்துவர் ஆலோசனை தேவை.
-
உடன் வருபவர்களுடன் பேசிக் கொண்டே நடக்கலாமா?
-
அந்தப் பேச்சு ஏதாவது மனதை பாதிக்கும் வகையில் அமைந்தால் வாக்கிங்
போவதன் நோக்கமே கெட்டுவிடும் கூடிய மட்டும் தவிர்த்து விடுங்கள்.
-
நேரம் கிடைக்காதவர்கள் வீட்டுக்குள் நடக்கலாமா?
-
வீட்டுக்குள் படி ஏறி இறங்குவது, வீட்டுவேலைகளைச் செய்வது,
வீட்டிற்குள்ளேயே நடப்பது, மார்க்கெட்டுக்கு நடந்த போய்வருவது,
இதெல்லாம் வாக்கிங் ஆகாது. அதை உடல் ஏற்றுக் கொள்ளாது.
காரணம் வீட்டிற்குள் என்னதான் நடந்தாலும் மாற்ற எண்ணங்கள்
உருவாகும். வீட்டுப் பிரச்னைகள் மனதில் எழும். கரண்ட் பில்
கட்டுவது, கிரெடிட் கார்ட் பணம் கட்டுவது இத்யாதி.
-
நாய்களுடன் வாக்கிங் போகலாமா?
-
கூடாது. அது நின்றால் நீங்கள் நிற்க வேண்டும். ஓடினால் ஓடவேண்டும்.
உங்களால் சீராக நடக்க முடியாது. அது வாக்கிங்கே அல்ல.
-
ஜாக்கிங், வாக்கிங் என்ன வித்தியாசம்?
-
ஜாக்கிங் போவதும் நல்ல உடற்பயிற்சிதான். ஆனால் இதயத்தை வெகு
சீக்கிரத்தில் வேகமாக துடிக்க வைக்கும் பயிற்சி அது. ஜாக்கிங் பலருக்கு
சரிப்பட்டு வராது. இதற்கு மருத்துவரின் ஆலோசனை தேவை.
அதேபோல்தான் ட்ரெட் மில்லில் நடப்பதும்.
-
என்ன பயன்?
-
முதலில் உடல் எடை குறையும். இதய நோய், ரத்த அழுத்தம் வராது.
நீரிழிவு நோயைக் கட்டுப்படுத்த முடியும். முதுகுவலி, கழுத்துவலி வரவே
வராது. சிறு வயது முதல் வாக்கிங் போகிறவர்களுக்கு பி.பி. சர்க்கரை
நோய், இதய நோய்கள் அண்டாது.
-
=============================================
- இரா. மணிகண்டன்
நன்றி: குமுதம் செய்திகள்: