மின்னஞ்சல்...

மதியம் முதல் அதிசயமாகப் பொழிந்த பனிச்சாரலுக்கு நடுவிலும், விடாது சென்று விஸ்வரூபம் பார்த்துவிட்டு இப்போதுதான் திரும்பினோம்.

முழுக்க முழுக்க தீவிரவாதிகளைப் பற்றிய படம் இது! அவர்கள் முஸ்லீம்கள் என்பதும் காட்டப்படுகிறது. ஆனால், படத்தின் கதைக்களம் அமெரிக்காவும், ஆஃப்கனிஸ்தானமும். ஒரு காட்சி கூட இந்தியாவில் நடப்பதாக இல்லை.

தேசபக்தி கொண்ட ஒரு இஸ்லாமிய இளைஞனாக[!!] கமல் நடிக்கிறார். மதத்தை இழிவுபடுத்தும் விதமாக எந்தவொரு காட்சியும் இல்லை. ஆனால், மதத்தின் பெயரால் மக்களைக் கொல்லும் தீவிரவாதிகளைத் தோலுரித்திருக்கிறார் படம் முழுவதும்.

பார்க்கப்போனால், [சம்பந்தமே இல்லாமல்,] இந்துக் கடவுள்களையும், பார்ப்பனர்களையும் சீண்டியிருக்கிறார் எனப் பட்டது.

'ஏ பாப்பாத்தி, இந்த சிக்கனை முதல்ல நீ டேஸ்ட் பண்ணு' என ஆண்ட்ரியாவிடம் சொல்வதும்,
'என்னது? உங்க கடவுளுக்கு நாலு கையா? அப்போ எப்படி சிலுவைல அறைவீங்க' என ஒரு அமெரிக்கன் கேட்கும்போது, 'நாங்க கடல்ல முக்கிடுவோம்' என கமல் சொல்வதும்,
'கடவுளே' எனபூஜாகுமார் அலறும்போது, 'கடவுளா? எந்தக் கடவுள்/' எனச் சொல்வதும்

உதாரணமாகச் சொல்லலாம்.!
பார்த்துக் கொண்டிருந்த ரசிகர்கள் பொங்கி எழவில்லை. !

துளிக்கூட இந்திய/ தமிழக வாடையே [வசனங்களைத் தவிர] வீசாத ஒரு ஹாலிவுட் திரில்லர் படம் பார்ப்பதுபோலத்தான் இருந்தது. தரமும் அதே வகையில் என்று உணரும்போது, ஒரு தமிழன் எடுத்த படம் எனப் பெருமையாக இருந்தது! அதே சமயம், நைட் ஷ்யாமளன் இதைப் பல முறை இதை விடவும் திறமையாகச் செய்து காட்டியிருக்கிறார் என்னும் நினைப்பும் வந்தது.

கமலுக்கு வயதாகி விட்டது என்பது இந்தப் படத்தில் நன்றாகவே தெரிகிறது. இனி அவர் தனது பாத்திரப் படைப்பை இன்னும் கவனமாகத் தெரிவுசெய்ய வேண்டும் எனப் பட்டது.

முதல் அரை மணி நேரம் கதையை நகர்த்தி மூலக் கருவுக்குக் கொண்டுசெல்ல சிரமப்பட்டிருக்கிறார். அதையும் சீரியஸாகச் சொன்னதால் கொஞ்சம் போரடித்தது... எனக்கு!
ஆஃப்கனிஸ்தானில் நிகழ்வதாகக் காட்டியவை எத்தனை தமிழக ரசிகர்களுக்கு விளங்குமெனச் சரியாகத் தெரியவில்லை.
ஆனால், அதன் பின்னர், படம் ஜெட் வேகத்தில் பறக்கிறது.

பல ஆண்டுகளாக அமெரிக்காவில் படித்து ஆராய்ச்சிப் பட்டமும் பெற்ற ஒரு பெண் இவ்வளவு ஸ்பஷ்டமாக பிராமண பாஷை பேசுவதாகக் காட்டியது பொருந்தவில்லை. வீட்டில் மட்டுமின்றி, அலுவலகத்திலும் அப்படியே பேசுவது ரொம்பவே ஓவர்..

கமல் ரொம்பவே உழைத்திருக்கிறார். செலவு பண்ணி இருக்கிறார். ஆனால், அதற்கான பிரம்மாண்டம் படத்தில் தெரியவில்லை. முழுக்க முழுக்க வெளிநாட்டிலேயே எடுக்கப்பட்டதால், கொடுத்த வாடகை எகிறியிருக்கும் என ஊகிக்க முடிகிறது.

இந்தப் படத்துக்கு இவ்வளவு சிக்கல் வருமெனத் தெரியும் முன்னரே எழுதப்பட்ட பாடல் வரிகள் கமலின் தன்னம்பிக்கையைப் பறைசாற்றுகின்றன. அதற்கான இசையமைப்பும், பின்னணி இசையும் மிக நன்றாக ஒலித்தன.

ஒளிப்பதிவும், படத் தொகுப்பும் துல்லியம்!

வழக்கமான தமிழ்ப் படம் இல்லை இது! சொல்லப்போனால், இது ஒரு தமிழ்ப் படமே அல்ல! தமிழன் ஒருவரால் திறமையாக எடுக்கப்பட்ட , பார்க்கும்போது போரடிக்காத ஒரு ஆக்ஷன் படம் இது.

மீண்டும் பார்க்கும் ஆசையை எழுப்பவில்லை.

வித்தியாசமாக ஒரு படம் கொடுக்க முயன்று, அதில் வெற்றியும் பெற்றிருக்கிறார் கமல்.

இந்தப் படம் எடுத்ததில் அவருக்குப் பெருமை! தமிழன் எடுத்திருக்கிறார் என நமக்கும் பெருமை! ஆனால்...... இது ஒரு தமிழ்ப் படமாக இல்லையே... தமிழ்க் கலாச்சாரத்தைப் பிரதிபலிக்கும் ஒரு அம்சமும் இல்லையே என உணரும்போது, கொஞ்சம் ஏமாற்றமே!

நான் ஒரு மானுடம் போற்றும் மனிதன் என உணர்ந்திருப்பவர்க்கு இந்தப் படம் வித்தியாசமாகப் படாது. அதே சமயம், நான் தீவிரவாதத்தை [ஏதோ ஒரு வகையில்] ஆதரிக்கும் ஒரு மதவாதி என்பவ‌ர்க்கு இது அப்படித் தோன்றலாம். ஆனால் அதற்கு கமல் பொறுப்பாக மாட்டார். என எண்ணுகிறேன்.

ஒருமுறைமட்டுமே பார்க்கக்கூடிய, [தமிழன் எடுத்த படம் என்பதால்] பார்க்க வேண்டிய ஒரு படம். வெற்றிபெற வாழ்த்துகிறேன்.

[பி.கு.: என் மனைவிக்கு இந்தப் படம் ரொம்பவே பிடித்திருந்தது! பொதுவா, அவங்க நல்லாருக்குன்னு சொன்னா அது நல்ல படமே என நம்பலாம். ])) ]

--
Sincerely,
Sankarkumar