தேவைதான் கண்டுபிடிப்புகளின் தாய் என்றொரு பழமொழி உண்டு. உயிரினங்களுக்கு இயற்கை தேவையின் அடிப்படையில் பலவசதிகளை ஏற்படுத்திக் கொடுத்துள்ளது. ஆயிரக்கணக்கான ஆண்டுகளுக்கு முன் ஆடு, மாடு, மான் போன்ற பாதத்தில் குளம்பு உடைய காட்டு உயிரினங்கள்,தங்களைவிட வலுவான உயிரினங்களிடம் இருந்து பாதுகாத்துக் கொள்ள முடியாத நிலையில் இருந்தன.அவை புல்,இலைதழைகளை மேய்ந்து கொண்டிருந்த பெரும்பாலான நேரத்தில் புலி, சிங்கம் போன்ற பகை விலங்குகளால் தாக்கப்பட்டன. இதன் காரணமாக, அவை உணவு உட்கொள்ளாமல் இருக்க முடியுமா? அதற்கு இயற்கையாகவே ஒரு சிறப்புத் திறன் ஏற்பட்டது.அந்த சிறப்புத் திறன் அசைபோடுதல். ஆடு, மாடுகள் இலைதழைகளை கடித்து மென்று அரைத்துச் சாப்பிடாமல், அவசரஅவசரமாக விழுங்க ஆரம்பித்தன. பிறகு பகை விலங்குகளிடம் சிக்காமல் ஓடிச் சென்று பாதுகாப்பான இடங்களில் இருந்துகொண்டன. பிறகு சாவகாசமாக இருக்கும் நேரத்தில், வயிற்றுக்குச் சென்ற உணவைமீண்டும் வாய்ப்பகுதிக்குக் கொண்டு வந்து நன்கு மென்று, அரைத்து மீண்டும் வயிற்றுக்கு அனுப்பின.அசைபோடும் விலங்குகளின் வயிறு சற்று சிக்கலான அமைப்பு கொண்டது. இவற்றுக்கு முதல் வயிறு (ரூமென்), தேன் அடைப்பை (ரெட்டிகுலம்), ஒமாசம், உண்மையான வயிறு, குடல் என வயிற்றுப் பகுதி அமைந்திருக்கும். ஆடு, மாடுகள் உணவைச் சாப்பிட்டவுடன் இந்த 5 அறைகளிலும் பெரிதாக உள்ள முதல் வயிற்றுக்கு உணவு நேரடியாகச் சென்றுவிடும். அங்கு அந்த உணவு எச்சில் மூலம் ஈரப்பசை பெற்று மென்மை அடைகிறது. பிறகு அது தேன் பைக்குச் சென்று, அங்கு சிறு உருண்டைகளாக ஆக்கப்படுகிறது. திரவப்பகுதி பிரிக்கப்படுகிறது.விலங்கு ஓய்வாக இருக்கும்போது, விழுங்கிய உணவை மீண்டும் வாய்க்குக் கொண்டு வருகிறது.அப்பொழுது உணவை நன்றாக அரைத்து மென்று விழுங்குகிறது. இந்த உணவு மூன்றாவது அறையான ஒமாசத்துக்குச் செல்லும். இங்கு தண்ணீரும்,கனிமச்சத்துகளும் நேரடியாக ரத்தத்தில் கிரகித்துக் கொள்ளப்படுகின்றன. அதன்பிறகு, எஞ்சிய உணவு உண்மையான வயிற்றுக்குச் செல்லும். மனிதர்களைப் போலவே அங்கு உணவு முழுமையாகச் செரிமானம் அடையும். இதற்கு நிறைய நொதிகளும், பாக்டீரியாக்களும் உதவுகின்றன. செரிக்கப்பட்ட இந்த உணவு குடலுக்குச் செல்லும்போது ஊட்டச்சத்துகளும், குளுகோசும் கிரகித்துக் கொள்ளப்படுகின்றன.இந்த அசைபோடும் பழங்கால உயிரினங்களில் இருந்தே இன்றைய அசைபோடும் உயிரினங்கள் தோன்றின. பெரும்பாலான மாட்டு இன விலங்குகள் இப்படிப்பட்டவை. நமது வீட்டில், ஊரில் உள்ள மாடுகளுக்கு இன்றைக்கு பகை விலங்கு கிடையாது. ஆனால், பாரம்பரிய பழக்கம் காரணமாக அவை அசைபோடும் பழக்கத்தைக் கொண்டிருக்கின்றன. ஆடு, ஒட்டகம், மான் வகைகளிலும் இந்தப் பழக்கம் உண்டு. ஒட்டகங்களுக்கு மட்டும் ஒமாசம் என்ற மூன்றாவது அறை கிடையாது.இந்த அசைபோடும் வித்தியாசமான பழக்கம் போலவே, பசுக்களுக்கு மேல் தாடையில் பற்களுக்கு பதிலாக, ஈறு, பலமான அட்டை போல இருக்கும். இந்த அட்டை மீது புல் ஒட்டிக்கொள்ள, கீழ்த்தாடையில் உள்ள பற்கள் மூலம் பசு அதை நன்றாக அரைக்கிறது. புல்லை துண்டுதுண்டாக ஆக்குவதற்கு பசுக்கள் தங்கள் தாடைகளை பக்கவாட்டில் அசைக்கின்றனவாம். சந்தேகமாக இருந்தால், ஏதாவது மாட்டை சற்று தொலைவில் இருந்து உன்னிப்பாக கவனித்துப் பாருங்களேன்.