கடமையைச் செய்யுமா மத்திய அரசு?!

காவிரி நடுவர் மன்றத்தின் இறுதித் தீர்ப்பு, மத்திய அரசிதழில் வெளியிடப்பட்டுவிட்டதை வைத்தே... ஏதோ காவிரி பிரச்னைக்கு தீர்வு கிடைத்துவிட்டது போல இங்கே கொண்டாட்டங்கள் சூடுபிடித்துள்ளன. உண்மையில், 'அந்தத் தீர்ப்பின் முக்கிய அத்தியாயமே, காவிரி மேலாண்மை வாரியம்' என்பதுதான்.

'காவிரியின் குறுக்கே மற்றும் அதன் நீர்வரத்துப் பகுதிகளில் இருக்கும் அனைத்து அணைகளையும் தனி அதிகாரம் படைத்த இந்த வாரியத்திடம் ஒப்படைத்துவிட வேண்டும். இந்த வாரியம், மழை அளவு, அணைகளின் நீர் இருப்பு ஆகியவற்றைக் கணக்கிட்டு, இறுதித் தீர்ப்பின் அம்சங்களையும் கணக்கிட்டு சரியான அளவில் பகிர்ந்தளிக்கும்' எனபது தீர்ப்பு. இப்படி ஒரு வாரியம் அமைக்கப்படும் வரை, தமிழகத்தைப் பொறுத்தவரை காவிரி நீர்... கானல் நீர்தான்!

ஏற்கெனவே, அரசிதழில் வெளியிட வைப்பதற்கே... ஆயிரத்தெட்டு முறை உச்ச நீதிமன்றத்துக்கு காவடி எடுக்க வேண்டியிருந்தது. உச்ச நீதிமன்றம்கூட, இரண்டு தடவைகள் கடுமையாக எச்சரிக்கை செய்த பிறகே, அரசிதழில் வெளியிட மத்திய அரசு ஒப்புக் கொண்டது. ஆனால், வாரியம் அமைக்கும் விஷயம் அத்தனை சுலபமாக இருக்காது என்றே தோன்றுகிறது. 'இப்போதைக்கு அதைப் பற்றி பேச்சே இல்லை' என்று வெளிப்படையாகவே கூறியிருக்கிறார் மத்திய நீர்வளத் துறை அமைச்சர்.

இந்நிலையில், காவிரி விவகாரம் உச்ச நீதிமன்றத்தில் நேற்று மீண்டும் விசாரணைக்கு வந்தபோது... தமிழகத்தின் சார்பில் ஆஜரான மூத்த வழக்குரைஞர் சி.எஸ். வைத்தியநாதன், ''இறுதித் தீர்ப்பு அரசிதழில் வெளியிடப்பட்டுள்ளது. ஆனால் காவிரி நீர் மேலாண்மை வாரியத்தை மத்திய அரசு எப்போது அமைக்கும் என்று தெரியவில்லை’’ என்று குறிப்பிட்டார்.

அப்போது... ''மேலாண்மை வாரியத்தை அமைப்பது மத்திய அரசின் கடமை’’ என்று நீதிபதி ஆர்.எம். லோதா கூறியிருக்கிறார்.
கடமையைச் செய்யுமா மத்திய அரசு!
[You must be registered and logged in to see this image.]