புத்தர் வந்திருக்கிறார்!’

by **கணபதி** Mon Mar 04, 2013 3:53 pm

ஊர்முழுவதும் ஒரே பரபரப்பு. ‘புத்தர் வந்திருக்கிறார்!’

அந்த ஊரில் ஒரு விவசாயி. அவனுக்குப் புத்தரைப் பற்றி எதுவும் தெரியாது. ஆனால் எல்லோரும் பேசிக்கொள்வதை வைத்து அவர் பெரிய மகானாக இருக்கவேண்டும் என்று ஊகித்தான். அவரை நேரில் பார்க்கவேண்டும் என்று ஆசைப்பட்டான்.

ஆனால் புத்தர் எங்கே இருக்கிறார்? அவரை எப்படித் தரிசிப்பது? விசாரித்தான்.

‘நம்முடைய ஊர் எல்லையில் ஒரு காட்டாறு ஓடுகிறதில்லையா? அந்த ஆற்றின் மறுகரையில்தான் புத்தர் இருக்கிறார்!’

விவசாயி நடுங்கிப்போனான். அந்தக் காட்டாற்றின் முரட்டுத்தனமான வெள்ளம் எப்பேர்ப்பட்ட பலசாலியையும் உருட்டிப் புரட்டி விழுங்கிவிடக்கூடியது. அதைத் தாண்டி புத்தரைச் சந்திப்பது எப்படி?

அவனுடைய தவிப்பைப் பார்த்த யாரோ கிண்டலாகச் சொன்னார்கள். ‘உனக்குதான் புத்தரைப் பார்க்கணும்னு ரொம்ப ஆசை இருக்கே. நீ நினைச்சா தண்ணிமேலயே நடந்து போகலாம்!’

அவர்கள் சொல்லி முடித்ததுதான் தாமதம். அந்த விவசாயி பரபரவென்று காட்டாற்றை நோக்கி ஓட ஆரம்பித்தான். தண்ணீரின்மீது நடந்து சென்று புத்தரைத் தரிசித்துவிட்டான்.

எல்லோரும் அசந்துபோனார்கள். படிப்பறிவில்லாத இந்தக் காட்டான் தண்ணீரின்மீது நடந்தது எப்படி? அவன் என்ன மந்திரவாதியா?

புத்தர் சொன்னார். ‘இது மாயமோ மந்திரமோ இல்லை. நம்பிக்கைமட்டும் இருந்துவிட்டால் எதுவும் சாத்தியமே.’

சீன மொழியில் எழுதப்பட்ட ’ஃபா க்யு பி யு கிங்’ என்ற புனித நூலில் வரும் கதை இது. நீங்கள் எதை நம்புகிறீர்கள்? எந்த அளவு நம்புகிறீர்கள்? அந்த நம்பிக்கைக்காக முரட்டுக் காட்டாற்றின்மீது நடக்கத் துணிவீர்களா? ஒருவேளை நீங்கள் துணிந்தாலும், ‘விழுந்து மூழ்கிவிடுவோமோ’ என்கிற பயம் உங்களை விடுமா? விட்டால், உண்டு வெற்றி.
[You must be registered and logged in to see this image.]