பூசணிக்காயை விடப் பெரிய சைஸில் இரும்பினால் ஆன உருண்டை இருப்பதாக வைத்துக்கொள்வோம். அந்த இரும்புக் குண்டு தன் பாட்டுக்கு ஒரு மூலையில் கிடக்கும். ஆனால் அதுவே புளூட்டோனியம் என்ற உலோகத்தால் ஆன உருண்டையாக இருந்தால் அதுதான் அணுகுண்டு.

ஆனால் ஒரு முக்கிய விஷயம். இந்தியா மற்றும் வல்லரசு நாடுகளைத் தவிர வேறு யாராலும் புளூட்டோனியத்தை உற்பத்தி செய்ய முடியாது. தவிர, புளூட்டோனியத்தை அப்படி உருண்டையாக உருட்டி வைத்த அடுத்த கணமே அது வெடித்து விடும். ஆகவே அதை அந்த வடிவில் வைக்க முற்படமாட்டார்கள்.

யுரேனியம் என்ற உலோகம் உள்ளது. யுரேனியக் கட்டி ஒன்றில் யுரேனியம்-238 அணுக்கள் என்று, யுரேனியம்-235 அணுக்கள் என்றும் இரண்டு வகை அணுக்கள் உள்ளன. யுரேனியத்திலிருந்து மிகச் சிரமமான முறையில் யுரேனியம்-235 அணுக்களை மட்டும் தனியே திரட்டி அதைக் கொண்டு பெரிய உருண்டை செய்தால் அதுவும் அணுகுண்டுதான்.

யுரேனியம்-235 ஆகட்டும், புளூட்டோனியம் ஆகட்டும், அவற்றை குறிப்பிட்ட சைஸுக்கு உருண்டையாகத் தயாரித்தால் அணுகுண்டாக வெடிப்பதற்குக் காரணம் உண்டு. இந்த இரண்டுமே கதிரியக்கத்தை வெளிப்படுத்துகிற பொருட்கள், தவிர, இவற்றின் அணுக்களை நோக்கி நியூட்ரானை செலுத்தினால் இவை பிளவுபடும்.

உதாரணமாக புளூட்டோனிய அணு ஒன்றின் மீது நியூட்ரான் மோதினால் அந்த அணு பிளவுபடும் போது அந்த அணுவிலிருந்து உபரியாக நியூட்ரான்கள் வெளிப்படும். அந்த நியூட்ரான்கள் அருகில் உள்ள இதர நியூட்ரான்களைத் தாக்கும். அப்போது மேலும் நியூட்ரான்கள் வெளிப்பட்டு அவையும் பிற புளூட்டோனிய அணுக்களைத் தாக்கும். இதுவே தொடர் அணுப்பிளப்பு ஆகும். இப்படி ஒரு கணத்துக்குள் கோடானு கோடி புளூட்டோனிய அணுக்கள் தொடர்ந்து பிளவுபடும். இதன் விளைவாக பிரும்மாண்டமான சக்தி வெளிப்படும். இது தான் அணுகுண்டு வெடிப்பு.

அணுகுண்டு ஒன்று வெடிக்கும் போது பயங்கரமான அளவுக்கு வெப்பம் உண்டாகும். கடும் அதிர்ச்சி அலைகள் தோன்றும். உடலைப் பாதிக்கிற ஆபத்தான கதிர்வீச்சு வெளிப்படும்.

யுரேனியம்-233 என்ற அணுக்களைத் தனியே பிரித்தும் அணுகுண்டு செய்ய முடியும். ஆனால் இவ்வித அணுகுண்டுகளை சேமித்து வைப்பதில் பிரச்சினை உள்ளது.

யுரேனியம், புளூட்டோனியம் ஆகிய இரு உலோகங்களையும் மிக சுத்தமான அளவுக்குத் தயாரித்து குறிப்பிட்ட அளவுள்ள உருண்டையாக ஆக்கினால் அவை வெடித்து விடும் என்பதால் அவற்றை சிறு சிறு துண்டுகளாகத் தயாரிக்கிறார்கள். அணுகுண்டு ஒன்றினுள் இந்த சிறு துண்டுகள் பொருத்தப்பட்டு அணுகுண்டாக வெடிக்க வேண்டிய கட்டத்தில் இந்த துண்டுகள் ஒன்றுசேர்ந்து முழு உருண்டையாகும்படி செய்கிறார்கள். அணுகுண்டு ஒன்றினுள் இதற்கான ஏற்பாடு இருக்கும். முழு உருண்டையாக வடிவம் பெறும்படி செய்வதற்கான சாதனம் அணுகுண்டுக்குள் பொருத்தப்படாதவரையில் அணுகுண்டினால் ஆபத்து இல்லை.

கடந்த காலத்தில் பல தடவை அமெரிக்க ராணுவ விமானங்களிலிருந்து தற்செயலாக அணுகுண்டுகள் கீழே கடலில் விழுந்த போது அவை வெடிக்காததற்கு இதுவே காரணம்.

வீடுகளில் பயன்படுத்தப்படுகிற காஸ் சிலிண்டர் தீப்பற்றினால் ஒரேயடியாக வெடிக்கிறது. அப்படி இன்றி அடுப்புக்கு சமையல் காஸ் கட்டுப்படுத்தப்பட்ட அளவில் சீராக வெளிவரும்போது பிரச்சினை கிடையாது. அது போலவே அணுமின்சார நிலையங்களில் இவ்விதம் கட்டுப்படுத்தப்பட்ட அளவில் தொடர் அணுப்பிளப்பு நிகழ்வதால் மின்சாரத்தை உற்பத்தி செய்ய முடிகிறது. அந்த வகையில் அணுசக்தி ஆக்கப் பணிகளுக்கும் பயனாகிறது.

பொதுவில் - குறிப்பாக இந்தியாவில் - அணுமின்சார நிலையங்களில் சாதாரண யுரேனியம் எரிபொருளாகப் பயன்படுத்தப்படுகிறது. இவ்வித அணுமின் நிலையங்களில் ஓரளவு எரிந்து தீர்ந்த யுரேனியத்திலிருந்து விசேஷ முறைகள் மூலம் அணுகுண்டு தயாரிப்புக்கான புளூட்டோனியத்தைப் பெற இயலும்.