இறைவன் இருக்கிறான்

by **Ponmudi Manohar** Mon Apr 01, 2013 8:19 pm

இறைவன் இருக்கிறான்

உயர் கோபுர வாசலுக்குள்

மகா சந்நிதானம்

அழகுற அமைந்திருக்கும்

ஆராதனை கூடம்

பக்தி பரவசமாகும்

சக்தியுள்ள கீதங்கள்

ஆண்டவன் கருணை வேண்டி

அன்றாடம் கேட்கும்

ஆங்கே ஒரு காணிக்கை பெட்டி

அமைந்திடக் காண்பீர்.

கறுப்பென்றாலும்,வெளுப்பென்றாலும்

விருப்போடோ, வெறுப்போடோ

அறிந்தோ அறியாமலோ

போடுகிறார் காணிக்கை

சிலரும் பலருமாய்

நன்றியோடும்,

பெருமனதோடும்,

எதிர்பார்ப்போடும்.

ஆலயம் எவருக்கும் சமமே

பொது நியதிதான் சமயத்தில் மாறுமே

இருப்போருக்கோ சகலமும்

இளைத்தோருக்கோ அவலமே

ஒன்றை மறந்து

பலதை இழக்கும்

மன இயல்பை என்னவென்பேன்?

அன்றாடம் காண்கிறீர்

ஆண்டவனின் காணிக்கைப் பெட்டிகள்

ஏழைகளின் கைகளாக.

எங்கும் பரம தரிசனங்களே

நமக்கோ

பாராமுகங்களே.....

கொஞ்சம் நிதானமாகு

எளியவனை இதமாக்கு

அவனே நீ தேடும் இறைவனாக

உன்னருகிலே இருக்கலாம்..