அன்னையர் தினம்....

by **udhayam72** Mon May 13, 2013 12:43 pm

அன்னையர் தினம்

இன்று (13/05/2013) இங்கிலாந்தில் அன்னையர் தினம் கொண்டாடப்படுகிறது.

முதன் முதலில் அன்னையருக்காக ஒரு நாளை ஒதுக்கி வைத்து மரியாதை கொடுத்த பெருமை இங்கிலாந்தையே சேரும்.
அன்னையர் தினம், இங்கிலாந்தின் சமூகப் பண்பாட்டு, காலாச்சார முக்கியத்துவமடையதாகும். இங்கிலாந்தில் பல நூற்றாண்டுகளாக அன்னையர் தினம் கொண்டாடப்படுகிறது.

பண்டைய கால இங்கிலாந்திலே இளவயதுச் சிறுவர்கள் குடும்பங்களைப் பிரிந்து பல மைல்கள் சென்று அந்த நாளைய "வேலை வீடுகள்" ( work house) எனப்படும் அமைப்புக்களில் பணிபுரிவது வழக்கமாம். அப்போது அவர்கள் தங்களுடைய பிறந்த இடத்தை விட்டுப்ப்ரிவது இயற்கையே. பிறந்த இடத்தில் இருக்கும் சார்ச், அன்னை சார்ச் என்றும், அவர்கள் வாழும் இடத்தை அண்மித்த சார்ச் "மகள் சார்ச்" என்றும் அழைக்கப்படுமாம். இத்தகைய சூழ்நிலையில் அவர்களது "அன்னை சார்ச்" இல் சென்று பிரார்த்திக்க வருடத்தில் ஒருநாள் விடுமுறை அளிப்பார்களாம். அந்த நாளிலே அவர்கள் தமது "அன்னை சார்ச்" க்கு போகும் சாக்கில் தமது அன்னையரைப் பார்த்துப் பரிசுப் பொருட்கள் கொடுத்து மகிழ்வார்களாம். அவர்கள் போகும் வழியில் காணும் அழகான மலர்களைப் பறித்து ஒரு பூக்கொத்தாக்கி தமது அன்னையருக்குக் கொடுப்பார்களாம். இந்த ஞாயிறு, கிறிஸ்தவர்களுடைய " லென்ற் " எனப்படும் காலத்தில் நான்காவது ஞாயிறு வருவது வழக்கமாயிற்று . அதுவே இந்த நவீன கால " அன்னையர் ஞாயிறு" என்றும், "அன்னையர் தினம்" என்றும் கொண்டாடப்படுகிறது.

அனைத்து மனிதர்கள் வாழ்க்கையிலும், தாய் என்பவள் முக்கிய பங்காற்றுபவளாக இருக்கிறாள். நம்மை பெற்றதில் இருந்து பாராட்டி, சீராட்டி பாதுகாத்து வளர்ப்பவள் நம் அன்னை. தன் வயிற்றில் பிறந்தவர்கள் நன்கு படித்து, நல்ல பழக்க வழக்கங்களைப் பெற்று வாழ்வில் சிறந்திட தனது சக்திக்கும் மீறி உழைப்பவள் அன்னை. பள்ளிக்கு அனுப்புவது முதல் அவர்கள் வளர்ந்து ஆளாகும் வரை அன்பு காட்டி அரவணைத்து வளர்ப்பவள் அன்னை. அதன் பின்னரும் என்றென்றும் மாறாத அன்பும் கொண்டிருப்பவளே தாய் எனப்படுபவள்.

தாய்மையின் புனிததுவம், தாய்மையின் பெருமை, தாய்மையின் தியாகம் இதற்கு உலகில் ஈடே கிடையாது, இந்தத் தனித்தன்மையைக் கொண்டாடுவதற்கு ஒரு குறிப்பிட்ட நாளைத் தெரிவு செய்து, தலை வணங்குவது எந்த விகிதத்திலும் தவறாகாது. அன்னையர் தினத்தைக் கொண்டாடுவோம் ஆனால் அன்னையரை நினைப்பது அந்தத் தினம் மட்டுமே எனும் எண்ணம் மனதில் ஓங்காதிருக்க முயலுவோம்.