கவியரசு என்றால் கண்ணதாசன் ! கவிஞர் இரா .இரவி .

by **eraeravi** Mon Jun 24, 2013 10:13 am

கவியரசு என்றால் கண்ணதாசன் ! கவிஞர் இரா .இரவி .

கவியரசு என்றால் கண்ணதாசன் !
கண்ணதாசன் என்றால் கவியரசு !

"ஆறு மனமே ஆறு " பாடலின் மூலம்
ஆறுதல் வழங்கிய கவியரசு நீ !

"வெற்றி பெற்ற மனிதரெல்லாம் " பாடலில்
தோற்றவருக்குத் தெம்பு தந்தவன் நீ !

"நான் மலரோடு தனியாக" பாடலில்
நல்ல காதலை சுகமாக வடித்தவன் நீ !

"மலர்களைப்  போல் தங்கை" பாடலுக்கு
மயங்காத உள்ளம் இல்லை உலகில் !

"போனால் போகட்டும் போடா "பாட்டில்
புத்திப்புகட்டும் நிலையாமையைப் பாடினாய் !

"நான் சார்ந்த மதம் தாமதம் "என்று சொல்லி
நீ தாமதத்தையும் நகைச்சுவையாக்கியவன் !

சித்தர்கள்  பாடல்களை எளிமைப் படுத்தி
சித்திரமாய் திரையில் தீட்டித் தந்தவன் நீ !

வாழ்வியல் கருத்துக்களை பாடல்களில்
வற்றாத ஜீவ நதியாக வார்த்தவன் நீ !

காதலின் வேதனையை பாட்டில்
கடவுளோடு ஒப்பிட்டுப் பாடியவன் நீ !

ஆங்கில இலக்கியம் படிக்காத   நீ

ஆங்கில இலக்கியம் வென்றாய் பாட்டில் !

சங்க இலக்கியத்தை  திரைப்பாடலில் வைத்தாய்
சாமானியருக்கும் புரிந்திட பாடல் படைத்தாய் !

கம்ப இராமாயண கருத்துக்களையும்
கனிச்சாறாக பாட்டில் பிழிந்தவன் நீ !

"படைப்பதனால் என் பெயர் இறைவன்" என்று
படைத்தாய் இறவாத பாடல்களை நீ !

எந்த நிலையிலும் மரணமில்லை என்று பாடி
இன்றும் எங்கள் மனங்களில் வாழ்கிறாய் நீ !

உனக்குப் பின் பாட்டெழுத யார் யாரோ வந்தனர்
உன் இடத்தை யாருமே எட்ட வில்லை !

கவியரசு என்றால் கண்ணதாசன் !
கண்ணதாசன் என்றால் கவியரசு !
.