எழுச்சியை எழுத இடமில்லை! - மணி அமுதவன்

by **அ.இராமநாதன்** Tue Apr 22, 2014 6:51 pm

நடு சாலையில் என்னிடத்தில் ஒரு கவிஞன் பாடல் எழுத வாய்ப்புக் கேட்டார். நான் கொடுத்த மெட்டுக்கு ஆகச்சிறந்த வரிகளைக் கொண்டு பாடல் எழுதினார். அப்படிப்பட்ட திறமையாளனை அந்தச் சாலையில் தவறவிடாமல் இருந்ததே எனது இந்த ஆண்டின் மகிழ்ச்சி ஒரு நேர்காணலில் இசையமைப்பாளர் சத்யா இப்படிச் சொன்னார். அவர் குறிப்பிட்ட அந்தக் கவிஞனின் பெயர் மணி அமுதவன். "நெடுஞ்சாலை' படத்தில் "இஞ்சாதே இஞ்சாதே... காதல் இஞ்சாதே', "வைகை நதிக்காத்தே', மற்றும் "கோலி சோடா' படத்தில் "கோயம்பேடு மார்க்கெட்டுல வந்து பாரு நீ' என்று அனைத்துத் தரப்பையும் ரசிக்க வைக்கும் வார்த்தை நேர்த்திகளோடு தமது பாடல்களைக் கட்டமைப்பவர் மணி அமுதவன். 27 வயதே ஆன இளம் பாடலாசிரியர். அவரிடம் நமது நேர்காணல்...

பெரும்பான்மையோர் தேர்ந்தெடுக்காத பாடலாசிரியர் துறையை நீங்கள் எப்படித் தேர்ந்தெடுத்தீர்கள்?
-
பாட்டு என்பது வெறும் பாட்டு மட்டுமல்ல. அதற்குள் ஓராயிரம் உணர்வுகள் புதைந்துக் கிடக்கின்றன. திருச்சிதான் எனக்குச் சொந்த ஊர். சிறு வயதிலேயே அப்பா இறந்துவிட்டதால் அம்மாவின் அரவணைப்பில் தான் வளர்ந்தேன். அப்பா இல்லாத சோகம் எனக்குள் தனிமையை உணர்த்தியது. அந்தத் தனிமையைப் போக்க பாடல்களை எனக்காக துணையாக்கிக் கொண்டேன். பாடல்களைக் கேட்பதோடு மட்டுமின்றி நானே சொந்த வரி அமைத்துப் பாடி பள்ளி நாட்களில் கைத்தட்டுகளும் வாங்கியிருக்கிறேன். இப்படியாகப் பாடல் மீது எனக்கு ஏற்பட்ட ஈர்ப்புதான் பாடலாசிரியர் துறையைத் தேர்ந்தெடுக்க வைத்தது.

உங்களது பாடலுக்கான விதை எங்கிருந்து விழுகிறது?
-
ஆத்மார்த்தமாக எழுதப்படும் பாடல் வரிகள் தான் தீட்டப்பட்ட ஓவியங்களைப் போல் ரசிக்கத் தகுந்த விதத்தில் இருக்ம். எந்தப் பாடலை எழுதினாலும் அதற்குள் ஒரு இலக்கிய நயம், சமூகப் பொறுப்புணர்வு இருக்க வேண்டும் என்கிற எனது சிந்தனையே எனது பாடலுக்கான விதை.

தரமான திரைப்படங்களுக்குப் பாடல் தேவையற்றது என்கிறது சினிமா ஆர்வலர்களின் விமர்சனம் பற்றி...
-
பாலசந்தர் இயக்கிய அபூர்வ ராகங்கள் படத்துக்கு முடிவு அமையப் பெறாமல் இருந்தது. அப்படிப் பட்ட இக்கட்டான சூழலில் "கேள்வியின் நாயகனே எந்தன் கேள்விக்கு பதில் ஏதய்யா?' என கண்ணதாசன் தம் பாடல் வரிகளின் கூர்மை மூலம் அப்படத்துக்கு ஒரு முடிவினை வகுத்தார். நமது தமிழ் பாரம்பர்யத்தின் அடிப்படையோடு ஒப்பிடுகையில் நமது திரைப்படங்களுக்குப் பாடல்கள் அவசியமே.

இன்னதை எழுதக்கூடாது என்கிற வரையறை ஏதேனும் வகுத்திருக்கிறீர்களா?
-
ஒரு படைப்பு சமூகத்துக்கான மாற்றத்தின் விதையை விதைக்காவிட்டாலும் சீர்கேட்டின் தொடக்கப் புள்ளியாய் இருந்து விடக்கூடாது என்பதில் நான் கவனமாய் இருக்கிறேன். முடிந்தவரை எனது எழுத்து என்பது ஒரு பார்வையாளனிடத்தில் சிறு சலனத்தையாவது ஏற்படுத்த வேண்டும் என்று நினைக்கிறேன். அதற்கு நேர்மாறான எண்ணத்தை வலியுறுத்தும் பாடல்களை என் வாழ்வில் எழுதக்கூடாது என்பதை என் கொள்கையாக வைத்திருக்கிறேன்.

எழுச்சிப் பாடலாசிரியர் பட்டுக்கோட்டை, தத்துவப் பாடலாசிரியர் கண்ணதாசன் ஆகியோர் விட்டுச் சென்ற இடம் இன்னும் வெற்றிடமாகவே உள்ளதே?
-
பட்டுக்கோட்டை பாடல்களில் தெரியும் முற்போக்கும், சமூக எழுச்சியும், கண்ணதாசன் பாடல்களில் காணப்படும் தத்துவ வரிகளும் எழுதுவதற்கு அன்றைய தமிழ் சினிமா சூழலில் களம் இருந்தது. இன்று பாடலாசிரியனுக்குத் தீனி போடும்படியான கதைக்களங்கள் எவையும் இல்லை என்பதே உண்மை. நகைச்சுவைப் படங்கள் மட்டுமே பெருமளவில் வந்து கொண்டிருக்கும் இச்சூழலில் அதில் எங்கு எழுச்சியை எழுத முடியும்.

பொருளாதார அடிப்படையில் பாடலாசிரியர்களின் நிலை எப்படி?
-
நிச்சயம் பின்தங்கிதான் உள்ளது. ஒரு பாடலைப் பாடும் பாடகருக்குப் பாடி முடித்த உடனே பணம் வழங்கப்படுகிறது. அந்தப் பாடலை அவர் வேறு பல இடங்களில் பாடியும் பணம் பெறுவார். ஆனால் அதை எழுதிய பாடலாசிரியருக்கு உடனே பணம் கிடைப்பதில்லை என்பதை என் ஆதங்கமாகப் பதிவு செய்கிறேன்.
-
-----------------------
- கி.ச. திலீபன்
நன்றி: கல்கி

பகிர்வுக்கு நன்றி ஐயா

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

எழுச்சியை எழுத இடமில்லை! - மணி அமுதவன்

எழுச்சியை எழுத இடமில்லை! - மணி அமுதவன்

Re: எழுச்சியை எழுத இடமில்லை! - மணி அமுதவன்