தனிமையும் அமைதியும் சிறந்த சிந்தனைத் தூண்டிகள்

by **ranhasan** Tue May 06, 2014 5:42 pm

அன்பு உறவுகளுக்கு வணக்கம்...

தலைப்பின்கண் எனது கருத்துக்களை பின் வரிகளில் விவரிக்கிறேன்.

தனிமை:

இதனை சிலர் தேடுகின்றனர் சிலர் விரட்டுகின்றனர்... ஆனால் தனிமை எப்போதும் இவர்களை பெரிதுகொள்வதில்லை... தனிமைக்கும் துணையுண்டு நம்மோடு, நம் எண்ணங்களோடு... நீங்கள் தனித்திருக்கும் ஒவ்வொரு கணத்திலும் உங்கள் சிந்தையில் தோன்றும் ஒவ்வொன்றும் உங்கள் தனிமைக்கு துணையே... தனிமை உங்களை உங்களோடு பேச வைக்கிறது, உங்களை உங்களோடு உறவ வைக்கிறது, உங்களை உங்களோடு உணர வைக்கிறது... தன்னிலை அறிதல் எனும் மனோவியலின் அர்த்தத்தை உணர்த்துகிறது... முடிவுகளை தீர்மானிக்கிறது... சில நேரம் வாழ்க்கையின் முடிவையும் தீர்மானிகிறது... எனவே தனிமை என்பது நிர்பந்தமான ஒன்று, வாழ்வில் கட்டாயம் தவிர்க்கமுடியாத ஒன்று. உங்கள் தாய், தந்தை, மனைவி, மக்கள், நண்பர்கள், உறவுகள் அனைவரிடத்தும் ஒரு பொழுதேனும் விலகி நின்று தனிமையை அனுபவிக்கும் தருணம் ஒவ்வொருவர் வாழ்விலும் வந்தே தீரும்... அத்தனிமையை அனுமதியுங்கள், அதன் வலிமையை உணருங்கள், அதனிடத்து கற்றுக்கொள்ளுங்கள்...

அமைதி:

இதற்கான நிரந்தர இடத்தை கோவில்களிடத்தும், ஆன்மீக குருமார்களிடத்தும், கடவுளிடத்தும், மருத்துவரிடத்தும், மருந்துகளிடத்தும், தியான பீடங்களிடத்தும், போதையினிடத்தும் பலர் தேடுகின்றனர்... ஆனால் இது எங்குதான் இருக்கிறது? கோயிலிலும், மருத்துவமனையிலும், நூலகத்திலும் இருப்பதுதான் அமைதியா? இல்லை அவை கட்டுப்பாட்டின் கீழ் கட்டுப்படுதலின் கீழ் வரும் அமைதியான சூழல். பிறகு அமைதி எங்கிருக்கிறது? எங்கும் இருக்கிறது என்பதே உண்மை. ஒரு கேத வீட்டில் ஒவ்வொருவர் மனதிலும் ஆயிரம் எண்ண ஓட்டங்கள் நிலவினாலும், வாய்விட்டு கதறி அழும் ஓலங்கள் உச்சமாய் கேட்கும் நிலையிலும் மனதில் ஒரு நிசப்தம் நிலவுவதே அமைதி, அதற்கான காரணம் அங்கு எண்ணங்கள் ஒருங்கிணைக்கப்பட்டு இறந்தவரின் நினைவுகள் அசை போடப்படுகின்றன... ஒரு தேர்வு எழுதும் தருவாயில் மனதின் பதபதைப்பினால் கைகள் நடுங்க சிந்தனை சிதற படபடக்கும் நேரத்தில் உங்கள் மனதோடு நீங்கள் பேசி பெரு மூச்சு விட்டு உங்களை நீங்களே ஆசுவாசப்படுத்திக் கொள்வதுதான் அமைதி... எனவே அமைதி என்பது உங்கள் மனதை உங்கள் விருப்பத்தில் உங்களுக்கு இணங்க வைத்தல்...

தனிமைக்கும் அமைதிக்கும் இடையேயான உறவு தலைவனுக்கும் தலைவிக்கும் இடையிலான உறவைப் போன்றது. அதில் ஊடல், கூடல், தேடல், நிறைவு, காதல், ஏமாற்றம் என அனைத்தும் உண்டு... அனைத்திலும் முதன்மையாய் பிரதானிப்பது சிந்தனை...

ஆகையால் தனிமையையும், அமைதியையும் வெளியில் தேடாமல் அதனை உங்களுக்குள் அவதானித்து உங்கள் சிந்தனையை தூண்டுங்கள். ஒவ்வொரு சித்தாந்தமும், தத்துவமும், கவியும், கண்டுபிடிப்பும் தனிமைக்கும் அமைதிக்கும் பிறந்த குழந்தைகளே...

இந்தப் பதிவு குறித்து உறவுகளின் கருத்துக்களையும் ஏற்க விரும்புகிறேன்...