நாடு, நல்ல நாடு!

by **அ.இராமநாதன்** Sun Jun 08, 2014 8:50 am

பண்டைப் புகழும் பாரம்பரியப்

பண்புகள் மிக்கதும் இந்நாடே அற்பச்

சண்டையில் எங்கள் அண்டை வீட்டவர்

மண்டை உடைவதும் இந்நாடே!

எல்லா வகையிலும் வல்லோர் எங்களை

ஏளனம் செய்வதும் இந்நாடே! வெறும்

செல்லாக் காசென மனிதப் பண்புகள்

சிரிப்பாய்ச் சிரிப்பதும் இந்நாடே!

வற்றா நதிகளும் வண்டல் பூமியும்

வளம் கொழிப்பதும் இந்நாடே! தினம்

பற்றாக் குறைகளும் பட்டினிச் சாவும்

பரம்பரை யாவதும் இந்நாடே!

வேலைப் பளுவால் மாதச் சம்பளர்

வெந்து கிடப்பதும் இந்நாடே! சிலர்

வேலை கிடைத்ததும் ஏழை எளியவரை

விரட்டிப் பிடுங்குவதும் இந்நாடே!

அங்கே வெள்ளமும் இங்கே வறட்சியும்

அவதிப் படுவதும் இந்நாடே! தினம்

கங்கா காவிரித் திட்டம் பற்றிய

காலட்சேபமும் இந்நாடே!

விடுதலைப் போரில் வேற்றுமைக் கெதிராய்

வீரம் தெறித்ததும் இந்நாடே! இன்று

அடுதலும் கெடுதலும் 'ஆண்டவ’ராலே

ஆல்போல் தழைப்பதும் இந்நாடே!

புத்தன் ஏசு காந்திய வழியார்

போதனை செய்வதும் இந்நாடே! மத

ரத்தக் களறியும் சாதிக் கொடுமையும்

நித்தம் நடப்பதும் இந்நாடே!

இகம்பர சுகம்பெற எண்ணற்ற முனிவோர்

எழுந்தருள் செய்ததும் இந்நாடே! தினம்

திகம்பர முனிபோல் எங்கள் குழந்தைகள்

தெருவில் அலைவதும் இந்நாடே!

சீற்றம் கொண்டவர் அவசரமாகச்

சிதறிப் போவதும் இந்நாடே! ஒருகை

சோற்றுக் காகவே ஓட்டும் போடுகிற

சுதந்திர நாடும் இந்நாடே!

சுதந்திரம் வந்ததும் சொர்க்கம் வருமென

சொல்லித் திரிந்ததும் இந்நாடே! அட்டத்

தரித்திரம் எங்கள் சரித்திர வாழ்வில்

நரித்தனம் செய்வதும் இந்நாடே!

தலைவர்கள் எளிமையைக் கட்டிக் காக்கவே

செலவுகள் செய்ததும் இந்நாடே இந்த

நிலைமை உணர்ந்தே கூனர் நிமிர்ந்தே

நெருப்பு விழிப்பதும் இந்நாடே!

எந்தையும் தாயும் வறுமையில் வாடி

இறந்து கிடந்ததும் இந்நாடே! அவர்

சந்ததி இன்று சங்கம் அமைத்தொரு

சமர் தொடங்குவதும் இந்நாடே!
-
======================================
>கவிஞர் நா.முத்துநிலவன்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

நாடு, நல்ல நாடு!

நாடு, நல்ல நாடு!

Re: நாடு, நல்ல நாடு!