[You must be registered and logged in to see this image.]
---
பி.எஸ்.எல்.வி.-சி23 ராக்கெட்டுக்கான 49 மணி நேர கவுன்ட் டவுன் சனிக்கிழமை (ஜூன் 28) காலை 8.52 மணிக்கு தொடங்குகிறது.
-
பிரதமர் நரேந்திர மோடி முன்னிலையில், ஸ்ரீஹரிகோட்டாவிலுள்ள சதீஷ் தவண் விண்வெளி ஆய்வு மையத்திலிருந்து இந்த ராக்கெட் திங்கள்கிழமை காலை 9.52 மணிக்கு விண்ணில் ஏவப்பட உள்ளது.
-
இந்த ராக்கெட் ஏவப்படுவதை நேரில் பார்வையிடுவதற்காக நரேந்திர மோடி ஞாயிற்றுக்கிழமை புதுதில்லியிலிருந்து சென்னை வழியாக ஸ்ரீஹரிகோட்டா வருவார் என தகவல்கள் தெரிவிக்கின்றன.
-
இந்த ராக்கெட்டை ஏவுவதற்கு ஒப்புதல் வழங்கப்பட்டுள்ளதையடுத்து, கவுன்ட் டவுன் நடவடிக்கைகள் திட்டமிட்டபடி தொடங்கும். விண்வெளியில் சுற்றும் செயற்கைக்கோள் கழிவுகள் மோதுவதை தவிர்ப்பதற்காக ஏற்கெனவே திட்டமிட்டதை விட மூன்று நிமிஷங்கள் தாமதமாக ராக்கெட் ஏவப்படும் என பி.எஸ்.எல்.வி. சி-23 திட்ட இயக்குநர் குன்னி கிருஷ்ணன் தெரிவித்தார். இந்த கவுன்ட் டவுன் தொடங்கியதும் ராக்கெட்டில் எரிபொருளை நிரப்புதல், இறுதிக்கட்டப் பரிசோதனைகள் உள்ளிட்ட பணிகள் நடைபெறும் என அவர் தெரிவித்தார்.
-
பிரான்ஸ் நாட்டின் செயற்கைக்கோளுடன்... பிரான்ஸ் நாட்டின் ஸ்பாட்-7 என்ற பூமியைக் கண்காணிக்கும் செயற்கைக்கோள் உள்பட மொத்தம் 5 வெளிநாட்டு செயற்கைக்கோள்கள் விண்ணில் செலுத்தப்பட உள்ளன.
கடல் வழிப் போக்குவரத்தைக் கண்காணிப்பதற்காக ஜெர்மனி நாட்டின் ஐசாட் செயற்கைக்கோளும், ஜி.பி.எஸ். அமைப்புக்கு உதவும் என்எல்எஸ் 7.1 மற்றும் என்எல்எஸ் 7.2 ஆகிய செயற்கைக்கோள்களும், சென்சார் கருவியுடன் கூடிய சிங்கப்பூர் நாட்டின் வெலாக்ஸ்-1 செயற்கைக்கோளும் விண்ணில் செலுத்தப்படுகின்றன.
-
இதில் ஸ்பாட்-7 செயற்கைக்கோள் மட்டுமே 714 கிலோ எடை கொண்ட சற்று பெரிய ரக செயற்கைக்கோளாகும். ஐசாட் 14 கிலோவும், என்எல்எஸ் 7.1, 7.2 ஆகியவை தலா 15 கிலோவும், வெலாக்ஸ் 7 கிலோவும் எடை கொண்ட சிறிய ரக செயற்கைக்கோள்கள் ஆகும்.
-
ஏற்கெனவே பிரான்ஸ் நாட்டின் ஸ்பாட்-6 செயற்கைக்கோள் பி.எஸ்.எல்.வி.-சி21 ராக்கெட் மூலம் விண்ணில் செலுத்தப்பட்டது.
-
பி.எஸ்.எல்.வி. ராக்கெட்டுகள் மூலம் ஏற்கெனவே வெளிநாடுகளைச் சேர்ந்த 35 செயற்கைக்கோள்கள் விண்ணில் செலுத்தப்பட்டுள்ளன.
-
--தினமணி