உங்கள் சிறுநீரகங்களை பாதுகாத்துக் கொள்ளுங்கள்


இதயம், மூளைக்கு அடுத்து உடலில் முக்கிய உறுப்பு சிறுநீரகம் தான். சிறுநீரக கோளாறுகள் வரும் ஆண்டுகளில் இப்போதுள்ளதை விட பல மடங்கு அதிகரிக்கும் என்று ஆராய்ச்சிகள் தெரிவிக்கின்றன.

நம்மிடையே பலருக்கு சிறுநீரகங்களைப் பற்றி தெளிவான அறிவுச கிடையாது. இன்னும் பலர் சிறுநீரகங்களை (கிட்னி) என்பது ஆண்மை சம்பந்தப்பட்டது என்றும் விந்தணுக்களை உற்பத்தி செய்யும் விரைகளை சிறுநீரகம் என்றும் தவறாக நினைக்கின்றனர். சிறுநீரகங்கள் நம் உடல் இரத்தத்தை சுத்தமாக வைத்திருக்கும் துப்புறவு தொழிற்சாலைகள். இவை வயிற்றினுள் இரண்டு உள்ளன.









வரும் காலத்தில் உயர் இரத்த அழுத்தம், சர்க்கரை வியாதி ஆகியன பல மடங்கு அதிகரிக்க உள்ளன. இந்நோய்கள் இதயம், மூளை போன்று சிறுநீரகங்களையும் பாதிக்க கூடியவை. இதய மருத்துவத்தின் முன்னேற்றங்கள் சர்க்கரை, இரத்த அழுத்த நோயாளிகளை மேலும் பல வருடங்கள் வாழ வைக்கும் அளவிற்கு முன்னேறி உள்ளன. இதனால் சிறுநீரக பாதிப்புகள் இவர்களை பாதிக்க வாய்ப்பும் காலமும் இன்னும் அதிகரிக்கும். சிறுநீரக நோய்களும் அதிகரிக்கும். எனவே நம் அனைவரும் சிறுநீரக பாதிப்புகளிலிருந்து நம்மை பாதுகாத்துக் கொள்ளுவது எப்படி என்று தெரிந்து கொள்வது அவசியம். அதற்குண்டான வழிமுறைகளை இனிக் காண்போம்.

எப்போதும் வரும் முன் காப்பதே சிறந்த வழி. 35 வயதிற்கு மேல் உள்ள அனைவரும் தங்கள் ஆரோக்கியத்தை முழுமையாக ஒருமுறை பரிசோதித்துக் கொள்ள வேண்டும். குறைந்த பட்சம் உடல் பரிசோதனை, இரத்தம், சிறுநீர் பரிசோதனைகள், ஈ.சி.ஜி இவைகளை பரிசோதிப்பதன் மூலம் சர்க்கரை வியாதி, உயர் இரத்த அழுத்தம், அதிக கொழுப்பு, இதய வியாதி இவை உண்டா இல்லையா என்பது தெரிந்து விடம்.

1. இத்துடன் இரத்தத்தில் யூரியா, கிரியேட்டினின், சிறுநீர் பரிசோதனை இவைகளையும் கூடுதலாக செய்து கொள்வதன் மூலம் சிறுநீரகங்களின் ஆரோக்கியத்தையும் தெரிந்து கொள்ளலாம். முழு உடல் பரிசோதனையின் போது இத்தகு பரிசோதனைகள் செய்யப்பட்டனவா? என்பதை உறுதி செய்து கொள்ளுங்கள். அப்படி எதும் சிறுநீரக பாதிப்பிற்கான அடையாளங்கள் இருந்தால் உடனே சிறுநீரக மருத்துவரை அணுகி ஆலோசனை பெறவும்.

2. குறிப்பாக சர்க்கரை வியாதி, உயர் இரத்த அழுத்தம் உள்ளவர்கள் குடுப்பத்தில் சிறுநீரக நோய் உள்ளவர்கள் கண்டிப்பாக ஒரு முறையேனும் சிறுநீரகங்களை பரிசோதித்து பார்த்துக் கொள்ள வேண்டியது அவசியம்.

3. சர்க்கரை வியாதி, உயர் இரத்த அழுத்தம் உள்ளவர்கள் தங்கள் வியாதியை நன்கு கட்டுப்படுத்தி வைத்திருப்பதன் மூலம் சிறுநீரக பாதிப்பு வரும் வாய்ப்பை தவிர்க்கலாம்

4. சிறுநீரகங்கள், சிறுநீர்க் குழாய்கள் இவற்றில் கற்கள் உள்ளதாக கண்டறியப்பட்டவர்கள் அவை வெளியேறி விட்டனவா? என்பதை மருத்துவ உதவியுடன் உறுதி செய்து கொள்ள வேண்டும். தேவைப்பட்டால் அறுவை சிகிச்சை கூட செய்ய வேண்டி வரலாம். வாழைதண்டு, ஹோமியோபதி மருந்துகள், காசினிக் கீரை ஆகியன கற்களை கரைக்காது. இதனால் கால விரயம் மட்டுமல்ல தாமத்தால் சிறுநீரகம் கெட்டு விடக் கூடும்.

5. புகைப்பிடித்தல் புகையிலை உபயோகித்தல் சிறுநீரகங்களை பாதிக்கும். தவிர்க்கவும்.

6. நல்ல வெப்பபிரதேசமான நம் நாட்டில் நன்கு தண்ணீர் குடித்து தினமும் 2 லிட்டரேனும் சிறுநீர் பிரியும்படி பார்த்துக் கொள்வதன் மூலம் சிறுநீரக அலற்சி, கற்கள் வராமல் தவிர்க்கலாம்.

7. சிறிய வலிகளுக்கு கூட மருந்து கடைகளுக்கு சென்று வலி மாத்திரைகள் அடிக்கடி விழுங்கும் பழக்கம் உள்ளவர்கள் அதை நிறுத்த வேண்டும். நீண்ட நாள் கழித்து சிறுநீரகங்கள் செயலிழக்க கூடும்.

8. சிறநீரக நோய் சம்பந்தப்பட்ட அறிகுறிகளான கை, கால், முகவீக்கம், சிறுநீரில் இரத்தம்,சிறுநீர் கழிக்கையில் வலி அடைப்பு (முக்கியமாக வயதானவர்களுக்கு) ஆகியன உள்ளவர்கள் உடனே சிறுநீரக மருத்துவரை அணுகி ஆலோசனை பெற்றால் நோய் முற்றி கிட்னி ஃபெயில்யர் ஆவதை தவிர்க்கலாம்.

9. நாட்டு மருந்துகள் பலவற்றில் சிறுநீரகங்களை பாதிக்கும் உட்பொருட்கள் உள்ளன. இவற்றையும் தவிர்ப்பது நலம். முக்கியமாக ஆரம்ப நிலை சிறுநீர் செயலிழப்பு உள்ளவர்கள் கண்டிப்பாக தவிர்க்கவும்.

சிறந்த ஒரு பதிவிது நன்றி தோழரே

பகிர்வுக்கு நன்றி!!!