சிறுநீரகக் கட்டிகள் (KIDNEY CYSTS)




சிறுநீரகங்களிலும் மற்ற பல உறுப்புகள் போல கட்டிகள் வரலாம். இந்த கட்டிகளும் பல காரணங்களால் வரலாம். ஆனால் இக்காரணங்களில் முதல் இடம் வகிப்பது எந்த ஆபத்தும் இல்லாத சாதாரண கட்டிகள்தான். எனவே சிறுநீரகத்தில் கட்டி இருக்கின்றது என்று கண்டுபிடிக்கப்பட்டதும் உடனே பயப்படத் தேவையில்லை. கட்டிகள் பலதரப்படும் பெரும்பாலும் அவை நீர் நிரம்பிய பைகளாக இருக்கலாம். அவை எண்ணிக்கையில் ஒன்றிரண்டாகவும் வயதாகம் போது வரும் சில மாற்றங்களினாலும் வந்ததாகவும் இருக்கும். சில சமயம் பிறவிக் காரணங்களாலோ அல்லது மரபணுக்கள் காரணமாக பரம்பரையாக குடும்பத்தில் பலருக்குமோ வரலாம். அவ்வாறெனில் இக்கட்டிகள் எண்ணிக்கையில் அதிகமாகவும் பலவித சிறுநீரகக் கோளாறுகளுடன் கூடியதாகவும் இருக்கும்.







சில சமயம் அசாதாரண அணுக்களால் (மிக அபூர்வமாய் - புற்று அணுக்களாய்) இருக்கலாம். சிறுநீரகக் கட்டிகள் பெரும்பாலானவை 40 வயதிற்கு மேல் வயதின் காரணமாக சிறுநீரகங்களில் ஏற்படும் மாற்றங்களால் வருகின்றது. பல சமயங்களில் இவை வேறு காரணங்களுக்காக வயிற்றில் உள்ள மற்ற உறுப்புகளை ஸ்கான் செய்யும் போது கண்டுபிடிக்கப்படலாம். சில சமயம் இக்கட்டிகளில் கிருமித் தாக்கம், இரத்தக் கசிவு ஆகியவற்றால் வலி ஏற்பட்டு அதற்காக பரிசோதனைகளை மேற்கொண்டபோது கண்டுபிடிக்கப்படலாம். மிக அபூர்வமாக இக்கட்டிகள் சிறுநீரக இரத்தக் குழாய்களை அழுத்துவதால் உயர் இரத்த அழுத்தத்தை ஏற்படுத்தலாம்.

இத்தகைய பாதிப்புகள் (வலி, காய்ச்சல், இரத்த அழுத்தத்தை அதிகரித்தல்) ஏற்படுத்தினால் ஒழிய சிறுநீரகக் கட்டிக்கு பிரத்யேகமாக வேறு சிகிச்சை தேவையில்லை. மேற்கூறிய தொந்தரவுகள் இருந்தால் அறுவை சிகிச்சை தேவைப்படலாம். எதுவென்றாலும் சிறுநீரகத்தில் கட்டி இருப்பதாக தெரிந்தால் ஒரு சிறுநீரக மருத்துவரை அணுகினால் அவர் அதற்குறிய ஸ்கான், சிறுநீரகத்தின் செயல் திறன், ஆரோக்யம் ஆகியவற்றை ஆய்வு செய்யும் சில எளிய பரிசோதனைகள் ஆகியவற்றின் மூலம் இந்த கட்டிகள் சாதாரணக் கட்டிகள்தானா அல்லது அபூர்வமாக வரும் வேறு சில வகைக் கட்டிகள்தானா என்பதை உறுதி செய்து உங்களுக்கு சொல்வார். தொந்தரவு எதுவும் இல்லாத சாதாரண கட்டிகளுக்கு வைத்தியம் தேவையில்லை. வேறு விதமான கட்டிகள் வேறு சில பிரத்யேக சோதனைகள் மூலம் அவை எத்தகைய கட்டிகள் என்பது கண்டுபிடிக்கப்பட்டு அதற்குறிய சிகிச்சை பரிந்துரைக்கப்படும்.