கதிரைப்போல் என்றென்றும் ஒளிர்வாய்

by **karumalaithamizhazhan** Fri Oct 03, 2014 12:46 pm

கதிரைப்போல் என்றென்றும் ஒளிர்வாய்
பாவலர் கருமலைத்தமிழாழன்

                        கோடியிலே   ஒருவரெனும்   கொடையின்   செல்வர்
                                    கொள்கையிலே   பிறழாத   கொங்கு   தங்கம்
                        நாடியவர்க்   கில்லையெனும்   சொல்லே   யின்றி
                                    நாளும்நற்   செயல்களுக்கே   ஈயும்   வள்ளல்
                        வாடிநின்ற   பயிர்க்குள்ளம்   வருந்தி   நின்ற
                                    வள்ளலாரைப்   போல்கருணை   வாய்க்கப்   பெற்ற
                        ஈடில்லா   அருட்செல்வா   மகாலிங்கமே
                                    இறவாத   புகழ்பெற்றாய்   வாழ்க   வாழ்க !

                        தன்மார்க்கம்   சமரசசன்   மார்க்கம்   என்றே
                                    தகுமார்க்கம்   வாழ்க்கையிலே   கடைபி   டித்து
                        நன்மார்க்கம்   கோயில்கள்   திருப்ப   ணிக்கே
                                    நடமாடும்   வாரியாராய்ப்   பொருள்கொ   டுத்தே
                        பன்மார்க்கம்   இருந்தபோதும்    காந்தி   யம்தாம்
                                    பக்கவத்தைத்   தரும்மார்க்கம்   என்று   ணர்ந்து
                        மென்மார்க்கம்   தனில்நடந்த   மகாலிங்கமே
                                    மேதினியில்   நிலைத்துநின்றாய்   வாழ்க   வாழ்க !

                        பொருளிருந்தால்   அறிவில்லை   அறிவி   ருந்தால்
                                    பொருளில்லை   எனும்மொழியின்    கருத்தை   மாற்றிப்
                        பெரும்பொருளும்    தெளிந்தறிவும்   ஒருங்கே    பெற்ற
                                    பெருந்தகையாய்   சிறுமையெனும்   சிந்தை   யில்லா
                        அருட்செல்வ   மாமணியாய்   அகந்தை    யின்றி
                                    அனைவரையும்   அணைக்கின்ற   எளிமைப்   பண்பின்
                        தருவாக   வாழ்ந்திருந்த   மகாலிங்கமே
                                    தரணியிலே    புகழில்நின்றாய்    வாழ்க   வாழ்க !

                        எதுவாழ்வு    என்பதற்கே   எடுத்துக்   காட்டாய்
                                    எள்ளளவும்   கறையின்றிக்   களங்க   மின்றிப்
                        பொதுவாழ்வில்   தம்வாழ்வை   அர்ப்ப   ணித்துப்
                                    பொள்ளாச்சி   உறுப்பினராய்ச்   சட்ட   மன்றில்
                        புதுநெறியை    அரசியலில்     வகுத்துத்    தந்து
                                    பூரிக்கும்    தூய்மையிலே    செயல்கள்    செய்த
                        பொதுத்தொண்டன்    அருட்செல்வா   மகாலிங்கமே
                                    பொலிந்திங்கே    நிலைத்துநின்றாய்   வாழ்க   வாழ்க !
தமிழறிஞர்   தமைப்பேணும்   தமிழை   ஆய்ந்த
                                    தமிழறிஞர்! ஞாலமெல்லாம்    போற்று    மாறு
                        தமிழிசையைப்   பண்பாட்டை   இலக்கி   யத்தை
                                    தமிழ்கலையை   வரலாற்றை   அறியச்   செய்யும்
                        தமிழ்ப்பணியை   விளம்பரமே    சிறிது   மின்றித்
                                    தம்கடமை   எனநாளும்    ஆற்றி    நின்ற
                        தமிழ்த்தொண்டன்   அருட்செல்வா    மகாலிங்கமே
                                    தமிழ்ப்புகழாய்    நிலைத்துநின்றாய்    வாழ்க   வாழ்க !

                        ஆயிரமாய்த்   திருக்குறளின்    இந்தி   நூலை
                                    அறியாத   வடநாட்டார்    அறிந்து    கொள்ளப்
                        பாயிரமாய்ப்   பள்ளிகட்குப் பரிச    ளித்தும்
                                    பயன்நல்கும்   பெரியபுராண   திருமந்   திரத்தை
                        ஓவியமாய்   இந்திமொழி     ஆங்கி   லத்தில்
                                    உலகறிய   மொழிபெயர்த்துப்   பரவச்   செய்த
                        காவியனே    அருட்செல்வா    மகாலிங்கமே
                                    காலத்தை   வென்றுநின்றாய்   வாழ்க   வாழ்க !

                        எண்ணற்றத    தொழிற்கூடம்    கல்விச்    சாலை
                                    எல்லாமும்    நாட்டுவளம்    பெருக்கும்   சோலை
                        எண்ணற்ற   தொழிலாளர்   வாழ்வை    இன்பில்
                                    ஏற்றுகின்ற    சக்திகுழும   நிறுவ   னங்கள்
                        மண்வளத்தில்   பாசனத்தில்   விவசா   யத்தில்
                                    மகத்தான   புதியமாற்றம்   வியையச்   செய்த
                        பண்பாளர்   அருட்செல்வா   மகாலிங்கமே
                                    பார்தன்னில்   நிலைத்துநின்றாய்   வாழ்க   வாழ்க !

                        நற்பாரதி   அண்ணாவின்   பட்டம்   பெற்ற
                                    நாச்சிமுத்து   ருக்மணியின்   அரும்பு   தல்வா
                        பொற்புடைய    ஓம்சக்தி    தலையங்   கத்தில்
                                    பொலிநாடாய்   உயரவழி    சொன்ன   செல்வா
                        வெற்றிக்குச்    சாட்சியாகத்    தளர்ச்சி   யின்றி
                                    வெற்பாக   உயர்ந்துநின்ற    உழைப்பின்    தோளா
                        கற்பகமே    அருட்செல்வா    மகாலிங்கமே
                                    கதிரைப்போல்   என்றென்றும்   ஒளிர்வாய்   வாழ்க !

                                                            -----   2     -----

அருமை பாராட்டுக்கள் ஐயா

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

கதிரைப்போல் என்றென்றும் ஒளிர்வாய்

கதிரைப்போல் என்றென்றும் ஒளிர்வாய்

Re: கதிரைப்போல் என்றென்றும் ஒளிர்வாய்