மொழிவளர்ந்தால் நாம் வளர்வோம்

by **karumalaithamizhazhan** Tue Oct 21, 2014 6:33 am

மொழிவளர்ந்தால்   நாம்   வளர்வோம்
        பாவலர் கருமலைத்தமிழாழன்

மொழிகளிலே   முதன்மைமொழி   தமிழே   என்று
            மொழிவதிலே    பெருமையுற்றுத்    தாழ்ந்து   விட்டோம்
மொழிகளுக்குள்   இலக்கணத்தில்    உயர்ந்த    தென்று
            மொழிந்துபுதுக்   கூறிணைக்க   மறந்து   விட்டோம்
மொழிகளிலே   முப்பிரிவைக்   கொண்ட   தென்று
            மொழிந்தபடி   அறிவியலை   விட்டு விட்டோம்
மொழிகளுக்குள்   அமுதென்றே   மயங்கி   மாற்றம்
            மொழிக்குள்ளே    செய்யாமல்   வீழ்ந்து   விட்டோம் !

தமிழ்பற்று   எனவாயால்   பேசிப்   பேசித்
            தமிழ்மொழியை   வாய்மொழியாய்   மாற்றி   விட்டோம்
தமிழகத்து   வீதியெல்லாம்   ஆங்கி   லத்தைத்
            தாலாட்டும்   தொட்டில்கள்   தொங்க   விட்டுத்
தமிழ்பயிற்றும்   பள்ளிகளை   மூடி   விட்டுத்
            தமிழ்வளர்ப்போம்   எனமேடை   முழங்கு   கின்றோம்
தமிழினிலே   பேசுதற்கும்   நாணம்   கொண்டு
            தமிழரெல்லாம்    தமிங்கிலராய்   மாறிப்   போனோம் !

அம்மாவே   தன்குழந்தை   மம்மி   யென்று
            அழைப்பதிலே   சுகம்கண்டு   பிணமா   கின்றாள்
இம்மென்னும்   மெய்யெழுத்தை   முதலில்   வைத்தே
            இயல்பில்லா   பெயர்களினைச்   சூட்டு   கின்றோம்
நம்பொருளை   நாம்விற்கும்   கடைக   ளுக்கும்
            நற்றமிழில்   பெயர்வைக்கத்   தயங்கு   கின்றோம்
நம்மொழியால்   எதுவொன்றும்   ஆகா   தென்றே
            நம்பிக்கை   கொள்ளாமல்   தாழ்த்து   கின்றோம் !

காலையிலே   எழுந்தவுடன்   பல்து லக்கக்
            கனிவாகப்   பிரஷ்பண்ணி ! தண்ணீ   ராலே
கோலமுகம்   கழுவுதற்கே   பேஸ்வாஷ்   பண்ணி
            குடிப்பதற்குத்   தேநீரை டீயாய்ப்   பண்ணி
வேலைக்குச்   செலும்முன்னே   மகம்ம   ழிக்க
            ஷேவ்பண்ணி   டிரஸ்பண்ணி டிபனைப் பண்ணி
மாலையிலும்   காலையிலும்   வாக்கைப்   பண்ணி
            மணித்தமிழைப்   பண்ணிமொழி   செய்தோம் பேச்சில் !
-       1 -

வானியலைக்   கணித்தனால்   கணியன் என்றோம்
            வளியறிந்து   கலம்செலுத்திக்   கடல்க   டந்தோம்
வானத்தில்   பறக்கின்ற   பொறிய   மைத்து
            வளர்ந்திருந்தோம்   அறிவியலில்   அன்றே   யென்று
பேணியதை   வளர்க்காமல்   பேசு   கின்றோம்
            பெருமைகளைச்   சான்றுகளாய்   எடுத்துக்   காட்டி
நானிலத்தில் நம்முன்னோர்   பெற்றி   ருந்த
            நல்லறிவை   எடுத்துரைக்க   என்ன செய்தோம் !

அணுப்பிளந்தோம்   எனஅவ்வை   சொன்ன   சொல்லை
            அழகாகச்    சொல்லுகின்றோம்1 கல்வி தன்னில்
அணுக்கருத்தைக்   கற்பதற்குத்   தமிழி லின்று
            அருநூல்கள்   இல்லையென்று   தள்ளு கின்றோம்
முணுமுணுக்கும்   சித்தர்தம்   பாட   லெல்லாம்
            முறையான   மருத்துவத்தை   உரைத்த   போதும்
மனுப்போட்டுத்    தமிழினிலே   முடியா   தென்று
            மண்டியிட்டுக்   கோழையெனச்   சூம்பு   கின்றோம் !

கரிகாலன்   கல்லணையும்   தஞ்சை   மண்ணில்
            கட்டிவைத்த   கோபுரமும்   வல்ல வர்நாம்
பொறியியலில்   எனக்காட்சி   தந்த   போதும்
            பொறுப்பின்றிப்   பிறமொழியே   சிறப்பென்   கின்றோம்
அறிவுதனை   வளர்பதுவும்   சுயமாய்ச்   சிந்தை
            அளிப்பதுவும்   அன்னைமொழி   கல்வி   யென்றே
அறிந்திருந்தும்   நம்காலை நாமே   வெட்டி
            அடுத்தவர்தோள்   பற்றிநடை   பயிலு   கின்றோம் !

செந்தமிழே   ஆட்சிமொழி !   கல்விக்   கெல்லாம்
            செழுந்தமிழே   பயிற்றுமொழி ! வேலைக்   வாய்ப்பு
செந்தமிழில் பயன்றோர்க்கே   என்னும்    ஆணை
            செப்பமுடன் செயலினிலே   செய்ய வேண்டும் !
செந்தமிழர்   தமிழரென்னும்   உணர்வு   பெற்றுச்
            செம்மொழியாய்   உலகமெல்லாம்   உயர்த்த   வேண்டும் !
செந்தமிழை   இல்லத்தில்   தெருவில்   பேச்சில்
            செழுமையுற   நாம்வளர்த்தால்   வளர்வோம்   நாமே !

-       2 -

அருமை பாராட்டுக்கள்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

மொழிவளர்ந்தால் நாம் வளர்வோம்

மொழிவளர்ந்தால் நாம் வளர்வோம்

Re: மொழிவளர்ந்தால் நாம் வளர்வோம்