உழைப்பின் பெருமை

by **karumalaithamizhazhan** Sun Oct 26, 2014 6:02 am

உழைப்பின் பெருமை
பாவலர் கருமலைத்தமிழாழன்

கடுமையாக   உழைக்கின்ற   தந்தை   நாளும்
            கனல்நெருப்பின்   உலையினிலே   இரும்பைத்   தட்டி
இடுப்பொடிய   வியர்வைசிந்தி   வேலை   செய்தே
            இல்லத்தை   ஓரளவு   காத்து   வந்தார்
அடுப்படியில்   பணிசெய்யும்    மனைவி   கூட
            அவருக்குத்    துணையாக   உதவி   செய்ய
எடுப்பாகப்   பிறந்தபிள்ளை   சோம்பல்   கொண்டு
            எப்பணியும்   செய்யாமல்   இருக்க   நொந்தார் !

அருகினிலே   தன்மகனை   அழைத்துத்   தந்தை
            அன்பாக   சிலசொற்கள்   எடுத்து   ரைத்தார்
உருபடியாய்   வாழ்வதற்கு   வேலை   யொன்று
            உன்கரத்தில்   இருக்கவேண்டும்    அறிந்து   கொள்வாய்
வெறும்பயலாய்    இருப்பதிலே    பயனே   இல்லை
            வெறுங்கையோ    சோறுனக்குத்   தருவ தில்லை
அரும்பாடு    படுகின்ற   உழைப்பை   காலம்
            அரும்மதிப்பை   நீயுணர்தல்   வேண்டு   மென்றார் !

நாயைமுதல்   பள்ளிக்கு   விடுமு   றைநீ
            நானுரைத்த   படிவேலை   செய்ய   வேண்டும்
காளையாக   நீவளரும்   போதோ   அந்தக்
            கடும்பயிற்சி   உனக்குதவும்   என்று   ரைத்தார் !
மூளையிலே   இச்சொல்லைப்   பதித்தி   டாமல்
            மூலையிலே   அமர்ந்திருந்த   மகனைப்   பார்த்து
வேலையினை    இவன்செய்ய   மாட்டான்   என்றே
            வேறுவழி   தாயவளோ   கூற   லானாள் !

பணம்கொடுத்தும்    உணவுதனைக்   கட்டித்   தந்தும்
            பார்மகனே    மாலைவரை   சுற்றி   விட்டு
குணம்கொண்ட   பிள்ளைபோல்   தந்தை   கையில்
            கொடுத்துவிடு   இப்பணத்தைப்   புகழ்வார்   என்றாள்
மனம்மகிழ்ந்த   மகனுமவன்    தண்டச்   சோறாய்
            மாலைவந்து   தந்தையிடம்   பணம்கொ   டுத்தே
தினம்முழுதும்    உழைத்ததனால்   பெற்ற   தென்றான்
            திகைப்போடு   பார்த்தவன்மேல் ஐயம்   கொண்டார் !

நெருப்பினிலே   அப்பணத்தை   விட்டெ   றிந்தும்
            நெடுமரமாய்   அவன்நின்ற   தன்மை   பார்த்தே
அரும்பாடு   பட்டேநீ   உழைத்த   தன்று
            அடுத்தவரின்   உழைப்புதனைத்   திருடு   வோனோ
பெருமையுடன்   வாழ்ந்ததாக    வரலா   றில்லை
            பெற்றவுனைப்   பார்பதற்கே    நாணு   கின்றேன்
திருந்திடுவாய்   என்றுரைக்கத்   தாயும்   வெட்கித்
            தீதுதனை   உணர்ந்தவனை   உழைக்கச்   சொன்னாள் !

அடுத்தநாளோ   கல்லுடைத்துப்   பெற்ற   காசை
            அவன்கொடுக்க    நெருப்பினிலே   எறியப்   போனார்
தடுத்தமகன்   கைப்புண்ணில்   உழைத்த   காசு
            தணல்நெருப்பில்   எறியாதீர்   எனத்து   டித்தான் !
எடுத்தவனின்   கரங்களினை   முத்த   மிட்டே
            எழிலுழைப்பின்   மதிப்புதனை   உணர்ந்து   கொண்டாய்
கெடுக்கின்ற    சோம்பலினை   விட்ட தாலே
            கேடுனக்கு   வாராது   வாழ்க   என்றார் !

அருமை

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

உழைப்பின் பெருமை

உழைப்பின் பெருமை

Re: உழைப்பின் பெருமை