தொ(ல்)லைக்காட்சி

by **karumalaithamizhazhan** Sat Nov 01, 2014 11:46 am

தொ(ல்)லைக்காட்சி
     பாவலர் கருமலைத்தமிழாழன்

திரைமறைவுக்    காட்சிகளைத்   திரையில்   ஓட்டி
            திமிர்கின்ற   இளமைக்குத்   தீனி   போடும்
நரைமுடியில்   முதியவரோ    காதல்   பேசி
            நங்கையரை   மயக்குகின்ற    பாடல்   பாடும்
அரைகுறையாய்    ஆடைகளில்   அங்கம்   காட்டி
            அலங்கோல    நடனத்தில்   நெளியும்   பெண்மை
முறையற்ற   உறவுகளில்   முடிச்சைப்   போட்டு
            முற்றாகப்   பண்பாட்டை    அழிக்கும்   கோலம் !

கடல்மணலில்   வண்டியோட்டும்   ஆணின்   பக்கம்
            கால்பங்கு   உடையினிலே   ஒருபெண்   நிற்பாள்
உடல்மூடும்   சேலைக்காய்   உடைய   விழ்த்தே
            உதடுகளைக்   கடித்தபடி    முறுவல்   பூப்பாள்
திடமான    தேநீரை    அரைக்கால்   சட்டை
            திருக்கோலம்   திறந்தபடி   சிரித்தே   ஈவாள்
முடமாக்கிச்   சிந்தனையின்    திறன   ழித்து
            முட்டாளாய்    மாற்றுகின்ற   விளப்ப   ரங்கள் !

படுக்கையறைக்    காட்சிகளில்   பெண்ணைப்   போகப்
            பொருளாக்கிக்    கற்பழித்தே   தோலு   ரிப்பர்
அடுப்படியில்   விதவிதமாய்    சமையல்   செய்து
            அறுசுவையில்   மூழ்கடித்தே    அடிமை    செய்வர்
நடுப்பகலில்   திரைப்படத்தைக்    காட்டிக்    காட்டி
            நங்கையரின்   மூளையினைச்    சலவை    செய்வர்
கடுகளவும்    பெண்மைக்கே   ஏற்றம்   சேர்க்கும்
            காட்சிகளைக்    காட்டாமல்   கீழ்மை    செய்வர் !

அறிவியலில்    எத்தனையோ    புதுமை   நாளும்
            அகிலத்தில்   நடக்கின்ற    போதும்    இங்கே
அறிஞரென   நடிகையரை    அழைத்து   வந்தே
            அற்புதமாய்    நேர்காணல்   நடத்து   வார்கள்
அறிவுரைகள்   சுதந்திரநாள்   பொங்கல்   நாளில்
            அதிமேதை   நடிகர்கள்    வழங்கு    வார்கள்
நெறிபிறழ்ந்த     தலைவர்கள்    நேர்மை   பற்றி
            நீண்டதொரு    சொற்பொழிவை    நிகழ்த்து   வார்கள் !

அருந்தமிழின்   நாடங்கள்    எல்லாம்   வேற்று
            ஆங்கிலத்துத்   தலைப்பிற்குள்   ஒளிந்து   நிற்கும்
மருந்தைப்பொல்    தமிழ்ச்சொற்கள்   ஆங்கி   லத்து
            மரபுதனில்    இடையிடையே   தலையைக்   காட்டும்
விருந்தாக   வந்தவரே    வீட்டை   ஆளும்
            விந்தையாக   மேலைநாட்டு   மோகம்   ஓங்கிப்
பருந்தின்கால்    சிக்கிவிட்ட    குஞ்சு   போலப்
            பசுந்தமிழும்    பண்பாடும்   நடுங்கு    முள்ளே !

குழந்தைகளின்   மதிமயக்கும்   காட்சி   யன்றிக்
            கூர்த்தமதி   வளர்க்கின்ற   மாட்சி   யில்லை
குழந்தையொடு   பெரியவரும்   ஒன்றாய்ச்   சேர்ந்து
            குடும்பமுடன்   பார்ப்பதற்கு    நெஞ்சோ   கூசும்
பழத்திற்காய்   வைத்தமரம்   அடுப்பெ   ரிக்கப்
            பயன்படுத்தும்    கயமையென   விஞ்ஞா   னத்தின்
பொழுதுபோக்கு    பெருந்தொல்லைக்   காட்சி   யாகி
            போதையேற்றி    இளைஞரினைப்    புதைத்த    தின்று !

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

தொ(ல்)லைக்காட்சி

தொ(ல்)லைக்காட்சி

Re: தொ(ல்)லைக்காட்சி