பழம்பகையை முறியடிப்பேன்

by **karumalaithamizhazhan** Wed Nov 19, 2014 6:25 am

பழம்பகையை   முறியடிப்பேன்
   பாவலர் கருமலைத்தமிழாழன்

மேல்சாதிப்    பெண்ணென்று    கூறு   கின்றீர்
          மேல்மாடி   தனில்குடியி    ருப்ப    தாலா
வேல்கொண்டு    புண்மீது    குத்து   கின்ற
          வேதனையைப்    பெற்றோரே   நீங்கள்    செய்து
பால்மனத்துக்    காதலினை    ஒன்றாய்ச்    சேர்க்க
          பாழான    சாதிசொல்லித்    தடைசெய்   கின்றீர்
கால்பதித்தே    எல்லோரும்    நடக்கும்    மண்ணில்
          கரங்களிலே    நடப்பதுதான்   இயல்பு   என்றீர் !

பேருந்தில்    பலரோடு    செல்லும்    போது
          பேணுகின்ற   சாதியங்கு   வருவ   தில்லை
யாருக்கும்    பொதுவென்னும்    திரைய   ரங்கில்
          யாருமங்கே   சாதிபார்த்து    அமர்வ   தில்லை
வேரூன்றி    வளர்கின்ற   மரத்தைப்   போல
          வேண்டாத    சாதியினை    வளர்த்து   விட்டு
நீரூற்றிக்    காப்பதெல்லாம்   இளைஞர்   எங்கள்
          நெஞ்சன்பை    அழித்தின்னல்    கொடுப்ப   தற்கா !

ஊர்தன்னில்    நாம்நடக்கும்   சாலை   யெல்லாம்
          உள்ளதுவோ    வேறுவேறாய் !   உயர்ந்த   சாதி
சேர்ந்தவர்கள்   எனச்சொல்லி    வேடம்   போடும்
          செயற்கைமனம்    பூண்டவரின்   உருவம்    எல்லாம்
பார்வாழும்    மாந்தயினம்    போல   வன்றோ
          பொதுவாக   உள்ளதிங்கே !    இயற்கை   அன்னை
யாருக்கும்    தனிநீதி    சொல்ல    வில்லை
          எல்லாமும்     நாம்வகுத்த    சட்டந்    தானே !

குரல்கொடுக்கும்    கோழியினால்   கங்குல்    மாய்ந்து
          புலர்கின்ற    தெனச்சொல்லும்   மூடர்   போலே
பிரமனவன்    தலையிருந்து   பிறந்த   நாங்கள்
          பூமியிலே    உயர்சாதி   எனச்சொல்   கின்றீர்
உரலுக்குள்    யார்தலையை   நீட்டி   னாலும்
          உலக்கைக்குக்    கவலையில்லை !   எழுந்து   விட்ட
புரட்சிக்கு    முன்னாலே   சாதி    யெல்லாம்
          பூண்டோடு    அழிவதிலே    ஐய   மில்லை !

கீழ்ச்சாதி    எனநீங்கள்    எதனை    வைத்துக்
          கீழ்த்தரமாய்ச்    சொல்லுகின்றீர் !   கீழ்த்த   ளத்தில்
வாழ்கின்ற   குடிசையினை    வைத்தா?   கையால்
          வாழ்வுயர    உழைக்கின்ற    உழைப்பை    வைத்தா?
தாழ்ந்துதினம்    பணிவாக   வியர்வை   நெற்றி
          தனில்நடக்கும்    பாட்டாளித்    தனத்தி   னாலா?
ஏழ்மையிலே    உழன்றாலும்    மெய்யை    நெஞ்சில்
          ஏற்றிவைத்த    ஏமாளித்    தனத்தி   னாலா?

செல்வத்தில்    கொழிக்கின்ற   போது   சாதி
          ஏற்றதாழ்வைச்    சிலரிங்கு   மறப்ப   துண்டு
பொல்லாத    உலகத்தில்    பொருளைக்    கொண்டே
          பெருமையினை    மனிதகூட்டிற்   குச்செய்   கின்றார்
வெல்லுகின்ற   தூயவழி   செல்லும்    அன்பு
          நெஞ்சத்தார்    மேல்சாதி   என்று   சொன்னால்
வெல்லமென   நான்ஏற்பேன் ! தொன்று   தொட்டு
          வந்ததென்றால்    தோலுரித்தே   பொதுமை   செய்வேன் !

பருவத்தில்    இயல்பாக   மலரு   கின்ற
          பாலுணர்ச்சி    இருவருக்கும்   ஒன்றே    யன்றோ
உருவான   அன்பினாலே   இரண்டு   நெஞ்சம்
          ஒன்றாகக்   கலந்தபின்னே    சேர்ப்ப   தன்றிப்
பொருந்தாதச்   சாதியினைப்   பேசிப்   பேசிப்
          பொலிவான    வாழ்வுதனைப்    பொசுக்கு   கின்ற
இருள்நெஞ்சப்    பெற்றோரே   இதனால்   உங்கள்
          நிலவாழ்வில்    கிடைக்கின்ற    புகழ்தான்   என்ன !

மணமகனைப்    பார்க்கின்ற   போது   சாதி
          மதந்தன்னைப்    பார்க்காமல்    குணத்தைப்   பார்க்கும்
மனந்தன்னைப்    பெற்றிடுவீர் ! பெண்ணை   வைத்துக்
          காப்பாற்றும்    ஆண்தானா   எனப்பா    ருங்கள்
பணங்கேட்டுப்     பொன்கேட்டுப்    பெண்ணைக்    கேட்கும்
          பண்பிலானைப்    பார்க்காமல்   கண்ணீர்    இல்லா
மணவாழ்வைத்    தன்னுழைப்பால்    தருவென்    என்னும்
          மனம்பெற்ற   ஆண்மகனைத்    தேர்ந்தெ    டுங்கள் !

பெண்தானே    நம்சொல்லை    மீறு    வாளா
          எனஎண்ணும்    பெற்றோரே    சாதி   வைத்து
பெண்மனத்தின்    ஆசைகளை    மாய்க்க   வந்தால்
          பெண்ணிங்கு    புலியாவாள் ! எந்த   சாதி
என்றாலும்    நெஞ்சமொன்றாய்    ஆன   பின்னே
          என்வாழ்வின்    துணையவர்தான் !   எதிர்த்தே   நீங்கள்
நின்றாலும்   அவரைத்தான்    மணமு   டிப்பேன்
          இவ்வுலகின்   பழம்பகையை    முறிய   டிப்பேன் !

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

பழம்பகையை முறியடிப்பேன்

பழம்பகையை முறியடிப்பேன்

Re: பழம்பகையை முறியடிப்பேன்