அன்னை தெரசா

by **karumalaithamizhazhan** Wed Aug 26, 2015 12:22 pm

( 26-08-2015 இன்று அன்னை தெரசா அவர்களின் பிறந்த நாள் அவரைப்போல் மனித நேயத்துடன் வாழ உறுதி ஏற்போம் )

அன்னை தெரசா

பாவலர் கருமலைத்தமிழாழன்

மதமென்னும்    வேலிகளைக்    கடந்து    நின்ற
            --மனிதத்தின்   மாவுருவம் !   இரக்க    ஊற்றின்
பதமான   ஈரநிலா !    மக்கள்    நெஞ்சப்
            --பாத்திகளில்    அன்பென்னும்    விதையை   நட்ட
உதயத்தின்   பூபாளம் !   ஆன்மீ   கத்தின்
            --உண்மையொளி !   இனமொழிகள்    நாடு   தாண்டி
இதமானப்   பூங்காற்றாய்    அரவ    ணைத்த
            --இறையருளின்    இனியமுதம்   தெரசா   அன்னை !

ஆயிரமாம்   ஏதிலியர்    உரிமை    யோடு
            --அம்மாவென்   றழைத்திடவே   அணைத்த   அன்னை
ஆயிரமாம்   கரங்களுக்கே   ஊன்று    கோலாய்
            --அனுதினமும்   தனைக்கொடுத்து   நின்ற    அன்னை
ஆயிரமாம்    முதியோர்கள்   அவலம்   நீங்கி
            --அமைதியாக   வாழவழி   யமைத்த    அன்னை
பாயிரமாய்   பாவியமாய்    தியாகத்    தையே
            --பாடலாக    இசைத்தவர்தாம்    தெரசா   அன்னை !

அறிவியலின்   வளர்ச்சியிலே    அதிக    மாக
            --அறிவுதனில்   உயர்ந்திட்ட    மனித   ரெல்லாம்
பரிவுகாட்டும்   மனங்களிலே    சுருங்கி    விட்ட
            --பரிதாபச்   சூழலில்தான்   தெருவின்   ஓரம்
சொறிநாய்க்கும்    கேவலமாய்த்    தள்ளப்   பட்ட
            --தொழுநோய    ரும்மனித    ரென்றே    ஏந்திச்
சரியானப்   பாதுகாப்பைப்    பாசத்    தோடு
            --சலியாமல்    அளித்தவர்தாம்    தெரசா   அன்னை !

கரமேந்தி    ஏழையர்க்காய்   உதவி   கேட்டு
            --கனிவோடு   செல்வந்தர்   முன்னே   நிற்கக்
கரந்தன்னில்    எச்சிலினைத்   துப்பு    கின்றார்
            --கடுகளவும்   சினமின்றி    எச்சி   லைநான்
வரவாக   என்கணக்கில்    சேர்த்துக்    கொண்டேன்
            --வழியற்ற    அபலையர்க்குக்    கொடுங்க   ளென்றே
கரம்நீட்டிக்    கல்நெஞ்சைக்    கரைய   வைத்த
            --கருணையின்   வடிவந்தான்   தெரசா   அன்னை !

எனிமைக்கும்   எளிமையாய்த்   தனக்காய்   ஏதும்
            --எண்ணாமல்   வாழ்வெல்லாம்   ஏது   மற்ற
எளியவரை   உயர்த்துகின்ற   தவமி   யற்றி
            --ஏசுவாக    ஏளனத்தின்   சிலுவை    யேற்று
நலிந்தவரே   சுற்றமென்று   கன்னி   யாக
            --நடப்பதற்கும்   இயலாமல்   தளர்ந்த   போதும்
மெலியாத   இரக்கத்தில்   உழைத்தொ   ளிர்ந்த
            --மேதினியின்   ஒளிவிளக்கு   தெரசா   அன்னை !

வேலிக்குள்   சிறைபட்டுப்    போயி   டாமல்
            --வேண்டியவர்    ஆட்சிக்குப்   பணிந்தி    டாமல்
போலியற்ற   மனிதநேயத்   தொண்டென்   னும்நற்
            --போர்வையாகி   வேதனைக்கு   மருந்தாய்ப்   போர்த்தி
வேலியாகி   நாதியற்றோர்   காப்பாய்   நின்று
            --வெண்மையுடை   அகமாகி   அன்பே   சொல்லாய்க்
காலிரண்டில்   உலகளந்து    அருள்பொ   ழிந்த
            --கண்பார்த்த   கடவுள்தாம்    தெரசா   அன்னை !

by **அ.இராமநாதன்** Wed Sep 09, 2015 3:49 pm

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

அன்னை தெரசா

அன்னை தெரசா

Re: அன்னை தெரசா