-

 காபலி சக்கரவர்த்தியிடம் மூன்று அடிகளைக் கேட்டு
வாமனனாக வந்த திருமால் திரிவிக்ரம வடிவம் எடுத்து
மூன்று உலகத்தையும் தமது பெரிய திருவடியால் அளந்தார்.
-
அவரது மருமகனாகிய முருகனுடைய இளம் திருவடியோ
மயில் மீதும் தேவர்கள் தலை மீதும் திருப்புகழ் ஏடு ஆகிய
மூன்று இடங்களில் பட்டன என்று அருமையாகச் சொல்லுவார்
அருணகிரி நாத சுவாமிகள்.
-
தேவர் முனிவர் போற்றும் திருமுருகனது திருப்பாதங்கள்
வள்ளியின் அன்புக்காக காடும் மழையும் நடந்தன. அதனை
ஏற்று வள்ளிமலையில் வள்ளி நாயகியை நயந்து மணந்து
கொண்ட முருகன் திருத்தணி செல்லும் வழியில் ஞானமலைக்கு
வந்து தங்கிப் பின் சென்றதாக நம்பப்படுகிறது.
-
“முத்தைத் தரு பத்தித் திருநகை அத்திக்கிறை சத்திச் சரவண’
என்ற முதலடி எடுத்துக் கொடுத்து அருணகிரிநாதரை
ஆட்கொண்ட கந்தப் பெருமான், திருவண்ணாமலையிலிருந்து
அவரை வயலூருக்கு “வா’ என்றழைத்து அங்கே பொய்யாக்
கணபதியின் அருளால் திருப்புகழைப் பாடும் முறையை
உபதேசித்தான்.
-
அங்கிருந்து பல மலைகளையும் பல தலங்களையும் தரிசித்துச்
செல்லும் வழியில் ஆங்காங்கே பல அனுக்ரங்களை அருளிச்
செய்கிறார் இறைவன். அவரை ஞானமலைக்கு அழைக்கிறார்
ஞானபண்டித சாமி.
-
ஞானமலைக்கு வந்த அருணகிரிநாதருக்கு அவரது வேண்டு
கோளை ஏற்று முன்பு திருவண்ணாமலையில் திருவடி தீட்சை
அருளியவாறு திரும்பவும் திருவடி தரிசனம் அளித்து அவருக்கு
யோகாநுபூதியை அருள்பாலிக்கிறார் ஞானவடிவேலவன்.
-
அருணகிரிநாதரால் திருப்புகழில் சிறப்பிக்கப்பட்டுள்ள
“ஞானமலை’ வேலூர் மாவட்டத்தில் காவேரிப்பாக்கம் அருகில்
உள்ள கோவிந்தாச்சேரி என்ற கிராமத்தில் மலைக்கோயிலாக
அமைந்துள்ளது. சோளிங்கர் (பாணாவரம்) ரயில்
நிலையத்திலிருந்து 5 கி.மீ. தொலைவில் உள்ள மங்கலம்
கிராமத்திலிருந்து செல்லலாம்.
-
மலைமீது பிரம்ம சாஸ்தா வடிவத்தில் முருகப்பெருமானை
வள்ளி தேவசேனாவுடன் தரிசிக்கலாம். மேலும் ஞானவெளி சித்தர்
சமாதியின் மேல் லிங்கவடிவில் ஞானகிரீஸ்வரர் அருள்பாலிக்கிறார்.
சிவன் சந்நிதிக்குப் பின்புறம் முருகப்பெருமான் பாதங்கள் பதிந்த
புனிதமான இடம் வழிபாட்டில் உள்ளது.
-
இத்தலத்தில் அருணகிரிநாதருக்கு காட்சியளித்த குறமகள் தழுவிய
குமரனின் கற்சிலை மற்றும் உற்சவத் திருமேனிகளைக் காண கண்
கோடி வேண்டும்.
–
————————————

– வலையப்பேட்டை ரா. கிருஷ்ணன்
வெள்ளிமணி