ரியல் சார்ஜ்!

by **அ.இராமநாதன்** Wed Jul 13, 2016 2:57 am

வீட்டிலிருந்து எங்கே கிளம்பினாலும் சரி. புறப்படுவதற்கு முன்னாள் செல்ஃபோனை எடுத்துப் பார்க்கிறோம். பேட்டரியில் தேவையான அளவு சார்ஜ் இருக்கா? திரும்பி வர்றவரைக்கும் போதுமா?
ஒருவேளை போதாது என்றால்.. சொல்லுமிடத்தில் எங்கேயாவது சார்ஜ் போடுகிறோம். சிலர் காரிலேயே செல்ஃபோனை சார்ஜ் செய்து கொள்கிறார்கள். இதற்கென்றே External Charger ஒன்றைத் தூக்கிச் செல்கிறவர்களும் உண்டு.
செல்ஃபோன் பேட்டரியின் சார்ஜூக்கே இவ்வளவு முக்கியத்துவம் தருகிற நாம், நம்முடைய உள்பேட்டரியில் சார்ஜ் இருக்கிறதா என்று கவனிக்கிறோமா?

அதென்ன உள்பேட்டரி?
ஒரே வேலையை இரண்டு வெவ்வேறு நபர்களுக்குக் கொடுக்கிறோம். இரண்டுபேரும் ஒரேமாதிரியா வேலைசெய்கிறார்கள்? சிலர் சுறுசுறுப்பாக அந்த வேலையை ஏற்றுக் கொண்டு செய்து முடிக்கிறார்கள். சிலர் ஏனோதானோ என்று செய்கிறார்கள். அல்லது மற்றவர்கள் தங்களை வழிநடத்தவேண்டும் என்று காத்திருக்கிறார்கள்.
அதற்காக இரண்டாவது வகையினர் திறமையற்றவர்கள் என்று எண்ணிவிடக்கூடாது. அவர்களும் திறமைசாலிகள்தான். ஆனால் அவர்களுக்குள்ளே பேட்டரியில் சார்ஜ் வற்றிப்போயிருக்கிறது. மீண்டும் சார்ஜ் ஏறும்வரை அவர்கள் இப்படித்தான் தூங்கிவழிவார்கள்.
இங்கே சார்ஜ் என்றால் சாப்பாடு, தண்ணீர், கார், வீடு, மனைவி, மக்கள் போன்றவை அல்ல, அதற்கும்மேலே ஒன்று இருக்கிறது. அதுதான், தன்முனைப்பு. அந்த பேட்டரியில் சார்ஜ் உள்ளவரை நாம் சுறுசுறுப்பாக எந்த வேலையையும் செய்வோம். இல்லாவிட்டால் சோர்ந்துவிடுவோம். இதனைப் புரிந்துகொண்டு பேட்டரியை எப்போதும் சார்ஜில் வைத்துக் கொள்ள வேண்டும். அப்போதுதான் எதிலும் வெற்றிபெற இயலும் என்கிறது ஒரு சமீபத்திய புத்தகம், 'Are you fully Charged?' என்ற அந்தப் புத்தகத்தை எழுதியவர் டாம் ரேத்.
நம்முடைய பாட்டரியை சார்ஜ் செய்வது எப்படி?
மூன்று எளிய வழிகளைச் சொல்கிறார் டாம் ரேத். 'அர்த்தம், உறவுகள், ஆற்றல்'

அர்த்தம்:
முதலாவதாக நம் வாழ்க்கையின் அர்த்தம் என்ன என்று தேட ஆரம்பிக்கவேண்டும். தேடிச்சோறு நிதம்தின்று என்று ஒரு பாரதி பாடல் வருமே. அதற்காகவே நாம் வாழ்கிறோம்? நாமும் அந்த வேடிக்கை மனிதர்களில் ஒருவர்தானா? எல்லாரும் செய்வதையே செய்வதற்கா நாம் பிறந்தோம்? தனித்துவமாக நாம் என்ன செய்யப் போகிறோம்? இந்த உலகுக்கு நம் பங்களி்ப்பு என்ன?
உதாரணமாக எல்லா வசதிகளும் இருக்கிற ஒருவர் ஞாயிற்றுக்கிழமைகளில் ஒரு முதியோர் இல்லத்துக்குச் சென்று அங்குள்ளவர்களுக்குப் புத்தகம் படித்துக் காட்டுகிறார். அதில்தான் அவருடைய வாழ்க்கை ஓர் அர்த்தம் கிடைப்பதாக அவருக்குத் தோன்றுகிறது. அந்த ஒருநாள், அடுத்த ஆறுநாள்களுக்கு அவருடைய பேட்டரியை முழுசார்ஜில் வைத்திருக்கிறது.
இதுபோல், உங்கள் வாழ்க்கைக்கு அர்த்தம் தருவது என்ன? ஒரு கவிதை, ஒரு கண்டுபிடிப்பு, நான்கு அன்பான மனிதர்கள், ஏழெட்டுப் புன்னகை முகங்கள்... இவையெல்லாம் காசைவிட முக்கியம்!

உறவுகள்: நம்மைச் சுற்றியிருக்கிற எல்லாருடனும் நாம் எப்படிப் பழகுகிறோம்?
தனித்து ஜெயிப்பதில் மகிழ்ச்சி இல்லை. உங்களுடைய முயற்சிகள் ஒவ்வொன்றிலும் தகுதியுள்ளவர்களை உடன் அழைத்துச் செல்லுங்கள். அவர்ளுடைய பலவீனங்களை நீங்கள் நிரப்புங்கள். உங்கள் பலவீனங்களை அவர்கள் நிரப்பட்டும், அனைவரும் சேர்ந்து பலமடங்கு ஜெயிக்கலாம்.

ஆற்றல்:
நிறைவாக ஆற்றலைப் பெருக்கிக் கொள்ளுங்கள். உங்கள் உடல்நலத்தைக் கவனியுங்கள், சரிவிகித உணவுகளைச் சாப்பிடுங்கள். எதைச் சாப்பிட்டால் உங்களுடைய மனோநிலை எப்படி மாறுகிறது என்பதைத் தெரிந்துகொண்டு, அதற்கேற்ப உங்கள் உணவுப் பழக்கத்தை அமைத்துக் கொள்ளுங்கள்.
அதேபோல், நீங்கள் நினைப்பது ஏதேனும் நடக்காவிட்டால் பதற்றப்படாதீர்கள். தோலவிகளைக் கண்டு துவண்டுவிடாமல் எதிர்த்து நிற்கும் திறனை வளர்த்துக் கொள்ளுங்கள். புன்னகையை ஒருபோதும் மறக்க வேண்டாம்.
இதையெல்லாம் ஒழுங்காகச் செய்தால், உங்களுக்குள் இருக்கும். பேட்டரியில் எப்போதும் சார்ஜ் குறையாது.

என். சொக்கன்
குமுதம்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

ரியல் சார்ஜ்!

ரியல் சார்ஜ்!