சென்னை, டிச. 28-
பிரதமர் மன்மோகன் சிங் ஜனவரி 2-ம் தேதி இரவு சென்னை வருகிறார். ஜனவரி 3-ம் தேதி நடைபெறும் இரண்டு நிகழ்ச்சிகளில் அவர் பங்கேற்கிறார்.

டெல்லியிலிருந்து ஜனவரி 2-ம் தேதி இரவு சென்னை வரும் பிரதமர், ஆளுநர் மாளிகையில் தங்குகிறார். இதன்பின், ஜனவரி 3-ம் தேதி சென்னை அருகேயுள்ள எஸ்.ஆர்.எம். பல்கலைக்கழக நிகழ்ச்சியில் பங்கேற்கிறார். இதற்காக, ஆளுநர் மாளிகையில் இருந்து சென்னை விமான நிலையம் செல்லும் அவர் அங்கிருந்து தனி ஹெலிகாப்டர் மூலம் பல்கலைக்கழகம் செல்கிறார். இதற்காக, பல்கலைக்கழக மைதானம் தயார் நிலையில் வைக்கப்பட்டுள்ளதாக அதிகாரிகள் தெரிவித்தனர்.

எஸ்.ஆர்.எம். பல்கலைக்கழக நிகழ்ச்சி காலை 10 மணிக்கு நடைபெறுகிறது. அந்த நிகழ்ச்சியை முடித்துக் கொண்டு தமிழக அரசின் சார்பில் சென்னை அடையாறில் அமைக்கப்பட்டுள்ள பூங்காவை திறந்து வைக்கிறார். காலை 11.30 மணிக்குத் தொடங்கும் இந்த நிகழ்ச்சி, நண்பகல் 12.30 மணிக்கு நிறைவடைகிறது. இந்த நிகழ்ச்சியில் பங்கேற்று விட்டு நேரடியாக விமான நிலையம் செல்லும் பிரதமர் மன்மோகன் சிங் அங்கியிருந்து டெல்லிக்கு பயணமாகிறார்.

பிரதமர் மன்மோகன் சிங்குக்கு தீவிரவாத அச்சுறுத்தல் இருப்பதால் பாதுகாப்பு அதிகரிக்கப்பட்டுள்ளதாக உள்துறை வட்டாரங்கள் தெரிவிக்கின்றன. சென்னைக்கு மிக அருகிலுள்ள பல்கலைக்கழகத்துக்குச் செல்ல சாலை வழியாக செல்லும் வாய்ப்பு இருந்தாலும் பாதுகாப்பு காரணங்கள் கருதி ஹெலிகாப்டர் மூலம் செல்கிறார். மேலும், பிரதமரின் வருகையை ஒட்டி செய்யப்பட வேண்டிய பாதுகாப்பு ஏற்பாடுகள் குறித்து ஆய்வு செய்ய தேசிய பாதுகாப்புப் படையினர் (என்.எஸ்.ஜி.) இன்று சென்னை வருகின்றனர். பாதுகாப்பு ஏற்பாடுகள் தொடர்பாக ஆய்வு செய்யும் அவர்கள், தமிழக போலீஸ் துறையைச் சேர்ந்த உயரதிகாரிகளுடனும் ஆலோசனை நடத்துவார்கள் எனத் தெரிகிறது.

இந்தியா முழுவதும் 2ஜி அலைக்கற்றை விவகாரம் சூடுபிடித்துள்ள நிலையில், பிரதமர் தமிழகம் வருகிறார். அடையாறு பூங்கா திறப்பு விழா, தமிழக அரசின் நிகழ்ச்சி என்பதால் அதில் முதல்வர் கருணாநிதி, துணை முதல்வர் மு.க.ஸ்டாலின் உள்ளிட்டோருடன் பிரதமர் மன்மோகன் சிங்கும் கலந்து கொள்கிறார். 2ஜி அலைக்கற்றை விவகாரம் விஸ்வரூபம் எடுத்ததற்குப் பிறகு, திமுக தலைமையை பிரதமர் சந்திப்பது இதுவே முதல் முறை என்பது குறிப்பிடத்தக்கது.


நன்றி : கூடல்