கிழக்கு கடற்கரை சாலையில் பந்தயம்: 9 சொகுசு கார்கள் பறிமுதல்

by **அ.இராமநாதன்** Mon Feb 27, 2017 7:57 am

[You must be registered and logged in to see this image.]

பிப்ரவரி 27
-
சென்னை கிழக்கு கடற்கரை சாலையில், கார் பந்தயத்தில் ஈடுபட்டு அதிகவேகமாகச் சென்றதாக 9 சொகுசு கார்களை போலீஸார் பறிமுதல் செய்தனர். அவற்றை தடுத்து நிறுத்த முயன்ற காவல் ஆய்வாளர் மீது காரை ஏற்ற முயன்றதாக, ஒருவர் கைது செய்யப்பட்டுள்ளார்.

இந்தச் சாலையில் கானத்தூர் அருகே போக்குவரத்து போலீஸார் ஞாயிற்றுக்கிழமை காலை 5.45 மணியளவில் வாகனச் சோதனையில் ஈடுபட்டிருந்தனர்.

அப்போது அந்த வழியாக வந்த பல கோடி ரூபாய் மதிப்பிலான சொகுசுக் கார்கள் அதிவேகத்தில் சீறிப்பாய்ந்து சென்றன. போலீசார் தடுத்து நிறுத்த முயன்றபோது அவையனைத்தும் நிற்காமல் வேகமாகச் சென்றன.

ஆய்வாளரின் காலில் ஏறிச் சென்ற கார்!

அப்போது, ஒரு கார் கானத்தூர் போக்குவரத்து காவல் ஆய்வாளர் சௌந்திரபாண்டியின் காலில் ஏற்றியபடி சென்றது. தகவலின்பேரில் உத்தண்டி சுங்கச்சாவடி போலீஸார் 9 கார்களை மடக்கிப் பிடித்தனர். எனினும், 6 சொகுசு கார்கள் நிற்காமல் சென்று விட்டன.

இதையடுத்து, கானத்தூர் காவல் நிலையத்துக்கு அழைத்து வந்து கார் உரிமையாளர்களிடம் போலீஸார் நடத்திய விசாரணையில், அவர்கள் புரசைவாக்கம், நுங்கம்பாக்கம் உள்ளிட்ட பகுதிகளைச் சேர்ந்த முக்கியப் பிரமுகர்களின் மகன்கள் என்பது தெரியவந்தது.

இளைஞர்கள் மது அருந்தியிருந்தார்களா என சோதனையும் நடத்தப்பட்டது. இந்த நிலையில், ஆய்வாளரின் காலில் ஏற்றிவிட்டு காரை நிறுத்தாமல் சென்றதாக அதை ஓட்டிய ராகவ்கிருஷ்ணாவை போலீஸார் கைது செய்தனர்.

மிரட்டல் விடுக்கப்பட்டதா?

விசாரணை நடத்திக் கொண்டிருக்கும் நேரத்தில் பிடிபட்ட நபர்களை எச்சரித்துவிட்டு அனுப்பும்படியும் தேவைப்பட்டால் சாதாரண வழக்கு மட்டும் பதியும்படியும் உயரதிகாரிகள், பல்வேறு முக்கிய பிரமுகர்களிடமிருந்து அழைப்புகள் வந்தததாகக் கூறப்படுகிறது.

காரை புகைப்படம் எடுத்த இளைஞர்கள்!

பறிமுதல் செய்யப்பட்டு வரிசையாக நிறுத்தப்பட்டிருந்த கார்களை பொதுமக்கள் வியப்புடன் பார்த்துச் சென்றனர். சிலர் கார்களின் அருகே நின்று செல்லிடப்பேசியில் புகைப்படம் எடுத்துக் கொண்டனர்.

மோட்டார் சைக்கிள் பந்தயம் குறித்தும் விசாரணை?

இந்தச் சம்பவம் நடைபெற்ற நேரத்தில் மாமல்லபுரத்தில் இருந்து உத்தண்டியை நோக்கி அதிவேகமாகச் சென்ற 20-க்கும் மேற்கண்ட பந்தய மோட்டார் சைக்கிள்கள் குறித்தும் விசாரணை நடக்கிறது.

இந்த நிலையில், கிழக்கு கடற்கரை சாலையில் விடுமுறை நாள்களில் மோட்டார் சைக்கிள்- கார் பந்தயம் அதிக அளவில் நடைபெற்றுவருவது தொடர்பாக உரிய நடவடிக்கை எடுக்க வேண்டும் என்றே பொதுமக்கள் எதிர்பார்க்கின்றனர்.

-

தினமணி

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

கிழக்கு கடற்கரை சாலையில் பந்தயம்: 9 சொகுசு கார்கள் பறிமுதல்

கிழக்கு கடற்கரை சாலையில் பந்தயம்: 9 சொகுசு கார்கள் பறிமுதல்