புது தில்லி, டிச. 30: பொறியியல் கல்லூரி சேர்க்கையில் பொருளாதாரத்தில் பின்தங்கிய மாணவர்களுக்கு 5 சதவீத இடஒதுக்கீடு அளிக்க வேண்டும் என்று மத்திய மனிதவள அமைச்சகம் உத்தரவிட்டுள்ளது.
அகில இந்திய தொழில்நுட்பக் கல்வி கவுன்சிலின் (ஏஐசிடிஇ) விதிகளில் திருத்தங்கள் மேற்கொள்ளப்பட்டு புதிய விதிகள் அடங்கிய பட்டியல் தில்லியில் வியாழக்கிழமை வெளியிடப்பட்டது. மத்திய மனித வள மேம்பாட்டுத் துறை அமைச்சர் கபில் சிபில் புதிய விதிகளை வெளியிட்டார்.
"ஏஐசிடிஇ அங்கீகாரம் பெற்ற அனைத்து தொழில்நுட்ப கல்லூரிகளிலும் பொருளாதாரத்தில் பின்தங்கிய மாணவர்களுக்கு 5 சதவீத இடஒதுக்கீடு அளிப்பது கட்டாயமாக்கப்பட்டுள்ளது.' என்று அமைச்சர் கபில் சிபல் தெரிவித்தார்.
இதற்கு முன்பு "கல்விக் கட்டண ரத்து திட்டம்' நடைமுறையில் இருந்தது. இதன்மூலம் பொருளாதாரத்தில் பின்தங்கிய மாணவர்களுக்கு 10 சதவீதம் வரை இடங்கள் ஒதுக்கலாம். ஆனால், பெரும்பாலான கல்லூரிகள் இதனை நடைமுறைப்படுத்தவில்லை. எனவே, கட்டாயமாக 5 சதவீத இடஒதுக்கீடு அளிக்கும் வகையில் விதிகளில் திருத்தம் மேற்கொள்ளப்பட்டுள்ளது என்று அவர் மேலும் தெரிவித்தார்.
ஒவ்வொரு பாடத்திட்டத்திலும் மாணவர் சேர்க்கையை 40-ல் இருந்து 60 ஆக உயர்த்திக் கொள்ளலாம் என்றும் அவர் அறிவித்தார்.
இந்தத் திட்டத்தின் மூலம் நாடு முழுவதும் பொறியியல் கல்லூரிகளில் 2 லட்சம் கூடுதல் இடங்கள் கிடைக்கும். இதேபோல் மேலாண்மை பாடத்திட்ட கல்லூரிகளில் 80 ஆயிரம் இடங்கள் அதிகரிக்கப்படும் என்று ஏஐசிடிஇ அதிகாரிகள் தெரிவித்தனர்.
கிராமங்களில் பொறியியல் கல்லூரி தொடங்க 10 ஏக்கர் நிலமும், நகரங்களில் தொடங்க 2.5 ஏக்கரும் போதுமானது என்றும் விதிகளில் திருத்தம் மேற்கொள்ளப்பட்டுள்ளது.
மேலும், பொறியியல் கல்லூரிகள் இல்லாத 241 மாவட்டங்களில் புதிய கல்லூரிகள் தொடங்க கார்ப்பரேட் நிறுவனங்கள் முன்வந்தால் அந்த நிறுவனங்களுக்கு அனுமதி அளிக்கப்படும் என்றும் அமைச்சர் கபில் சிபல் தெரிவித்தார்.

நன்றி :தினமணி