அமெரிக்க கச்சா எண்ணெய் இறக்குமதி துவங்கியாச்சு!

by **அ.இராமநாதன்** Sun Aug 20, 2017 12:48 pm

புதுடில்லி:
அமெரிக்காவில் இருந்து கச்சா எண்ணெய் இறக்குமதி முதல் முறையாக துவங்கி உள்ளது. அமெரிக்காவில் இருந்து புறப்பட்ட கப்பல், ஒடிசா மாநிலத்திற்கு செப்., மாத இறுதியில் வரும் என எதிர்பார்க்கப்படுகிறது.

பிரச்னை என்ன?
ஓ.பி.இ.சி., எனப்படும் கச்சா எண்ணெய் ஏற்றுமதி செய்யும் நாடுகள், உற்பத்தி அளவை குறைத்துள்ளன. இதனால், அதிக கந்தகதன்மை கொண்ட கச்சா எண்ணெய் விலை கணிசமாக உயர்ந்துள்ளது. இதற்கு மாற்றாக, அமெரிக்காவில் இருந்து கச்சா எண்ணெய் ஏற்றுமதிக்கு இருந்த, 40 ஆண்டுகால தடையை, 2015ம் ஆண்டு டிசம்பர் மாதம் அப்போதைய அதிபர் ஒபாமா நீக்கினார்.

இதனால், அமெரிக்காவில் இருந்து கச்சா எண்ணெய் இறக்குமதி செய்யும் வாய்ப்பு ஏற்பட்டது. ஏற்கனவே, தென் கொரியா, ஜப்பான் மற்றும் சீனா நாடுகள் அமெரிக்காவில் இருந்து கச்சா எண்ணெய் இறக்குமதி செய்து வருகின்றன.

மோடி - டிரம்ப் பேச்சு

பிரதமர் மோடி அமெரிக்க பயணம் மேற்கொண்ட போது,கடந்த ஜூன், 26ம் தேதி அந்நாட்டு அதிபர் டிரம்புடன் பேசினார். அப்போது கச்சா எண்ணெய் வர்த்தகம் குறித்தும் பேசப்பட்டது. இதன் தொடர்ச்சியாக, இந்தியன் ஆயில் நிறுவனம் கடந்த ஜூலையும், கடந்த ஆக., 10ம் தேதியும் இரண்டு கட்டமாக அமெரிக்க கச்சா எண்ணெய் இறக்குமதிக்கு கடிதம் கொடுத்தது. பாரத் பெட்ரோலியம் நிறுவனமும் முதல் கட்டமாக கடிதம் கொடுத்துள்ளது. இந்துஸ்தான் பெட்ரோலியம் நிறுவனமும் விரைவில் கடிதம் கொடுக்க உள்ளது.

இந்திய தூதரகம் தகவல்

இந்த சூழ்நிலையில், அமெரிக்காவின் டெக்சாஸ் மாகாணத்தில் இருந்து இந்தியாவிற்கு கச்சா எண்ணெய் ஏற்றிய கப்பல்கள், கடந்த, 6ம் தேதி முதல், 14ம் தேதி வரை புறப்பட்டன. முதல் கட்டமாக 20 லட்சம் பேரல் கச்சா எண்ணெய் கொண்டு வரப்படுகிறது. இதன் விலை, 6,400 கோடி ரூபாயாக இருக்கும் என கணிக்கப்பட்டுள்ளது.

அமெரிக்க கச்சா எண்ணெய் சுத்திகரிப்பு செலவு குறைவு என்பதும் இந்திய நிறுவனங்களின் ஆர்வத்திற்கு காரணமாக உள்ளது. அமெரிக்காவில் இருந்து புறப்பட்ட கப்பல்கள், ஒடிசா மாநிலம், பாரதீப் துறைமுகத்திற்கு செப்., மாத இறுதியில் வரும் என எதிர்பார்க்கப்படுகிறது. கச்சா எண்ணெய் இறக்குமதிக்குரிய கடிதத்தை டெக்சாஸ் மாகாண கவர்னர் கிரேக் அபோட்டிடம், அமெரிக்காவிற்கான இந்திய தூதர் நவதீப் சர்னா வழங்கினார்.

இது குறித்த தகவலை அமெரிக்காவில் உள்ள இந்திய தூதரகம் தனது இணைய தளத்தில் வெளியிட்டுள்ளது.

தினமலர்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

அமெரிக்க கச்சா எண்ணெய் இறக்குமதி துவங்கியாச்சு!

அமெரிக்க கச்சா எண்ணெய் இறக்குமதி துவங்கியாச்சு!