[You must be registered and logged in to see this image.]

சாலிகிராமத்தில், விருத்தம்மாள் என்ற மூதாட்டி வாழ்ந்து வந்தார். 
இறைவழிபாட்டால் எதையும் சாதிக்க முடியும் என்ற நம்பிக்கை 
அவருக்கு இருந்தது. 

அந்த ஊரில், யார் துன்புற்றாலும், அவர் வீட்டிற்கு சென்று, அன்பாக 
பேசுவார்.

'இறைவன் உங்கள் நோயை முழுமையாக குணப்படுத்துவார்; 
உங்கள் கஷ்டம் நீங்கும்; என் வழிபாட்டிற்கு அவர் செவி சாய்ப்பார்; 
நீங்கள் பழைய நிலையை அடைவீர்கள்' என்று ஆறுதல் சொல்வார்.

அந்த பாட்டியின் உறுதியான நம்பிக்கை குறித்து, எல்லாரும் புகழ்ந்து 
பேச துவங்கினர்.

ஒருமுறை, குறும்புக்கார இளைஞன் ஒருவன், ''பாட்டி, நீங்கள் 
எப்போதும் கடவுளை வழிபடுகிறீர்கள். வழிபாட்டை இறைவன் 
கேட்கிறார்; நமக்கு உதவி செய்கிறார் என்று உண்மையிலேயே 
நம்புகிறீர்களா...'' என்று கேட்டான்.

''அதில் என்ன சந்தேகம்; நம் வேண்டுதலை இறைவன் கேட்கிறார்; 
நமக்கு உதவி செய்கிறார் என்பதை, உறுதியாக நம்புகிறேன்.'' 

''நான் பண தேவையால் துன்பப் படுகிறேன். 10 ஆயிரம் ரூபாய்
 இருந்தால், என் சிக்கல் தீரும்; நீங்கள், இறைவனிடம் வேண்டி 
எனக்கு, பணம் கிடைக்க செய்யுங்கள்.'' 

''தம்பி... நான் ஒன்று கேட்கிறேன்... இப்போ உன்னை முகம் 
தெரியாத நபரிடம் அறிமுகம் செய்து வைக்கிறேன்; 
நீ, உடனே, அவர் பையில் கை விட்டு, பணம் எடுப்பாயா...'' 

''அது எப்படி முடியும்...'' 

''என்ன செய்தால், அவர் பையில் இருந்து பணம் எடுக்க உரிமை 
கிடைக்கும்...'' 

''நான் அவருடன் நெருங்கி பழக வேண்டும்; பின் தான், அவர் 
பையில் பணம் எடுக்கும் உரிமையை பெறுவேன்.'' 

''அதே முறையை தான் கடவுளிடமும் பின்பற்ற வேண்டும். அவரை 
வணங்கி வணங்கி, நெருக்கம் பெற வேண்டும். அதன்பின், 
எதையும் கேட்கும் உரிமை நமக்கு கிடைக்கும்.'' 

இவ்வாறு மூதாட்டி சொன்னதை கேட்ட வாலிபன், 
''நீங்கள் சொல்வதும் உண்மை தான்; நானும் அப்படியே 
செய்கிறேன்,'' என்று புத்தி தெளிந்தவனாய் விடைபெற்றான்.
-
------------------------------------------
சிறுவர் மலர்