சென்னை மணலி அம்பேத்கர் நகர் பகுதியைச் சேர்ந்தவர் 
வெங்கடேசன் (37). சென்னை பெட்ரோலியம் கார்ப்பரேஷன் 
லிமிடெட் நிறுவனத்தில் ஒப்பந்த ஊழியராக பணியாற்றி 
வந்தார்.

 கடந்த 5-ம் தேதி, வீட்டின் மாடியில் இருந்து கீழே இறங்கும்போது 
தவறி விழுந்தார். இதில் அவரது தலையின் பின்பகுதியில் பலத்த 
காயம் ஏற்பட்டது. அவருக்கு ராயபுரத்தில் உள்ள அரசு ஸ்டான்லி 
மருத்துவமனையில் தீவிர சிகிச்சை அளிக்கப்பட்டு வந்தது.

இந்நிலையில் நேற்று அதிகாலையில் அவர் மூளைச்சாவு அடைந்தார். 
அவருடைய உடல் உறுப்புகளைத் தானம் செய்ய உறவினர்கள் 
முன்வந்தனர். இதையடுத்து மருத்துவமனை டீன் பொன்னம்பல 
நமச்சிவாயம் தலைமையில் டாக்டர்கள் அவரது உடலில் இருந்து 
சிறுநீரகங்கள், கல்லீரல், தோல் ஆகியவற்றை எடுத்தனர். 

வலது சிறுநீரகம் அரசு ஸ்டான்லி மருத்துவமனையில் சிகிச்சைப் 
பெறும் நோயாளிக்கும், இடது சிறுநீரகம் கீழ்ப்பாக்கம் அரசு 
மருத்துவமனை யில் சிகிச்சையில் இருக்கும் நோயாளிக்கும் 
பொருத்தப்பட்டது. 

கண்கள் எழும்பூர் அரசு கண் மருத்துவமனைக்கு வழங்கப்பட்டது. 
அவரது தோல் அரசு ஸ்டான்லி மருத்துவமனை தோல் வங்கியில் 
பாதுகாப்பாக வைக்கப்பட்டுள்ளது.

கைகள் தானம்

திண்டுக்கல்லைச் சேர்ந்த 29 வயது இளைஞர் ஒருவர் மின்சார 
விபத்தில் தனது இரண்டு கைகளையும் இழந்தார். 
அரசு ஸ்டான்லி மருத்துவமனையில் சிகிச்சைப் பெற்று வரும் 
அவருக்கு பொருத்துவதற்காக மூளைச்சாவு அடைந்த 
வெங்கடேசனின் கைகளை உறவினர்களின் சம்மதத்துடன் 
டாக்டர்கள் தானமாக பெற்று,கைகளைப் பொருத்தும் அறுவைச்
 சிகிச்சை நேற்று காலை 7 மணிக்கு தொடங்கியது. 

இரவு 8 மணி வரை தொடர்ந்து 13 மணி நேரம் அறு வைச் சிகிச்சை 
நடந்தது. கை கள் வெற்றிகரமாக பொருத்தப்பட்ட இளைஞர் 
டாக்டர்களின் கண்காணிப்பில் உள்ளார்.

பொதுவாக மூளைச்சாவு அடைந்தவர்களிடம் இருந்து சிறுநீரகங்கள், 
கல்லீரல், இதயம், நுரையீரல், கண்கள் போன்றவை தானமாக
 பெறப்பட்டு தேவையானவர்களுக்கு பொருத்தப்படும். 

இம்முறை மூளைச்சாவு அடைந்த வெங்கடேசனிடம் இருந்து 
கைகளும் தானமாக பெறப்பட்டுள்ளது. இதன்மூலம் தமிழகத்தில் 
முதல்முறையாக மூளைச்சாவு அடைந்தவரிடம் இருந்து கைகள்
 தானமாக பெறப்பட்டு, விபத்தில் கைகளை இழந்தவருக்கு 
பொருத்தப்பட்டுள்ளது. 

அரசு ஸ்டான்லி மருத்துவமனையில் கைகள் மாற்று அறுவைச்
 சிகிச்சை வெற்றிகரமாக செய்யப்பட்டுள்ளது என்று டாக்டர்கள் 
தெரிவித்தனர்.

கைகளைத் தானம் செய்தது பற்றி வெங்கடேசனின் உறவினர் 
மன்னா முகமது கூறும்போது, “முதலில் உடல் உறுப்புகளை மட்டும்
தான் தானம் கொடுப்பதாக தெரிவித்தோம். விபத்தில் இரண்டு 
கைகளையும் இழந்த நிலையில் ஒரு இளைஞர் சிகிச்சைப் பெற்று 
வருகிறார். அவருக்கு கைகள் தேவைப்படுகிறது. 

முதல் முறையாக கைகளை தானம் செய்த பெருமை உங்கள் 
குடும்பத்துக்கு கிடைக்கும் என்று டாக்டர்கள் சொன்னார்கள். 
அதனால் உடல் உறுப்புகளுடன் சேர்த்து கைகளையும் தானமாக 
கொடுத்தோம்” என்றனர்.
-
---------------------------------
தி இந்து
\