புதுடெல்லி: 
காதலியின் கரம் பிடிக்க சைக்கிளிலேயே காடு, மலை தாண்டி
 ஸ்வீடனுக்கு சென்று வெற்றி கண்ட இந்தியரின் வாழ்க்கை 
வரலாற்றை அவரது பிள்ளைகள் சினிமாவாக எடுக்க உள்ளனர். 

கடந்த 1970ம் ஆண்டு நடந்த சுவாரஸ்யமான காதல் சம்பவம் 
அது. ஒடிசாவின் சிறு கிராமத்தில் ஏழ்மையான குடும்பத்தில் 
பிறந்த சிறுவன் ‘பிகே’ என்ற பிரத்யும்ன குமார். 

நண்பர்களுடன் விளையாடும்போது அவருக்கு ஓலைச்சுவடி 
ஒன்று கிடைத்தது. அதில், ‘நீ திருமணம் செய்து கொள்ளப்
போகும் பெண் இந்த கிராமத்தை சேர்ந்தவள் அல்ல, இந்த 
நாட்டை சேர்ந்தவளும் அல்ல. வனத்திற்கே சொந்தக்காரியான 
அவள் அழகானவள்’ என்ற வாக்கியங்கள் இடம்பெற்றிருந்தன. 

அதையே வேதவாக்காக ஏற்றுக் கொண்ட பிகே, பின்னாளில் 
ஓவியக்கலை பயில டெல்லி சென்றார். அங்கு பணமின்றி 
தனது இளமைக்காலத்தில் பெரிதும் கஷ்டப்பட்டார். 

ஆனாலும், ஓவியக் கலையில் நன்கு தேர்ந்தார். அதையே தனது 
தொழிலாகவும் கொண்டார். இந்திரா காந்தி, 
பக்ருதீன் அலி அகமது போன்றவர்களின் ஓவியங்களை
 தத்துரூபமாக வரைந்தார். 

ஒருவரின் முகத்தை அச்சு பிசகாமல் அழகாக வரைவதில்
 கைதேர்ந்தவர் என பெயரும் பெற்றார்.

 அப்போதுதான், காதல் தேவதையின் அருள் அவருக்கு கிடைத்தது. 
பிகே பற்றி கேள்விப்பட்ட ஸ்வீடனை சேர்ந்த 
சர்லோட்டி வான் ஸ்ட்வின், இந்தியா வந்து பிகேவை சந்தித்தார்.
 தனது முகத்தை ஓவியமாக வரைய கூறிய சர்லோட்டி, பிகேவிடம் 
காதலில் விழுந்தார். 

இருவரும் காந்தர்வ மணம் புரிந்தனர். பின்னர், சர்லோட்டி தனது 
சொந்த நாட்டுக்கு சென்று விட்டார். இருவரும் கடிதம் மூலம் 
ஓராண்டாக காதலை தொடர்ந்தனர். இதையடுத்து, காதலியை
 கரம்பிடிக்க முடிவு செய்தார் பிகே. 

ஆனால், ஸ்வீடன் செல்ல விமான டிக்கெட் எடுக்க அவரிடம் 
பணமில்லை. எப்படியும் காதலியை அடைந்தே தீர வேண்டும் 
என்ற அசைக்க முடியாத நம்பிக்கை மட்டும் இருந்தது. 

பெற்றோரின் ஆசியுடன், பழைய சைக்கிள் ஒன்றை வாங்கினார். 
அதில் ஏறி தனது காதல் பயணத்தை தொடங்கினார். 
பாகிஸ்தான், ஆப்கானிஸ்தான், ஈரான், துருக்கி வழியாக 
ஐரோப்பாவை சென்றடைந்தார். வழியில் பல இடங்களில் காடு, 
மலைகளில் இரவு பகலாக சைக்கிள் ஓட்டினார். 
ரயில்களிலும் சைக்கிளுடன் சென்றார். 

இறுதியில் ஸ்வீடன் சென்று காதலியை கரம் பிடித்தார். 
அவரது பெற்றோரின் சம்மதத்துடன் முறைப்படி திருமணமும் 
செய்து கொண்டார். தற்போது ஸ்வீடனின் போரஸ் நகரில் கலை, 
கலாச்சார துறை ஆலோசகராக பணியாற்றி வருகிறார் பிகே. 

அவரது காதல் வாழ்க்கை பயணத்தை பெர் ஆண்டர்சன் 
புத்தகமாக எழுதி வெளியிட்டுள்ளார். இதைத் தொடர்ந்து 
பிகேவின் காதல் காவியம் படமாகவும் தயாரிக்கப்பட உள்ளது. 

இதற்கான முயற்சியில் அவரது மகன் சித்தார்த், மகள் 
எமேலி மகாநந்தியா ஈடுபட்டுள்ளனர். படத்திற்கான கதை 
வசனம் தயாராகிக் கொண்டிருக்கிறது. 

படத்தை பிகேவின் பிள்ளைகளே தயாரித்து வெளியிட இருப்பதாக 
கூறி உள்ளனர். அவரது மகள் எமேலி கூறுகையில், 
‘‘எங்கள் பெற்றோரின் காதல் கதையை மற்றவர்கள் படம் எடுக்க
 
உரிமம் கொடுத்தால், உண்மை கதையை மாற்றிவிடுவார்கள். 
அதனால் நாங்களே தயாரிப்பு நிறுவனத்தை தொடங்கி, 
எங்கள் பெற்றோரின் தெய்வீக காதலின் தன்மை மாறாமல்
 எடுக்க உள்ளோம்’’ என்றார். 

இதற்காக ஹாலிவுட் மற்றும் ஐரோப்பாவின் முன்னணி 
இயக்குநர்கள், தயாரிப்பாளர்களிடம் பேச்சுவார்த்தை நடந்து 
வருகிறது.
-
---------------------------------------
தினத்தந்தி