தாம்பரம்: 
தாம்பரம் பஸ் நிலையத்தில் மின் விளக்குகள் எரியாததால் 
இரவு நேரங்களில் வழிப்பறி சம்பவங்கள் அதிகரித்து உள்ளதால் 
பயணிகள் பீதியில் உள்ளனர். 

இதுகுறித்து நடவடிக்கை எடுக்க வேண்டிய அதிகாரிகளும் 
கண்டும் காணாமல் இருப்பதாக குற்றச்சாட்டு எழுந்துள்ளது.  

தாம்பரம் ஜிஎஸ்டி சாலையில் தாம்பரம் பஸ் நிலையம் 
அமைந்துள்ளது. இங்கிருந்து தி.நகர், வடபழனி, கோயம்பேடு, 
செங்குன்றம், பிராட்வே, மந்தைவெளி, வேளச்சேரி, பாரிமுனை,
 பூந்தமல்லி, திருவான்மியூர் உள்ளிட்ட சென்னையின் முக்கிய 
பகுதிகளுக்கு மாநகர பஸ்கள் இயக்கப்படுகின்றன. 

தினமும் ஆயிரக்கணக்கான பயணிகள் இந்த பஸ் நிலையத்தை 
பயன்படுத்தி வருகின்றனர். குறிப்பாக, புறநகர் பகுதிகளில் 
இருந்து சென்னையின் பல்வேறு பகுதிகளுக்கு சென்று பணி
புரிபவர்கள், பள்ளி, கல்லூரிகளுக்கு செல்பவர்கள் தாம்பரம் 
பஸ் நிலையம் வந்து, அங்கிருந்து பஸ் பிடித்து செல்கின்றனர்.
 
இங்கு, பஸ் நிறுத்த பகுதி நடைமேடையை ஆக்கிரமித்து 
கடைகள் வைக்கப்பட்டுள்ளதாலும், இருக்கைகள், குடிநீர், 
போதிய கழிப்பறை உள்ளிட்ட வசதிகள் இல்லாததாலும்
 பயணிகள் அவதிக்குள்ளாகி வருகின்றனர். 

இந்நிலையில், வர்தா புயலின் போது உடைந்த நிழற்குடை 
இதுவரை சீரமைக்கப்படவில்லை. இதனால் வெயில், மழையில் 
பயணிகள் சிரமப்படுகின்றனர். 

மேலும், மின் விளக்குகள் பழுதடைந்துள்ளதால், 
இரவு நேரங்களில் இருள் சூழ்ந்து காணப்படுகிறது. இதனால், 
இரவு நேரங்களில் பஸ் நிலையம் வரும் பெண் பயணிகள் 
சிரமப்படுகின்றனர். இந்த இருளை பயன்படுத்தி, வழிப்பறி ச
ம்பவங்களும் ஏற்படுகிறது.

.இதுகுறித்து பயணிகள் கூறுகையில், ‘தினசரி 
ஆயிரக்கணக்கானோர் பயன்படுத்தும் இந்த பஸ் நிலையத்தில் 
மின்விளக்குகள் எரிவதில்லை. இதனால், இரவில் பஸ்சுக்காக
காத்திருக்கும் பெண் பயணிகள் சிரமப்படுகின்றனர். 

மேலும், வழிப்பறி, திருட்டு உள்ளிட்ட சம்பவங்கள் நடக்கிறது. 
கடந்த வர்தா புயலின்போது உடைந்த நிழற்குடையை இதுவரை 
சீரமைக்காமல் உள்ளனர். 

தற்போது வெயில் காலம் என்பதால் பஸ் நிலையத்திற்கு வரும் 
சிறுவர்கள் முதல் முதியவர்கள் வரை அனைவரும் பஸ்சுக்காக 
வெயிலில் நிற்க வேண்டியுள்ளது. 

இதுபற்றி பலமுறை அதிகாரிகளிடம் முறையிட்டும் இதுவரை 
எந்த நடவடிக்கையும் இல்லை. எனவே, சம்மந்தப்பட்ட அதிகாரிகள் 
உடனடியாக உடைந்த நிழற்குடைைய சீரமைக்கவும், இருக்கைகள் 
அமைக்கவும், பழுதடைந்த மின் விளக்குகளை சீரமைக்கவும், 
ஆக்கிரமிப்புகளை அகற்றவும் நடவடிக்கை எடுக்க வேண்டும்,’ 
என்றனர்.
-
-------------------------
தினகரன்