தசை நார்களில் வலி, உடல் வலி, இரவில் சரியான தூக்கமின்மை, காலையில் எழுந்தவுடன் களைப்பு மேலீடுதல், கை, கால் முட்டிகளில் பிடிப்பு ஏற்படுதல் ஆகியவற்றையே ஃபைப்ரோமியால்ஜியா (Fibromyalgia) நோயின் அறிகுறிகளாக என்று மருத்துவம் கூறுகிறது.

ஆண்கள், பெண்கள், மிக குறைந்த அளவிற்கு சிறுவர்கள் என்று எல்லோரையும் இந்த தசை வலி, தூக்கமின்மை தாக்கினாலும், இதில் பொதுவாக அதிகம் பாதிக்கப்படுவோர் பெண்களாகவே இருக்கின்றனர். ஃபைப்ரோமியால்ஜியா தாக்கியவர்களில் 80 விழுக்காட்டினர் பெண்களே என்பது பல ஆய்வுகளில் உறுதி செய்யப்பட்டுள்ளது.

மருத்துவத் துறையில் முன்பு ஃபைப்ரோசைட்டிஸ் என்றழைக்கப்பட்ட இந்த தசை வலி நோயே தற்போது ஃபைப்ரோமியால்ஜியா என்ற பெயரிடப்பட்டுள்ளது. இது ஒரிரு வாரங்களோ அல்லது மாதங்களோ இருந்துவிட்டு போகும் (நமத் நாட்டின் ஸ்பெஷல் ஆன சிக்கன்குனியா போன்ற) ஒரு நோய் அல்ல. மாறாக, இது வாழ்க்கையோடு பிண்ணிப்பிணைந்து வதைக்கும் ஒரு நோயாகவே உலகெங்கிலும் உள்ளது.

இந்த நோயின் ஒரு முக்கிய பாதிப்பு தூக்கம் என்பதால், இதனால் பாதிக்கப்பட்டவர்கள் சிலருக்கு மன அழுத்தமும் ஏற்படுகிறது என்பதும் கண்டு பிடிக்கப்பட்டுள்ளது. இந்த நோயை நாம் எலும்புத் தேய் நோயுடன் இணைத்து குழப்பிக்கொள்ளக் கூடாது. அது வேறு, இது முழுக்க முழுக்க தசை தொடர்புடையதே.

நீண்ட காலத்திற்கு இந்த நோய்க்கான காரணம் கண்டறியப்படவில்லை. ஆனால் சமீபத்தில் அமெரிக்காவில் நடத்தப்பட்ட ஒரு ஆய்வில் (அந்த ஆய்வை நடத்திய அமைப்பின் பெயர்: American Pain Society) ஃபைப்ரோமியால்ஜியா பாதிக்கப்பட்டவர்களில் பெரும்பானமையினர் உடல் கொழுப்பு அனுமதிக்கப்பட்ட அளவிற்கு அதிகம் கொண்டவர்களாக இருந்ததைக் கண்டுபிடித்தனர். அவர்களுக்கு பல்வேறு மருந்துகளை அளித்து பல படிகளாக நடத்தப்பட்ட சோதனையில் இந்த நோய் ஏற்படுவதற்கும், பாதிப்பு அதிகமாவதற்கும் உடல் கொழுப்பு (உடல் கூடுதல் எடையும்) முக்கிய காரணம் என்று கண்டறிந்துள்ளனர்.

அமெரிக்காவின் யூட்டா பல்கலையின் மருத்துவத் துறையைச் சேர்ந்தவர்கள் நடத்திய இந்த ஆய்வில் சோதிக்கப்பட்ட ஃபைப்ரோமியால்ஜியா நோயாளிகளில் பாதிக்கும் மேற்பட்டவர்கள் அதிக உடல் கொழுப்பு கொண்டவர்களாகவும், மேலும் 30 விழுக்காட்டினர் அதிக உடல் எடை கொண்டவர்களாகவும் இருந்தது தெரியவந்தது.

அது மட்டுமல்ல, இந்த நோயால் பாதிக்கப்பட்டவர்கள் வலி தொடர்பாக அதீத உணர்வு கொண்டவர்களாகவும் இருந்தனர். மற்றவர்கள் பொருட்படுத்தாத சிறிய வலியையும் இவர்கள் பெரிதாக கூறுவார்கள். இது இந்த நோயின் முக்கிய, உறுதிபடுத்தப்பட்ட அறிகுறியாகும்.

இந்த நோயிலிருந்து விடுபடுவதற்கு மருத்துவம், உடல் பயிற்சி, மன அமைதி காத்தல் ஆகியன முக்கியமாகும். இந்த நோயைப் பற்றி முழுமையாக அறிதலும், மருத்துவ ஆலோசனை பெறுதலும் மிக மிக முக்கியமானது என்று மருத்துவர்கள் கூறுகின்றனர்.

இந்த நோயின் பாதிப்பு உள்ளவர்கள் இரவு நேரத்தில் - அதாவது அடுத்தது இரவு சாப்பாடும் தூக்கமும்தான் என்ற நிலையில் - காஃபி அல்லது மது அருந்துவதை கட்டாயமாகத் தவிர்க்க வேண்டும் என்று மருத்துவம் கூறுகிறது.
உடல் வலி, தசை வலியால் பாதிக்கப்பட்டவர்கள் மருத்துவரை நாடி, சிகிச்சை பெறுவது மட்டமின்றி, இந்த இணையத்தளத்திற்கும் சென்று மேலும் விவரமறியலாம்: medicinenet.com/fibromyalgia/


WD

இந்த வருத்தம் எனக்கும் இருந்தது இப்பதான் புரிந்தது காரணம் என்ன என்று பகிர்வுக்கு நன்றி