[You must be registered and logged in to see this image.]
-
தூத்துக்குடி: 
தூத்துக்குடி ஸ்டெர்லைட் ஆலைக்கு தாமிரத்தாது ஏற்றி வந்த 
லாரியை  கிராம மக்கள் தடுத்து நிறுத்தி சிறைபிடித்தனர். 

தூத்துக்குடி ஸ்டெர்லைட் ஆலைக்கு எதிராக 10 கிராம மக்கள். 
கடந்த இரு மாதங்களாக போராட்டத்தில் ஈடுபட்டுள்ளனர்.
 கடந்த 10ம் தேதி இதே  கோரிக்கையை வலியுறுத்தி கலெக்டர் 
அலுவலகம் முன்பு மறியல் போராட்டமும் நடத்தினர். 

இதனிடையே பராமரிப்பு பணிகளுக்காக ஸ்டெர்லைட் 
ஆலையில் தற்போது உற்பத்தி நிறுத்தி வைக்கப்பட்டுள்ளது. 
மாசு கட்டுப்பாட்டு வாரியமும்  ஸ்டெர்லைட் ஆலைக்கான 
உரிமத்தை புதுப்பிக்க மறுத்துவிட்டது.

இந்நிலையில் ஸ்டெர்லைட் ஆலைக்கு கடந்த 31ம் தேதி கப்பல் 
மூலம் காப்பர் கான்சன்ட்ரேட் என்ற மூலப்பொருள், தூத்துக்குடி 
துறைமுகம்  வந்திறங்கியது. 

துறைமுகம் அருகே குடோனில் இருப்பு வைக்கப்பட்டிருந்த
 இந்த தாமிர தாது, பின்னர் லாரிகள் மூலம் நேற்று முன்தினம் 
இரவு  ஸ்டெர்லைட் ஆலைக்கு கொண்டு வரப்பட்டது. 

தகவலறிந்த போராட்டக் குழுவினரும், கிராம மக்களும் 
ஸ்டெர்லைட் ஆலை முன்பு நள்ளிரவில் திரண்டனர். ஆலைக்கு 
தாமிர தாது ஏற்றிவந்த  லாரியை தடுத்துநிறுத்தி சிறை
பிடித்தனர். மேலும் லாரியை ஆலைக்குள் அனுப்ப மறுத்து  
தர்ணாவில் ஈடுபட்டனர். சம்பவ இடத்துக்கு வந்த சிப்காட்  
போலீசார், சமாதானப் பேச்சுவார்த்தை நடத்தினர். 

பின்னர் போராட்டக் குழு ஒருங்கிணைப்பாளர்கள் 15க்கும் 
மேற்பட்டோர், துறைமுகம் அருகேயுள்ள வோர்ல்ட் ட்ரேட் 
அவென்யூ பகுதிக்கு சென்றனர்.  

அங்கு ஸ்டெர்லைட் ஆலைக்கு  முகவராக செயல்பட்டு
 காப்பர் கான்சன்ட்ரேட் இறக்குமதி செய்து வரும் தனியார் 
ஷிப்பிங் நிறுவனம் முன்பு  ஆர்ப்பாட்டம் நடத்தினர். 

பாதுகாப்புக்கு நின்றிருந்த போலீசார், ஒரு  சிலரை மட்டும் 
அந்நிறுவனத்திற்குள் சென்று கோரிக்கை மனு அளிக்க 
அனுமதி  அளித்தனர். அதன்படி மனு அளித்த போராட்டக்
குழுவினர், மக்களின் நலன் கருதி ஸ்டெர்லைட் ஆலைக்கு 
காப்பர் கான்சன்ட்ரேட் இறக்குமதி செய்துதரக் கூடாது  
என வலியுறுத்தினர். 

ஆர்ப்பாட்டம் நடத்திய நல்லகண்ணு கைது

தூத்துக்குடியில் ஸ்டெர்லைட் ஆலைக்கு எதிராக தடையை 
மீறி இந்திய கம்யூனிஸ்ட் கட்சி சார்பில் தூத்துக்குடி 
சிதம்பர நகர் சந்திப்பு பகுதியில்  போராட்டம் நடத்தினர். 

இதற்கு மாவட்ட செயலாளர் அழகுமுத்து பாண்டியன் 
தலைமை வகித்தார். கட்சியின் மூத்த தலைவர் நல்லகண்ணு,
சிறப்பு  அழைப்பாளராகப் பங்கேற்றார். 

இதையடுத்து அனுமதியின்றி போராட்டம் நடத்தியதாகக் கூறி, 
நல்லகண்ணு மற்றும் 34 பெண்கள் உள்ளிட்ட 127 பேரை  
தூத்துக்குடி தென்பாகம் போலீசார் கைது செய்தனர். 

இந்நிலையில் சாலை மறியலில் ஈடுபட்ட அனைத்திந்திய 
இளைஞர் பெருமன்றத்தினரை போலீசார்,  கைது செய்து 
குண்டுக்கட்டாக தூக்கி வேனில் ஏற்றினர்.

மாணவர்கள் ஆர்ப்பாட்டம்: முள்ளக்காடு அருகே தனியார் 
பொறியியல் கல்லூரி மாணவர்களும் நேற்று போராட்டம்
 நடத்தினர். 
-
----------------------------------
தினகரன்