"ஸ்பெக்ட்ரம் ஊழல் மூலம் வந்த பணத்தில், கருணாநிதி குடும்பத்தார் வெளிநாடுகளில் உள்ள தீவுகளை வாங்கியுள்ளனர்,'' என, அ.தி.மு.க., பொருளாளர் பன்னீர்செல்வம் தெரிவித்தார்.

கிருஷ்ணகிரியில், மாவட்ட அ.தி.மு.க., செயல்வீரர்கள் ஆலோசனை கூட்டம் நடந்தது.

சட்டசபை எதிர்க்கட்சி துணை தலைவரும், அ.தி.மு.க., பொருளாளருமான பன்னீர்செல்வம் பேசியதாவது:"தமிழகம் முழுவதும் பத்திரப்பதிவு அலுவலகங்களில் ஒரு கோடி ரூபாய்க்கு மேல் சொத்துகளை பதிவு செய்ய வந்தால், பதிவு செய்யக் கூடாது என்றும், அது குறித்து அந்தந்த மாவட்ட செயலர்கள் மூலம், கருணாநிதி குடும்பத்துக்கு தகவல் தெரிவிக்க வேண்டும்' என உத்தரவிடப்பட்டுள்ளது.ஒரு கோடி ரூபாய்க்கு மேல் மதிப்புள்ள சொத்துகளை விற்பனை செய்பவர்களை மிரட்டி, கருணாநிதி குடும்பத்தார் அந்த சொத்துகளை வாங்கி குவிக்கின்றனர். கடந்த பார்லிமென்ட் தேர்தலில் இந்த பணத்தை தான் வாக்காளர்களுக்கு கொடுத்து ஓட்டுகளை வாங்கி, தி.மு.க., வெற்றி பெற்றது.

வரும் சட்டசபை தேர்தலிலும், ஸ்பெக்ட்ரம் ஊழல் பணத்தை வாக்காளர்களுக்கு கொடுத்து வெற்றி பெற்று விடலாம் என, தப்பு கணக்கை தி.மு.க., போட்டுள்ளது.தமிழகத்தில் ஏற்பட்டுள்ள மின் பற்றாக்குறையால், கொங்கு மண்டலத்தில் 10 லட்சம் பேர் வேலை இழந்துள்ளனர்; அத்தியாவசிய பொருட்களின் விலையேற்றத்தால், பொதுமக்கள் கடுமையாக பாதிக்கப்பட்டுள்ளனர்.தமிழகத்தில் சட்டம் ஒழுங்கு சீர்கேடு அடைந்து, குற்றவாளிகளின் எண்ணிக்கை அதிகரித்துள்ளது. கருணாநிதியின் மக்கள் விரோத அரசை, வரும் சட்டசபை தேர்தலில் பொதுமக்கள் தூக்கி எறிவர்.
இவ்வாறு பன்னீர்செல்வம் பேசினார்.

DINAMALAR