பெங்களூரு:
 ''விவசாய கடனை தள்ளுபடி செய்ய வேண்டி, 'பந்த்' நடத்த 
திட்டமிடப்பட்டது.ஆர்.ஆர்.நகரில், நாளை தேர்தல் 
நடப்பதால், பெங்களூரு தவிர, மாநிலத்தின் மற்ற பகுதிகளில்,
 28ம் தேதி, பந்த் நடத்தப்படுவது உறுதி,'' என, சட்டசபை 
எதிர்க்கட்சி தலைவர் எடியூரப்பா தெரிவித்தார்.

'ம.ஜ.த., தேர்தல் அறிக்கையில் குறிப்பிட்டபடி முதல்வர் 
குமாரசாமி, விவசாய கடனை தள்ளுபடி செய்ய வேண்டும். 
இல்லையெனில், இம்மாதம் 28ம் தேதி மாநிலம் தழுவிய 
பந்த் நடத்தப்படும்' என எதிர்க்கட்சி தலைவர் எடியூரப்பா, 
சட்டசபையில், நேற்று முன்தினம் எச்சரிக்கை 
விடுத்திருந்தார்.

இது தொடர்பாக பெங்களூரு டாலர்ஸ் காலனியிலுள்ள தன் 
வீட்டில், செய்தியாளர்களிடம், நேற்று எடியூரப்பா கூறியதாவது: 

தேர்தலுக்கு முன், முதல்வர் குமாரசாமி, விவசாய கடன் ரத்து 
செய்வதாக கூறியிருந்தார். ஆனால், அதிகாரத்துக்கு வந்ததும் 
செய்யவில்லை.'தனிகட்சியாக ஆட்சியை பிடித்திருந்தால், 
தள்ளுபடி செய்வேன்' என, சப்பைகட்டு கட்டுகிறார். 

விவசாய கடன் தள்ளுபடி செய்யும் வரை, தொடர்ந்து போராட்டம் 
நடத்துவோம். பந்த்துக்கு பா.ஜ., அழைப்பு விடுத்திருப்பதை விட, 
விவசாயிகளே, பந்த் நடத்துவர்; இவர்களுக்கு பா.ஜ., ஆதரவளிக்கும்.

 சட்டசபை உள்ளேயும், வெளியேயும் பொறுப்பான எதிர்க்கட்சியாக, 
பா.ஜ., செயல்படும். அரசு, விழிக்கும் வரை நாங்கள் அமைதியாக
 இருக்க மாட்டோம். நாளை, ராஜராஜேஸ்வரி நகர் தொகுதியில் 
தேர்தல் நடப்பதால், பெங்களூரு தவிர, மாநிலம் முழுவதும் பந்த் 
நடத்துவது உறுதி.

ம.ஜ.த., - காங்கிரஸ் கூட்டணியை எதிர்த்து, ஆர்.ஆர்.நகர், ஜெய 
நகரில் பா.ஜ., வேட்பாளர்களை, மக்கள் வெற்றி பெற வைப்பர் 
என்ற நம்பிக்கை உள்ளது. இவ்வாறு அவர் கூறினார்.விவசாயிகள் 
கடன் தள்ளுபடி செய்வதுடன் விவசாயிகள் பிரச்னைகளுக்கு 
முக்கியத்துவம் அளிக்கப்படும். யாரும் தற்கொலை செய்து கொள்ள 
வேண்டாம். காங்கிரஸ் தலைவர்களுடன் ஆலோசனை நடத்தி 
மாநிலத்தின் நிதி நிலை ஆய்வு செய்து கடன் தள்ளுபடி குறித்து 
முடிவு செய்யப்படும்.

குமாரசாமி, முதல்வர்
-
----------------------------------------
தினமலர்