புது தில்லி,    

பொதுத் துறை நிறுவனமான பிஎஸ்என்எல்-லுடன் இணைந்து 
நாட்டு மக்களுக்கு வானிலை முன்னெச்சரிக்கை தொடர்பான 
தகவல்களை வெளியிட இந்திய வானிலை ஆய்வு மையம்
 (ஐஎம்டி) முடிவு செய்துள்ளது. 

இத்தகவலை மத்திய புவி அறிவியல் துறை அமைச்சக 
செயலாளர் எம்.ராஜீவன் தெரிவித்துள்ளார்.

 தில்லியில் செய்தியாளர்களிடம் ஞாயிற்றுக்கிழமை பேசிய 
அவர் மேலும் கூறியதாவது: 

மிக அதிக அளவிலான மழை தொடர்பான எச்சரிக்கை, 
கடுமையான புயல் தொடர்பான முன்னறிவிப்பு ஆகியவற்றை 
பிஎஸ்என்எல் மூலம் இந்திய வானிலை ஆய்வு மையம் 
வெளியிடும்.

 எந்த இடத்தில் புயல், மழை உருவாகிறதோ அந்த இடத்தில் 
உள்ள மக்களுக்கு மட்டும் வானிலை முன்னறிவிப்பு குறுஞ்
செய்தி அனுப்பி வைக்கப்படும்.

 உதாரணமாக, தில்லியில் புழுதிப் புயல் ஏற்படுவதாக 
இருந்தால் அது தொடர்பான தகவல் பிஎஸ்என்எல் 
வாடிக்கையாளர்களுக்கு எஸ்எம்எஸ் மூலம் அனுப்பி 
வைக்கப்படும். 

ஒருவரது செல்லிடப்பேசி எண் எந்த வட்டத்துக்குள் வருகிறதோ 
அதன் அடிப்படையில் முன்னறிவிப்பு அளிக்கப்படும். அதே 
நேரத்தில் தில்லியில் புயல் ஏற்படும் நேரத்தில் மும்பையைச் 
சேர்ந்த பிஎஸ்என்எல் வாடிக்கையாளர் தில்லியில் இருந்தால் 
அவருக்கு குறுஞ்செய்தி வரும்.

 வட மாநிலங்களில் இந்த மாதத்தில் ஏற்பட்ட கடுமையான 
இடி மின்னல் மற்றும் புழுதிப் புயலுக்கு இதுவரை 200-க்கும் 
மேற்பட்டோர் உயிரிழந்துவிட்டனர். 

குறிப்பாக உத்தரப் பிரதேசத்தில் அதிகபட்சமாக 100-க்கும் 
மேற்பட்டோர் இறந்தனர். எனவே, உயிர்சேதத்தைக் குறைக்கும் 
வகையில் இந்த முன்னெச்சரிக்கை சேவையை அளிக்க மத்திய
 அரசு முடிவு செய்தது என்றார் ராஜீவன்.
-
----------------------------
தினமணி