குஷ்வந்த் சிங் பிரபலமான எழுத்தாளர்,
 'இல்லஸ்ட்ரேட்டட் வீக்லி' என்ற ஆங்கில இதழின் ஆசிரியராக 
இருந்து, வெற்றிகரமாக அந்தப் பத்திரிகையை நடத்தியவர். 

அவரது பேட்டி ஒரு ஆங்கில இதழில் வெளியாகி இருந்தது... 
உ.ஆ., ஒருவர் உதவியுடன் அதைப் படித்தேன். 
தன் பேட்டியில் கூறுகிறார், சிங்...

நான் அதிகாலை, 4:30 மணிக்கெல்லாம் எழுந்து விடுவேன். 
கோடை, குளிர் என்று ஒன்றும் பார்ப்பதில்லை. பனிபொழிந்து 
கொண்டிருந்தாலும் படுக்கையில் கிடப்பதில்லை. 
சரியாக, 4:30 மணிக்கு எழுந்து விடுவேன்.

ரேடியோ வைத்து, பி.பி.சி., செய்திகள், 5:30 மணிக்கு கேட்பேன். 
பின், தினசரி பத்திரிகைகள் படிப்பேன். 6:30 மணிக்கு உருது 
செய்தி கேட்க, ரேடியோவை வைப்பேன். ரேடியோ கேட்பது 
உருது செய்திக்காக அல்ல; உருது மொழியைக் கேட்கவே, 
அந்த மொழி மீது எனக்கு அளவற்ற ஈடுபாடு. 
அது இன்னமும் அப்படியே இருக்கிறது.

ஒரு பத்திரிகையை ஆரம்பித்து நடத்த, நிறைய பணமும், 
அதிகமான நிர்வாகத் திறமையும் தேவை. என்னிடம் கொஞ்சம் 
பணம் இருக்கிறது; ஆனால், நிர்வாகத் திறமை இல்லை. 

அதனால், பத்திரிகை ஆரம்பிக்கவில்லை. ஏற்கனவே உள்ள 
பத்திரிகையை எடுத்துக் கொண்டு, அதைப் புதுப்பித்து 
வித்தியாசமாக ஆக்குவது வசதியாக இருக்கிறது. 
'இல்லஸ்ட்ரேட்டட் வீக்லி'யை அப்படித்தான் பொறுப்பேற்று 
செய்தேன்.

கல்யாணம், 25 வயதில் செய்து கொண்டேன். குழந்தைகள் 
பெற்றேன். குடும்பத்தோடு ரொம்ப ஒட்ட மாட்டேன். 
புத்தகங்கள், என் வேலை என்று ஒதுங்கி இருந்து விடுகிறேன். 

நான் ஒரு தனி ஆள். சின்ன குடும்பம், நண்பர்கள் என்று 
எனக்கு யாரும் கிடையாது. நண்பர்களை சம்பாதித்து 
வைத்துக் கொள்ளவும் என்னால் முடியவில்லை. 

நான் மோசமான முறையில் உடை அணிகிறேன். 
ஏனெனில், நானே அப்படிப்பட்ட ஆள், அதாவது, கட்டை - 
குட்டையான மனிதன். எனக்கு எந்த உடையும் சரியாக 
இருப்பதில்லை. 

உடை எதுவும் என் உருவத் தோற்றத்தை மேன்மைப்படுத்த 
முடியாது. எனவே, சவுகரியத்திற்காகவே -தொள 
தொளவென்று உடை அணிந்து கொள்கிறேன்...
-
---------------------------------------
அந்துமணி பா.கே.ப.,
வாரமலர்