19 ஆண்டுகால கோரிக்கைக்குப் பிறகு உருவாக்கப்பட்டுள்ள முப்படைத் தளபதி பதவி!

by **அ.இராமநாதன்** Sun Aug 18, 2019 8:20 am

[You must be registered and logged in to see this image.]

பத்தொன்பது ஆண்டுகால கோரிக்கைக்குப் பிறகு,
பாதுகாப்புத் துறையின் அதிமுக்கியத்துவம் வாய்ந்த
முப்படைத் தளபதி பதவியை மத்திய அரசு
உருவாக்கியுள்ளது.

இந்தியாவுக்கும் பாகிஸ்தானுக்கும் இடையே கடந்த
1999-ஆம் ஆண்டு கார்கில் போர் மூண்டது. இதில்,
இந்தியாவின் முப்படைகளான ராணுவப் படை,
விமானப் படை, கடற்படை ஆகியவற்றைச் சேர்ந்த
வீரர்கள் பங்கேற்று, இந்தியாவுக்கு வெற்றி தேடித்
தந்தனர்.

இருந்தபோதிலும், இந்தப் போரின்போது முப்படைகளுக்கு
இடையேயான தகவல் தொடர்பில் சிறிது தொய்வு காணப்
பட்டதாகப் புகார் எழுந்தது.

இதையடுத்து, இது குறித்து ஆராய உயர்நிலைக் குழு ஒன்று
அமைக்கப்பட்டது. அந்தக் குழுவானது, முப்படைகளின்
செயல்பாடுகளையும் ஒருங்கிணைக்க முப்படைத் தளபதி
பதவியை உருவாக்க வேண்டுமென முதன் முதலில்
வலியுறுத்தியது.

இருந்தபோதிலும், அப்போதைய பிரதமர் வாஜ்பாய்
தலைமையிலான பாஜக அரசு இது குறித்து எந்த முடிவும்
எடுக்கவில்லை.

இதன்பிறகு, தேசியப் பாதுகாப்பு அமைப்பில் ஏற்படுத்தப்பட
வேண்டிய சீர்திருத்தங்கள் குறித்து ஆராய அமைக்கப்பட்ட
அமைச்சர்கள் குழுவும், முப்படைத் தளபதி பதவியை
உருவாக்க ஆதரவு தெரிவித்திருந்தது.

இதைத் தொடர்ந்து, கடந்த 2012-ஆம் ஆண்டு அமைக்கப்பட்ட
நரேஷ் சந்திரா தலைமையிலான சிறப்புக் குழு, முப்படைத்
தளபதிகளின் குழுவை அமைக்கப் பரிந்துரைத்தது.

இதை ஏற்றுக்கொண்ட மத்திய அரசு, ராணுவப்படை,
விமானப்படை, கடற்படை ஆகியவற்றின் தலைமைத்
தளபதிகளைக் கொண்ட முப்படைத் தளபதிகளின் குழுவை
அமைத்தது. முப்படைகள் இடையேயான ஒருங்கிணைப்பு
தொடர்பான விவகாரங்களில் இக்குழு முடிவெடுத்து
வருகிறது.

மூன்று தளபதிகளில் மூத்தவர், இக்குழுவின் தலைவராகச்
செயல்பட்டு வருகிறார். தற்போது, விமானப்படைத்
தலைமைத் தளபதி பி.எஸ். தனோவா இக்குழுவின்
தலைவராகச் செயல்பட்டு வருகிறார். வரும் செப்டம்பர் 30-
ஆம் தேதியுடன் அவர் ஓய்வுபெறுகிறார். அவரையடுத்து,
ராணுவத் தலைமைத் தளபதி விபின் ராவத், அக்குழுவின்
தலைவராகச் செயல்படுவார்.

உயர்நிலைக் குழு: இந்நிலையில், முப்படைகளும்
ஒருங்கிணைந்து செயல்பட்டு, நாட்டின் பாதுகாப்பை மேலும்
உறுதிசெய்யும் நோக்கில், முப்படைத் தளபதி பதவி
உருவாக்கப்படும் என பிரதமர் நரேந்திர மோடி தனது சுதந்திர
தின உரையில் தெரிவித்தார்.

இது தொடர்பாக பாதுகாப்புத் துறை அதிகாரிகள் கூறியதாவது:

முப்படைத் தளபதியைத் தேர்ந்தெடுப்பது தொடர்பான
வழிமுறைகளை உருவாக்க உயர்நிலைக் குழுவை அமைக்கும்
பணிகளில் மத்திய அரசு ஈடுபட்டு வருகிறது. இக்குழுவானது,

முப்படைத் தளபதி தேர்ந்தெடுக்கப்படும் முறை, அவரது
பதவிக்காலம், அவரது அதிகாரங்கள் மற்றும் அங்கீகாரம்
உள்ளிட்டவை குறித்து முடிவு செய்யும்.

முப்படைத் தளபதிகளின் குழுவைப் போல, வயதின்
அடிப்படையில் முப்படைத் தளபதி தேர்ந்தெடுக்கப்பட்டால்,
நாட்டின் முதல் முப்படைத் தளபதியாகும் வாய்ப்பு ராணுவத்
தளபதி விபின் ராவத்துக்கே அதிகம் என்று அவர்கள்
தெரிவித்தனர்.

வரவேற்பு: முப்படைத் தளபதி பதவி உருவாக்கப்படுவதற்கு
பாதுகாப்புத் துறையைச் சேர்ந்த பலர் வரவேற்பு
தெரிவித்துள்ளனர். ராணுவத்தின் முன்னாள் தலைமைத்
தளபதி வி.பி. மாலிக் வெளியிட்ட சுட்டுரைப் பதிவில்,
வரலாற்றுச் சிறப்புமிக்க முடிவெடுத்த பிரதமர் மோடிக்கு
நன்றி தெரிவித்துக் கொள்கிறேன்.

இது முப்படைகளின் ஒருங்கிணைப்புக்கு வழிவகுக்கும்
என்று குறிப்பிட்டுள்ளார்.

இது தொடர்பாக, கடற்படையின் முன்னாள் தலைமைத்
தளபதி சுனில் லாம்பா கூறுகையில், நீண்டகாலக்
கோரிக்கை தற்போது நிறைவேற்றப்பட்டுள்ளது. இதன்
மூலம், பாதுகாப்புத் துறைக்கான பட்ஜெட், திட்டமிடுதல்
உள்ளிட்டவற்றை எளிதில் மேற்கொள்ள முடியும் என்றார்.

விமானப்படை முன்னாள் துணைத் தளபதி
மன்மோகன் பகதூர், ராணுவத்தின் முன்னாள் செயலாளர்
சையது அட்டா ஹஸ்னைன் உள்ளிட்டோரும் வரவேற்பு
தெரிவித்துள்ளனர்.
-
--------------------------------------தினமணி

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

19 ஆண்டுகால கோரிக்கைக்குப் பிறகு உருவாக்கப்பட்டுள்ள முப்படைத் தளபதி பதவி!

19 ஆண்டுகால கோரிக்கைக்குப் பிறகு உருவாக்கப்பட்டுள்ள முப்படைத் தளபதி பதவி!