எனக்கு மட்டும் நான்!

by **சிசு** Wed Jan 19, 2011 9:15 pm

சிவப்புமல்ல...வெளிருமல்ல...
பச்சைத் தமிழனின் கருப்பு நிறம்.
கலையாமல் வகிடெடுத்து
உருக்குலையாமல் படிந்த கேசம்.
முட்டையையும், சட்டத்தின்
ஓட்டையையும் நினைவுபடுத்தாத
ஆழமான விழிகள்.
நீளமுமல்ல...அகலமுமல்ல...
நேர்த்தியான நாசி.
காதோரம் வரை கிழியாமல்
அளந்தெடுத்த அதரங்கள்.
ஆணென்ற அடையாளத்திற்கு
அழகாய் அரும்பு மீசை.
பிரிவென்பதே இல்லாமல்
பிணைந்து இருக்கும் வளைபுருவங்கள் என -

அழகாய்த்தான் தெரிகிறேன்
கண்ணாடியில் -
எனக்கு மட்டும் நான்!

- சிசு...