அ.தி.மு.க., கோட்டையை தக்க வைக்க கோவையில் ஜெயலலிதா போட்டி?

by **கவிக்காதலன்** Mon Jan 24, 2011 1:36 am

கொங்கு மண்டலத்தில் அ.தி.மு.க.,வுக்கு இருக்கும் ஆதரவை தக்க வைக்க, வரும் சட்டசபை தேர்தலில், கோவை மாவட்டத்தில் உள்ள ஏதாவது ஒரு தொகுதியில் ஜெயலலிதா போட்டியிடுவார் என, அ.தி.மு.க., வட்டாரங்களில் தகவல் பரவியுள்ளது.

முதல்வர் கருணாநிதி, துணை முதல்வர் ஸ்டாலின் ஆகியோர், தலைநகரை தாண்டி தமிழகத்தின் வேறு எந்த தொகுதியிலும் நிற்பதற்கு வாய்ப்பில்லை. ஆனால், ஜெயலலிதா, எம்.ஜி.ஆர்., பாணியில் தமிழகத்தின் வெவ்வேறு தொகுதிகளில் போட்டியிட்டு வருவது குறிப்பிடத்தக்கது. எம்.ஜி.ஆர்., வென்ற அதே ஆண்டிப்பட்டி தொகுதியில் இரண்டு முறை ஜெ., வெற்றி பெற்றது குறிப்பிடத்தக்கது.ஆனால், வரும் சட்டசபை தேர்தலில் ஜெ., தொகுதி மாறி நிற்க வேண்டுமென்ற எதிர்பார்ப்பு, தொண்டர்கள் மத்தியில் எழுந்துள்ளது.

அ.தி.மு.க.,வை பொறுத்தவரை, தமிழகத்தின் பிற பகுதிகளை விட கொங்கு மண்டலத்தில் எப்போதுமே ஆதரவு அதிகம் உண்டு. கடந்த சட்டசபை தேர்தலில், கோவை மாவட்டத்தில் மட்டுமே மொத்தமாக 10 தொகுதிகளை அ.தி.மு.க., அள்ளியது.கடந்த லோக்சபா தேர்தலிலும் கோவை, பொள்ளாச்சி, திருப்பூர் என அனைத்து தொகுதிகளிலும் வெற்றி பெற்று, தனது கோட்டை என்பதை அ.தி.மு.க., நிரூபித்தது.நீலகிரி தொகுதியில் முன்னாள் மத்திய அமைச்சர் ராஜா வெற்றி பெற்றாலும், மேட்டுப்பாளையம், அவினாசி தொகுதிகளில் அ.தி.மு.க.,வுக்கே அதிக ஓட்டுகள் கிடைத்தன. கடந்த ஓராண்டுக்கு முன்பு, அ.தி.மு.க., தொண்டர்கள் பெரும் சோர்வுற்றிருந்த நிலையில், கோவையில் ஜெ., நடத்திய மாபெரும் ஆர்ப்பாட்டத்தில் கூடிய கூட்டம் தான், முக்கியமான திருப்புமுனையாக அமைந்தது.

மின்வெட்டால் தொழில்கள் பாதிப்படைந்துள்ளன. எல்லாவற்றையும் விட, கோவை மாவட்டத்தில் தி.மு.க.,வுக்கு வலிமையான, திறமையான வழிகாட்டுதல் இல்லாததால், இன்றைக்கும் கோவை அ.தி.மு.க.வின் கோட்டையாக இருப்பதாகவே அ.தி.மு.க.,வினர் நம்புகின்றனர். இந்த நம்பிக்கையில், கோவை மாவட்டத்திலுள்ள ஏதாவது ஒரு தொகுதியில் ஜெ., போட்டியிட வேண்டுமென்று விரும்புகின்றனர்.தொண்டாமுத்தூர் தொகுதியில் ஜெ., போட்டியிட வேண்டுமென்று பேரூர் எம்.எல்.ஏ., வேலுமணி நேரடியாக வலியுறுத்தியுள்ளார். கொங்கு மண்டலத்தில் ஏற்கனவே காங்கேயத்தில் ஜெ., போட்டியிட்டிருந்தாலும், கோவை மாவட்டத்தில் இந்த முறை போட்டியிடுவார் என்ற தகவல், கட்சியின் அனைத்து வட்டாரங்களிலும் பரவியுள்ளது.

கோட நாடு அருகில் இருப்பதால், இதற்கு அதிகம் வாய்ப்பிருப்பதாகவும் தொண்டர்கள் நம்புகின்றனர்.கோவை மாவட்டத்திலுள்ள ஏதாவது ஒரு தொகுதியில் போட்டியிட்டால், தொகுதியைப் பற்றி கவலைப்படாமல் மற்ற தொகுதிகளில் ஜெ., பிரசாரம் செய்ய முடியுமென்பதை நிர்வாகிகள் சுட்டிக் காட்டுகின்றனர். இந்த கோரிக்கையை ஜெ., நிச்சயமாக ஏற்பார் என்பதிலும், இவர்களுக்கு அசைக்க முடியாத நம்பிக்கை தெரிகிறது.

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

அ.தி.மு.க., கோட்டையை தக்க வைக்க கோவையில் ஜெயலலிதா போட்டி?

அ.தி.மு.க., கோட்டையை தக்க வைக்க கோவையில் ஜெயலலிதா போட்டி?