சந்தோசங்கள் இல்லாத வெற்றிகள்

by Michael Remance Mon Feb 07, 2011 11:18 pm

முன்னேற வேண்டும் - என்ற வெறியுடன்தான் முடிவுகளை எடுத்தேன்.
நான் பிறந்த இடம்,
எனது உறவுகள்,
என் நண்பர்கள்....
எதுவுமே எனக்குத் தெரியவில்லை !
இடைக்கிடை என் காதலும்தான்.
முயற்சி வெறிபிடித்த பதங்களுடன், நாட்களும் நகர்ந்தன....
இலட்சியங்கள் சிலவற்றை எட்டிப் பிடித்திருந்தேன்.
வெற்றிகளை எனதாக்கிக் கொண்டேன்.
முடியாததுகள் சிலவற்றை முடித்துக் காட்டியிருந்தேன் .
இன்று (01 -01 -2009)
நின்று திரும்பிப் பார்க்கிறேன் .....
நான் எனது பிறந்த இடத்தில் இல்லை! - ( வலிக்கிறது )
உறவுகள் தொலை தூரத்தில்! - ( கண்ணீர் துளிர்க்கிறது )
நண்பர்கள் திக்குக்கொன்றாய்! - ( வெறுமை )
காதல் - கையடக்கத் தொலைபேசிக்குள் - ( தனிமை )
அம்மாவும் , அப்பாவும் , 2009 புது வருடமும்
என்னை
மௌனமாக பார்த்துக்கொண்டிருந்தன....!
வாய் கிழிய கத்தி
சந்தோசங்களை பகிர்ந்து கொள்ள
உறவுகள் பக்கத்தில் இல்லை.
தாராளமாய் செலவழித்து - இன்றுமட்டும்
கும்மாளமாய் கூத்தடிக்க
நண்பர்களும் இல்லை.
என்னை அம்மாவும் , அப்பாவும் , 2009 புது வருடமும்
மௌனமாக பார்த்துக்கொண்டிருந்தன......!
இலட்சியங்களில் வெற்றியுடன்
வாழ்கையில் தோற்றுப்போகிறேனா........????????