( சுனாமியில் நொந்து போனவர்களுக்காக )

எதிரி என்றால் எரித்திருப்பேன் - அனால்
நீ தான் அன்னை ஆயிற்றே - என்ன செய்வேன் நான்!
எங்கள் நினைவு தெரிந்த காலந்தொட்டு
எம் தேசத்தை தழுவித்தானே
அணைத்திருக்கிறாய் தாயே...!
நாங்கள் பசித்திருந்த பொழுதுகளில் எல்லாம்
நீதானே ஓடோடி வந்து ஊட்டிவிட்டிருக்கிறாய்?
இன்று ஏன் எம்மைத் தின்று தீர்த்தாய்?
எங்களுக்குள் நாங்களே
முட்டி மோதிக்கொண்ட போதும்
நீதானே தாயே ஒட்டி.. ஒட்டி..
இருந்து ஒற்றுமையின் வலிமையை
உணர்த்தினாய் - பின் ஏன்
எம் உறவுகளை பிய்த்துப் பிரித்து எறிந்தாய் ?
எமது நாடு சின்னஞ்சிறு தீவுதான் - என்றாலும்
சொந்தக்காலில் நில் - என்று
சொல்லித்தந்ததும் , கடல்வளத்தை அள்ளித்தந்ததும் நீ அல்லவா அம்மா?
நாங்கள் சொட்டுச்சொட்டாய்ச்
சேர்த்துவைத்த சொத்துக்களை எல்லாம்
ஏன் ஒரே பொழுதில் சுருட்டிச் சென்றாய்?
உன் மடி மீது மல்லார்ந்து படுத்து மகிழும்
சுகத்துக்காய் - தூரதேசம் இருந்தெங்கும்
ஓடிவருவார்களே!
அவர்களுக்கெல்லாம்
"எம் அன்னையின் அல்லைகளும் கரைகளும் கொள்ளை அழகுகாண் "
என மார்தட்டிச் சொன்னோமே ....
அந்த மார்புகளை எல்லாம் ஏன் இடித்திளுத்துச் சென்றாய் ?
எத்தனை பேர் - உன்னை கடவுள் ஸ்தானத்தில் கூட
வைத்து வணங்கியிருக்கிறோம்!
ஏன் நரகத்திற்குள் எம்மை தள்ளினாய் ?
உன் கரைகளில் விளையாடும்
எங்கள் குழுந்தைகளின் பாதங்களை எல்லாம்
குடு....குடு.... வென ஓடிவந்து குளிரவைப்பாயே !
அந்தப் பிஞ்சுகளுடன் நீயும் சேர்ந்து
நுரைதள்ளச் சிரிப்பாயே!
நீயும் ஒரு அன்னை என்றுதானே,
அத்தனை நம்பிக்கை வைத்திருந்தோம் உன்னில்,
இப்போது.....
கைநழுவிப்போன தங்கள் பாலகர்களை தேடி
கரைகள் எங்கும் கதறி அழும்
எங்கள் அன்னையருக்கு
என்னபதில் தரப்போகிறாய் நீ??
நீ அன்னை என்றுதானே
எமக்குத் தெரியும் - அனால்
"சுனாமி" என்கிறார்களே - அது ஏன்?
"கோழி மிதித்துக் குஞ்சு சாகாது" - என்று
எங்கள் பிஞ்சுகளுக்குச் சொல்லி வளர்த்தோமே.....
"எங்கள் அன்னை மிதித்து அழிந்து போனோமே" என
சர்வதேசமெங்கும்
கதறி அழுது கைநீட்ட வைத்தாயே! அடி??
மனித உயிர் ருசியானது என
எந்த பேய் வந்து உன் காதில் ஓதியது?
மரண ஓலம் மனதிற்கு இனியது என
யார்வந்துனைக் கிளப்பியது?
இன்னும் ஏனடி இரைகிறாய் ?
ஒன்று சொல்கிறேன் கேள்
நான் மனிதன்
உன்னைப்பற்றி உனக்குத்
தெரியாதது கூட
எனக்குத் தெரியும்.
நீ வெறுமனே சில மூலகங்களின் கலவைதான்
நான் நினைத்தால்
உன்னை உறையவைக்கவும் முடியும்
கொளுத்தி எரிக்கவும் முடியும்
ஆனாலும்
பெற்று வளர்த்த பாசத்துக்காக
விட்டு வைக்கிறேன்.
இதுவே கடைசியும் முதலுமாய் இருக்கட்டும்
இன்னும் ஒருமுறை சீறுவயானால்...
அன்னை என்றும் பார்க்கமாட்டேன்
அழித்துவிடுவேன்!!!
கவனம்!!!

சுனாமியின் கொடூரம் வரிகளில் தெரிகிறது...!
சுனாமி என்பது இதுவே கடைசியும் முதலுமாய் இருக்கட்டும்..!