இந்தியாவின் அதிகாரம் மிக்க பத்து நபர்கள்

by **சூரியன்** Wed Oct 13, 2010 11:55 am

1. சோனியா காந்தி : பிரதமர் உள்ளிட்ட எவரையும் விட இந்தியாவின் அதிகாரமிக்கவர்களில் முதல் இடத்தை திருமதி சோனியா காந்தி தொடர்ந்து தக்க வைத்துக் கொண்டுள்ளார். என்றாலும் பிரதமரின் சுய செயல்பாடுகளால் இவரது அதிகாரம் சற்றே குறைந்துள்ளதாகக் கருதப்படுகிறது.

2. டாக்டர் மன்மோகன் சிங் : சிறந்த அரசியல்வாதியாக மக்களின் ஆதரவு பெருகி வரும் மிக முக்கிய நபர் இவர். இவருக்கு அமெரிக்க அரசு உள்ளிட்ட பல்வேறு நாடுகளின் ஆதரவும் பின்துணையும் உள்ளது. இவர் அரசியல்வாதிகளை விட அரசு அதிகாரிகள் தரும் தகவல்களையே கணக்கில் எடுத்துக் கொள்கிறார். ராகுல் காந்தியை தன்னுடைய சொந்த மகனைப் போன்று நடத்துவதாகவும் இளைஞர்கள் குறித்த ராகுலின் ஆலோசனைகளை மன்மோகன் மிகுந்த கவனத்துடன் எடுத்துக் கொள்வதாகவும் கூறப்படுகிறது.

3. ராகுல் காந்தி : ஊடகங்களின் செல்லப் பிள்ளை. இவர் காத்திருப்பதாகக் கூறப்படும் பிரதமர் பதவியை விட்டுத் தர தற்போதைக்கு மன்மோகன் தயாராக இல்லை. தன்னுடைய சகோதரி பிரியங்காவிடம் அவ்வப்போது ஆலோசனைகள் செய்து கொள்கிறார். உலகில் உள்ள பில்லியனர்கள் பலருடன் இவருக்கு பலத்த தொடர்பு உள்ளதாகக் கூறப்படுகிறது. காங்கிரஸ் கட்சி உண்மையான மதச்சார்பின்மையைக் கடைப்பிடிக்க வேண்டும் என்று விரும்பும் இவர், சாதீய மற்றும் மதச் சார்புள்ள அனைத்துக் கட்சிகளையும் விமர்சித்து வருகிறார்.

4. அஹமது பட்டேல் : எண் 10 ஜன்பாத் சாலையில் உள்ள சோனியாவின் இல்லத்தையும் ஊடகத்தையும் இயக்கும் ரிமோட் ஒருவரின் கையில் இருக்கிறதென்றால் அவர்தான் அஹமது பட்டேல். ஊடகங்கள் இவரை விமர்சனம் செய்தது இல்லை. அரசியல்வாதிகள் இவரைப் பற்றி - நல்லதோ, கெட்டதோ - பேசுவது இல்லை. காங்கிரஸ் கட்சியின் டான் என்று இவர் கருதப்படுகிறார். நீங்கள் ஹரியாணா முதல்வராகவோ அல்லது குஜராத் முதல்வராகவோ இல்லாவிட்டால் இவரிடம் அப்பாயின்மெண்ட் பெறுவது கடினம். மத்திய அமைச்சர்கள் இவரைச் சந்திக்கவே வாரக் கணக்கில் காத்துக் கொண்டிருக்கிறார்களாம். காங்கிரஸ் கட்சியின் நவீன சாணக்யர் என்று இவர் அறியப்படுகிறார். 2012ஆம் ஆண்டு குடியரசுத் தலைவர் ஆவதே இவரது இலக்காகக் கூறப்படுகிறது.

5 பிரணாப் முகர்ஜி : தான் பிரதமர் ஆக முடியாது என்பதை வெளிப்படையாகச் சொன்னவர் இவர். எதையுமே வெளிப்படையாகப் பேசுவதுதான் இவரது சொத்து. அரசியல் கட்சிகளை காங்கிரஸ் கட்சித் தலைவர் சோனியாவுடனும் பிரதமர் மன்மோகன் சிங்குடனும் இணைக்கும் பாலமாக இவர் செயல்படுகிறார். தன்னுடைய பதவிக்காலம் முடிவடையும் முன்னரே அதில் இருந்து ஓய்வு பெறுவது குறித்து தீவிரமாக சிந்தித்து வருகிறார். அஹமது பட்டேலுடன் நெருக்கமாகச் செயல்படும் இவரது மிகப்பெரிய கனவு, மேற்கு வங்கத்தில் காங்கிரஸ் கட்சியை புனரமைப்பதே.

6. ப. சிதம்பரம் : இரும்புக் கரம் கொண்டு ஆட்சி செய்பவராக அறியப்படும் சிதம்பரம், நாட்டில் உள்ள அனைத்துத் தீவிரவாதத்தையும் வெளிச்சத்துக் கொண்டு வந்தவராகக் கருதப்படுகிறார். தன்னுடைய குறிக்கோளில் கவனமாக இருக்கும் அதே வேளை, எண் 10 ஜன்பத் சாலையைத் தவிர்த்த முன்னாள் தேசிய பாதுகாப்பு ஆலோசகரான எம்.கே. நாரயணன் போல் அல்லாமல் ஜன்பத் சாலை எண் பத்துடனும் ரேஸ்கோர்ஸ் சாலை எண் ஏழுடனும் நேரடித் தொடர்பில் இருந்து வருகிறார். சோனியாவின் நண்பரனா செல்வி ஷோபனா பாட்டியா என்பவர்தான் சிதம்பரத்தை எண் 10 ஜன்பத்துடன் இணைக்கிறார் என்று கூறப்படுகிறது.

7. ஜனார்தன் திவேதி : 90களின் இறுதியில் காங்கிரஸ் கட்சியின் தலைவர் சோனியா காந்திக்கு உரைகளைத் தயாரித்து அளித்த ஜனார்தன் திவேதி என்று தவிர்க்க முடியாத அரசியல் சக்தியாகத் திகழ்கிறார். காங்கிரஸ் கட்சியில் பிரமானர்களின் நலனை இவரே பாதுகாக்கிறார். கட்சியின் ஊடகத்துறையின் தலைவராகத் திகழ்கிறார். ராகுல் காந்தி பிரச்சனைக்குரிய கருத்துகளை வெளியிடும்போது அவரது கருத்தை ஆதரிக்கும் முதல் நபராக ஜனார்தன் திவேதி திகழ்ந்து வருகிறார்.

8. திக் விஜய் சிங் : ராஜீவ் காந்தியின் ஆதரவாளராக முன்னர் அறியப்பட்ட மத்தியப் பிரதேச மாநில முன்னாள் முதல்வர் திக் விஜய் சிங் தற்போது ராகுல் காந்தியின் ஆளாக அறியப்படுகிறார். நன்றாகப் பயின்ற புத்திஜீவி அரசியல்வாதி இவர். ராகுல் காந்தியுடன் இவரது நெருக்கம் கட்சியில் அஹமது பட்டேல் மற்றும் ப.சிதம்பரம் உள்பட பல எதிரிகளை இவருக்கு உருவாக்கி இருப்பதாகக் கூறப்படுகிறது.

9. ஏ.கே. அந்தோணி : காங்கிரஸ் கட்சியின் மதிப்புமிக்க அரசியல்வாதி இவர். உள்கட்சிப் பிரச்சனைகளின்போது சோனியா காந்தி இவரது கருத்தை அறிந்து முடிவு எடுப்பார். பிரதமர் மற்றும் ராகுல் காந்தியின் ஆதரவும் இவருக்கு உண்டு. உள்நாட்டுப் பாதுகாப்பு பொறுப்பை வகித்தும் இதுவரை பிரச்சனைகள் அற்ற அமைச்சராக இவர் விளங்குகிறார்.

10. டி.கே.ஏ. நாயர் : பிரதமர் மன்மோகன் சிங்கின் முதன்மைச் செயலாளராகப் பதவி வகித்து வரும் டி.கே.ஏ. நாயர் பிரதமரின் மிகவும் நம்பிக்கைக்குரிய நபராகக் கருதப்படுகிறார். பிரதமரையும் நாயரையும் பிரிக்க இயலாது என்று ஊடகவியலாளர் கருத்து தெரிவிக்கும் அளவு பிரதமருடன் நெருக்கமானவர்.